‘സിയൽ എന്നാണ് എന്റെ കു‍ഞ്ഞിന്റെ പേര്, ഈ ഭൂഖണ്ഡത്തിലേ അവരില്ല, അവർ സുഖമായിരിക്കുന്നു’ – കുഞ്ഞിനെക്കുറിച്ച് മനസു തുറന്ന് ഷൈൻ ടോം ചാക്കോ

വ്യത്യസ്തമായ വേഷങ്ങൾ മനോഹരമാക്കി സിനിമകളിൽ തിളങ്ങി നിൽക്കുന്ന നടനാണ് ഷൈൻ ടോം ചാക്കോ. അടിയാണ് താരത്തിന്റേതായി പുതുതായി റിലീസ് ചെയ്യാനിരിക്കുന്ന ചിത്രം. അഹാന കൃഷ്ണയാണ് അടി സിനിമയിൽ ഷൈൻ ടോം ചാക്കോയുടെ നായികയായി എത്തുന്നത്. ചിത്രത്തിന്റെ പ്രമോഷന്റെ ഭാഗമായി നിരവധി അഭിമുഖങ്ങളും മറ്റും ഓൺലൈനിൽ സജീവമായിക്കഴിഞ്ഞു.

ഇത്തരത്തിൽ ഒരു അഭിമുഖത്തിൽ സ്വന്തം കുഞ്ഞിനെക്കുറിച്ച് ഷൈൻ ടോം ചാക്കോ വെളിപ്പെടുത്തിയ കാര്യങ്ങളാണ് വൈറലായിരിക്കുന്നത്. തന്റെ കുഞ്ഞിന്റെ പേര് സിയൽ എന്നാണെന്നും അവർ ഈ ഭൂഖണ്ഡത്തിലേ ഇല്ലെന്നും ഷൈൻ ടോം ചാക്കോ പറഞ്ഞു. മാതാപിതാക്കൾ വേർപിരിഞ്ഞു കഴിഞ്ഞാൽ കുട്ടികൾ ഏതെങ്കിലും ഒരു സൈഡിൽ നിന്ന് വളരുന്നതാണ് നല്ലതെന്നും ഷൈൻ പറഞ്ഞു.

അവർ സന്തോഷത്തോടെയാണ് ജീവിക്കുന്നതെന്നും അവരെ ഓർത്ത് വിഷമം ഒന്നുമില്ലെന്നും മൈൽസ്റ്റോൺ മേക്കേഴ്സിന് നൽകിയ അഭിമുഖത്തിൽ ഷൈൻ പറഞ്ഞു. ‘കുഞ്ഞ് സന്തോഷത്തോടെ ഇരിക്കുന്നു. സിയൽ എന്നാണ് പേര്. ഇപ്പോൾ എട്ടു വയസ് ആയി. അവർ ഈ ഭൂഖണ്ഡത്തിലേ ഇല്ല. അല്ലെങ്കിലും സെപ്പറേറ്റഡ് ആയി കഴിഞ്ഞാൽ ഏതെങ്കിലും ഒരു സൈഡിൽ നിന്ന് കുഞ്ഞ് വളരുന്നതാണ് നല്ലത്. അല്ലെങ്കിൽ പത്തു ദിവസം ഇവിടെ നിന്നിട്ട് അവിടുത്തെ കുറ്റവും പത്തു ദിവസം അവിടെ നിന്നിട്ട് ഇവിടുത്തെ കുറ്റവും കേട്ട് വളരേണ്ടി വരും’ – ഷൈൻ പറഞ്ഞു.