‘അഹങ്കാരം കൊണ്ട് കാട്ടികൂട്ടിയതാണ് അതെല്ലാം, എന്നോട് പൊറുക്കണം’: ഷൈൻ ടോം ചാക്കോ

അഭിമുഖങ്ങളിലെ സംസാരരീതി കൊണ്ടും പെരുമാറ്റ രീതികൾ കൊണ്ടും വിവാദങ്ങളിൽ കുടുങ്ങിയ നടനാണ് ഷൈൻ ടോം ചാക്കോ. അഭിമുഖങ്ങളിലെ താരത്തിന്റെ സംസാരരീതി പലപ്പോഴും വിമർശനത്തിന് ഇടയായിട്ടുണ്ട്. എന്നാൽ ഇത്തരത്തിലുള്ള മോശം പെരുമാറ്റങ്ങൾക്ക് ഇപ്പോൾ മാപ്പു പറഞ്ഞിരിക്കുകയാണ് ഷൈൻ ടോം ചാക്കോ. ടോവിനോ തോമസ് നായകനായി എത്തുന്ന തല്ലുമാല ചിത്രത്തിന്റെ പ്രമോഷന് എത്തിയപ്പോൾ ആണ് തന്റെ മോശം പെരുമാറ്റങ്ങൾക്ക് മാപ്പ് ചോദിക്കുന്നതായി താരം പറഞ്ഞത്.

തന്റെ ഭാഗത്ത് നിന്നുണ്ടായ ഇത്തരം മോശം പെരുമാറ്റങ്ങൾ എല്ലാം ചിത്രങ്ങൾ വിജയിച്ചപ്പോഴുണ്ടായ അഹങ്കാരത്തിൽ നിന്ന് ഉണ്ടായതാണെന്ന് പറയുകയാണെന്ന് ഷൈൻ. ‘കഴിഞ്ഞ കുറെ നാളുകളായി മോശമായി പെരുമാറികൊണ്ടിരിക്കുന്ന ആളാണ് ഞാന്‍. അതിന് കാരണം ഭീഷ്മപര്‍വം, കുറുപ്പ് ഒക്കെ കുറെ ആളുകള്‍ കാണുകയും അതൊക്കെ ഒരുപാട് പേര്‍ക്ക് ഇഷ്ടപെടുകയും ചെയ്തപ്പോള്‍ എന്റെ ഉള്ളില്‍ ഉണ്ടായ അഹങ്കാരമാണ്. ചെയ്യുന്ന വര്‍ക്ക് ആളുകള്‍ അംഗീകരിക്കുമ്പോള്‍ കിട്ടുന്ന എനര്‍ജി മൂലം ഉണ്ടായതാണ് അതൊക്കെ എല്ലാവരും പൊറുക്കണം’ – തല്ലുമാല പ്രമോഷന് എത്തിയ ഷൈന്‍ പറഞ്ഞു.

എനര്‍ജി തരുന്നത് പ്രേക്ഷകരാണെന്നും അവരുടെ എനര്‍ജിയാണ് തന്നിലൂടെ പുറത്ത് വരുന്നത് എന്നും കാട്ടികൂട്ടലുകള്‍ അങ്ങനെ സംഭവിച്ചു പോയതാണെന്നും ഷൈന്‍ തുറന്നു പറഞ്ഞു. ഖാലിദ് റഹ്മാന്‍ ചിത്രം തല്ലുമാലയുടെ ട്രയിലർ ലോഞ്ചിങ് വേദിയിൽ ആയിരുന്നു ഷൈന്‍ ഇക്കാര്യം പറഞ്ഞത്. ഓഗസ്റ്റ് 12നാണ് തല്ലുമാല തിയറ്ററിൽ എത്തുക. ടോവിനോയ്ക്കും ഷൈനിനുമൊപ്പം ലുക്മാനും കല്യാണി പ്രിയദര്‍ശനും ചിത്രത്തില്‍ അഭിനയിക്കുന്നുണ്ട്. ഛായാഗ്രഹണം – ജിംഷി ഖാലിദ്, സംഗീതം – വിഷ്ണു വിജയ്, ഗാനരചന – മുഹ്സിന്‍ പരാരി, എഡിറ്റിങ് – നിഷാദ് യൂസഫ്. ആഷിക് ഉസ്മാന്‍ പ്രൊഡക്ഷന്‍സിന്റെ ബാനറില്‍ ആഷിക് ഉസ്മാനാണ് ചിത്രം നിര്‍മിക്കുന്നത്. മുഹ്സിന്‍ പരാരിയും അഷറഫ് ഹംസയും ചേര്‍ന്നാണ് തിരക്കഥ എഴുതിയിരിക്കുന്നത്.