പാതിയിൽ ഉപേക്ഷിച്ച ആ മോഹം യാഥാർത്ഥ്യമാക്കി; ഭാര്യ വക്കീൽകുപ്പായം അണിഞ്ഞതിന്റെ സന്തോഷം പങ്കുവെച്ച് നോബി മാർക്കോസ്

ജീവിതത്തിലെ ഒരു വലിയ സന്തോഷം ആരാധകരുമായി പങ്കുവെച്ചിരിക്കുകയാണ് മിമിക്രി കലാകാരനും നടനുമായ നോബി മാർക്കോസ്. ഭാര്യ ആര്യ അഭിഭാഷകയായി എൻറോൾ ചെയ്തതിന്റെ സന്തോഷം പങ്കുവെച്ചിരിക്കുകയാണ് താരം ഇപ്പോൾ. ആര്യ അഭിഭാഷകവേഷത്തിൽ നിൽക്കുന്നതിന്റെ ചിത്രം പങ്കുവെച്ചു കൊണ്ടാണ് ഭാര്യയുടെ വലിയ നേട്ടത്തെ താരം ആഘോഷമാക്കുന്നത്.

മിമിക്രി രംഗത്തു നിന്നാണ് സിനിമാ മേഖലയിലേക്ക് നോബി എത്തിയത്. വീട്ടുകാരെ എതിർത്തുള്ള വിവാഹം ആയിരുന്നു നോബിയുടേതും ഭാര്യ ആര്യയുടേതും. നേരത്തെ തന്റെ പ്രണയത്തെക്കുറിച്ചും വിവാഹത്തെക്കുറിച്ചും നോബി മനസു തുറന്നിരുന്നു. ആര്യ പഠിക്കുന്ന എൽ എൽ ബി കോളേജിൽ പരിപാടി അവതരിപ്പിക്കാൻ പോയപ്പോൾ ആയിരുന്നു നോബി ആര്യയെ പരിചയപ്പെട്ടതും അത് പ്രണയത്തിന് വഴി മാറിയതും. എന്നാൽ വീട്ടുകാർ ഇവരുടെ വിവാഹത്തിന് സമ്മതിച്ചില്ല. തുടർന്ന് ഇരു വീട്ടുകാരെയും എതിർത്തുള്ള വിവാഹമായിരുന്നു ഇവരുടേത്.

എന്നാൽ, പ്രണയർവിവാഹത്തിന്റെ കളിയാക്കലുകൾ ഭയന്ന ആര്യ തന്റെ എൽ എൽ ബി പഠനം പാതിവഴിയിൽ ഉപേക്ഷിക്കുകയായിരുന്നു. ‘വിവാഹം കഴിഞ്ഞ കുറച്ചു കാലം കഴിഞ്ഞതിനു ശേഷം തന്റെ പഠനം തുടർന്ന ആര്യ ഒടുവിൽ എൽ എൽ ബി പൂർത്തീകരിക്കുകയായിരുന്നു. നിനക്ക് അർഹതപ്പെട്ട വിജയത്തിന് അഭിനന്ദനങ്ങൾ, നിന്റെ പരിശ്രമമാണ് നിന്നെ വിജയത്തിലേക്ക് എത്തിച്ചത്. ഇതിൽ കൂടുതൽ നീ അർഹിക്കുന്നു’ – ഭാര്യയുടെ ചിത്രം പങ്കുവെച്ചുകൊണ്ട് നോബി കുറിച്ചു.