‘നിന്റെ അമ്മ അടുക്കളേൽ ഉണ്ടാക്കുന്നൊണ്ടാവും, പോയി ചോദിക്ക്’: ചൊറിയൻ കമന്റുമായി വന്നയാൾക്ക് ഷെയിൻ നിഗത്തിന്റെ മാസ് മറുപടി

സിനിമയിൽ മാത്രമല്ല സോഷ്യൽ മീഡിയയിലും സജീവമാണ് നടൻ ഷെയിൻ നിഗം. ഇടയ്ക്കിടയ്ക്ക് തന്റെ പുതിയ ഫോട്ടോകളും യാത്രാവിശേഷങ്ങളും എല്ലാം ഷെയിൻ സോഷ്യൽ മീഡിയയിൽ പങ്കുവെയ്ക്കാറുണ്ട്. തന്റെ പുതിയ സിനിമയുടെ വിശേഷങ്ങളും ഒപ്പം യാത്ര പോകുന്ന കാര്യങ്ങളും പങ്കുവെയ്ക്കാറുണ്ട്. അത്തരത്തിൽ കഴിഞ്ഞയിടെ കൊടൈക്കനാലിൽ പോയതിന്റെ വീഡിയോയും ഷെയിൻ നിഗം പങ്കുവെച്ചിരുന്നു. എന്നാൽ ഈ ചിത്രത്തിനു താഴെ വളരെ മോശം രീതിയിലുള്ള കമന്റുകളായിരുന്നു എത്തിയത്.

‘നല്ല മഷ്‌റൂം കിട്ടിയോ’ എന്നായിരുന്നു ഒരു കമന്റ്. എന്നാൽ ഈ കമന്റിന് നല്ല കുറിക്കു കൊള്ളുന്ന മറുപടിയാണ് ഷെയിൻ നൽകിയത്. ‘നിന്റെ അമ്മ അടുക്കളേൽ ഉണ്ടാക്കുന്നൊണ്ടാവും, പോയി ചോദിക്ക്’ എന്നായിരുന്നു കമന്റ്. നിരവധി പേരാണ് കൊടൈക്കനാലിൽ നിന്ന് ഷെയിൻ പങ്കുവെച്ച ചിത്രത്തിന് താഴെ കൂൺ സംബന്ധമായ കമന്റുകളുമായി എത്തിയത്. ‘എന്താ മോനുസേ കൂൺ തിന്നാൻ പോയതാണോ’, ‘കളർ ആയോ’, ഇത്തരത്തിലുള്ള കമന്റുകളാണ് താരത്തിനെ പ്രകോപിതനാക്കിയത്.

കിസ്മത്ത് എന്ന സിനിമയിൽ നായകനായി അഭിനയ മേഖലയിലേക്ക് എത്തിയ താരമാണ് ഷെയിൻ നിഗം. നടനും മിമിക്രി കലാകാരനുമായ അബിയുടെ മകനായ ഷെയിൻ നിഗം ഒരു ഡാൻസ് ഷോയിലൂടെയാണ് മുഖ്യധാരയിലേക്ക് കടന്നു വന്നത്. താന്തോന്നി, അൻവർ എന്നീ സിനിമകളിൽ ബാലതാരമായി അഭിനയിച്ച ഷെയിൻ നിഗത്തിന്റെ അഭിനയജീവിതത്തിൽ വഴിത്തിരിവായത് രാജീവ് രവി സംവിധാനം ചെയ്ത അന്നയും റസൂലും സിനിമയാണ്. 2016ൽ ഷാനവാസ് കെ ബാവക്കുട്ടി സംവിധാനം ചെയ്ത മലയാളചിത്രം കിസ്മത്തിലൂടെ നായകനായി അരങ്ങേറ്റം കുറിച്ചു. ഭൂതകാലം, വെയിൽ, ഉല്ലാസം എന്നീ ചിത്രങ്ങളാണ് ഷെയിനിന്റേതായി അവസാനമായി റിലീസ് ആയ ചിത്രങ്ങൾ.