‘പ്രണവിനെ ഒന്ന് കെട്ടിപ്പിടിക്കണം എന്ന് തോന്നി’; ഹൃദയം കണ്ടതിനെക്കുറിച്ച് നടൻ സായി കുമാർ

ഹൃദയം സിനിമ കണ്ടതിനെക്കുറിച്ചും പ്രണവ് മോഹൻലാലിനെക്കുറിച്ചും വാചാലനായി നടൻ സായി കുമാർ. കാൻ ചാനലിന് നൽകിയ അഭിമുഖത്തിലാണ് സായി കുമാർ മനസ് തുറന്നത്. ഹൃദയം സിനിമയിലെ ചില രംഗങ്ങൾ കണ്ടപ്പോൾ പ്രണവിനെ കെട്ടിപ്പിടിക്കാൻ തോന്നിയെന്നും പ്രണവിനെ മാത്രമല്ല വിനീതിനെയും ഹഗ് ചെയ്യണമെന്ന് തോന്നിയെന്നും സായി കുമാർ പറഞ്ഞു.

സായി കുമാർ പറഞ്ഞത് ഇങ്ങനെ, ‘വിനീത് ശ്രീനിവാസന്റെ ഹൃദയത്തിൽ 15 പാട്ട് ഉണ്ടായിരുന്നു. പക്ഷേ, ഒരു സെക്കൻഡ് പോലും നമുക്ക് ലാഗ് ഇല്ലാതെ, അറിയാതെ ചിരിച്ചു പോകുന്ന അറിയാതെ കണ്ണു നിറഞ്ഞു പോകുന്ന ഒരു സംഭവമുണ്ട്. ഹൃദയം സിനിമ കണ്ടിട്ട് അറിയാതെ കണ്ണിനകത്ത് നിന്ന് പടാപടാന്ന് ചാടി പോയി. അത് എന്താണ് അവൻ തന്ന ഫീൽ എന്ന് എനിക്കറിയില്ല, പക്ഷേ എനിക്കവനെ ഒന്ന് ഹഗ് ചെയ്യാൻ തോന്നി. സത്യം. ഒന്ന് കെട്ടിപ്പിടിക്കണം എന്ന് തോന്നിപ്പോയി. ആ ഇന്റർവെൽ പോർഷൻ, അത് വല്ലാത്തൊരു മൊമന്റ് ആയിരുന്നു, രണ്ടെണ്ണത്തിനെയും ഹഗ് ചെയ്യണം. ഈ വിനീതിനെയും ഹഗ് ചെയ്യണം, പ്രണവിനെയും ഹഗ് ചെയ്യണം. പ്രണവിന്റെ ചില കണ്ണുകളുടെ എക്സ്പ്രഷൻസ് ഉണ്ടല്ലോ, ലാൽസാർ തന്നെ. ജീത്തുവിന്റെ പടത്തിൽ കണ്ട അപ്പുവേ അല്ല. ഇത്, എന്തോ കേറിയിട്ട് വേറെ ഒരാളായി മാറിയെന്ന് എനിക്ക് തോന്നുന്നു. ആ ഒരു സ്വിച്ചിംഗ് ഭയങ്കരമായി പോയി’ – സായി കുമാർ പറഞ്ഞു.

കോവിഡ് പ്രതിസന്ധി സംസ്ഥാനത്ത് രൂക്ഷമായിരുന്ന ജനുവരിയിൽ ആയിരുന്നു ഹൃദയം സിനിമ തിയറ്ററുകളിലേക്ക് എത്തിയത്. തിയറ്ററുകളിൽ വൻ സ്വീകരണം ഏറ്റുവാങ്ങിയ ചിത്രം പിന്നീട് ഒ ടിടിയിലും റിലീസ് ചെയ്തു. പ്രണവ് മോഹൻലാലിനെ നായകനാക്കി വിനീത് ശ്രീനിവാസൻ ഒരുക്കിയ ചിത്രത്തിൽ ദർശന രാജേന്ദ്രൻ, കല്യാണി പ്രിയദർശൻ എന്നിവർ ആയിരുന്നു നായികമാർ.