നാടിനെയും നാട്ടുകാരെയും നന്നാക്കാൻ എസ് ഐ ബിജു പൌലോസ് വീണ്ടും ചാർജ് എടുക്കുന്നു, ആക്ഷൻ ഹിറോ ബിജു രണ്ടാം ഭാഗം പ്രഖ്യാപിച്ച് നിവിൻ പോളി

തുണിപൊക്കിയ കേസ് മുതൽ പട്ടിയെ വിട്ട് കടിപ്പിച്ച കേസ് വരെ, ഹെൽമറ്റില്ലാതെ വണ്ടി ഓടിച്ചതു മുതൽ ജീവനക്കാരിയായ യുവതിക്ക് ശമ്പളം നൽകാത്ത കേസ് വരെ… ആക്ഷൻ ഹിറോ ബിജു തീർത്തത് എത്രയെത്ര കേസുകൾ. ജനമൈത്രി പൊലീസ് വെറും പേരല്ലെന്നും ജനങ്ങളോട് മൈത്രിയുള്ളവരാണെന്നും ജനങ്ങളെ ബോധ്യപ്പെടുത്തിയ സിനിമ കൂടി ആയിരുന്നു ആക്ഷൻ ഹീറോ ബിജു. തിയറ്ററുകളിൽ ആക്ഷൻ ഹിറോ ആയി എത്തിയ ബിജു പൌലോസ് പ്രേക്ഷകരെ രസിപ്പിച്ചത് ചില്ലറയല്ല. ചിത്രം റിലീസ് ചെയ്ത് എട്ടു വർഷം പൂർത്തിയാകുമ്പോൾ സിനിമയുടെ രണ്ടാം ഭാഗം പ്രഖ്യാപിച്ചിരിക്കുകയാണ് അണിയറ പ്രവർത്തകർ. നിവിൻ പോളി തന്റെ സോഷ്യൽ മീഡിയയിലൂടെയാണ് ആരാധകരെ ഈ സന്തോഷ വാർത്ത അറിയിച്ചത്.

‘ആക്ഷൻ ഹിറോ ബിജു സ്ക്രീനുകളിൽ എത്തിയിട്ട് എട്ടു വർഷമായി. അന്നുമുതൽ ഇന്നുവരെ ചിത്രത്തിന് ലഭിക്കുന്ന സ്നേഹവും അഭിനന്ദനവും ഹൃദ്യവും സ്വാഗതാർഹവുമാണ്. ചിത്രത്തിന്റെ രണ്ടാം ഭാഗം പ്രഖ്യാപിക്കുന്നതിൽ വളരെ ആവേശഭരിതരാണ് ഞങ്ങൾ.’ – ആക്ഷൻ ഹിറോ ബിജു 2 പോസ്റ്ററിനൊപ്പം നിവിൻ പോളി സോഷ്യൽ മീഡിയയിൽ കുറിച്ചു.

എബ്രിഡ് ഷൈൻ ആണ് ചിത്രം സംവിധാനം ചെയ്യുന്നത്. നിർമാതാവ് എന്ന നിലയിൽ നിവിൻ അരങ്ങേറ്റം കുറിച്ച ചിത്രമായിരുന്നു ആക്ഷൻ ഹിറോ ബിജു. ചിത്രത്തിന്റെ രണ്ടാം ഭാഗവും നിവിൻ പോളി തന്നെ ആയിരിക്കും നിർമിക്കുന്നത്. ഏതായാലും സിനിമാപ്രേമികൾ വളരെ ആവേശത്തോടെയാണ് ഈ വാർത്തയെ വരവേറ്റത്. ബിജു പൌലോസ് തിരിച്ചെത്തി, നിവിൻ പോളി തിരിച്ചെത്തി, ഇനിയാണ് പഴയ നിവിൻ പോളിയുടെ തിരിച്ചു വരവ് എന്നിങ്ങനെ പോകുന്നു കമന്റുകൾ. 2016 ഫെബ്രുവരി നാലിന് ആയിരുന്നു ആക്ഷൻ ഹിറോ ബിജു റിലീസ് ചെയ്തത്.