‘ഇന്നസെന്റ് ചേട്ടന് വയ്യ എന്ന് പറയുന്നത് പോലും അവന് സഹിക്കാൻ പറ്റില്ലായിരുന്നു’ – ഇന്നസെന്റും ദിലീപും തമ്മിലുണ്ടായിരുന്ന ആത്മബന്ധത്തെക്കുറിച്ച് സിദ്ദിഖ്

ഹാസ്യത്തിലൂടെയും സ്വാഭാവിക അഭിനയത്തിലൂടെയും മലയാളികളെ ഏറെ രസിപ്പിച്ച നടനാണ് ഇന്നസെന്റ്. കഴിഞ്ഞയിടെയാണ് അദ്ദേഹം തന്റെ പ്രിയപ്പെട്ട പ്രേക്ഷകരോട് വിട പറഞ്ഞ് നിത്യതയിലേക്ക് മടങ്ങിയത്. അന്തരിച്ച തങ്ങളുടെ പ്രിയപ്പെട്ട താരത്തെ കാണാൻ നിരവധി പേരായിരുന്നു പൊതുദർശനത്തിന് വെച്ച സ്ഥലത്തേക്കും വീട്ടിലേക്കുമായി എത്തിയത്. ചലച്ചിത്ര മേഖലയിലെ അദ്ദേഹത്തിന്റെ സുഹൃത്തുക്കളും നിരവധി താരങ്ങളും ഇന്നസെന്റിന് അന്ത്യയാത്ര നൽകുവാൻ എത്തിയിരുന്നു.

ഇന്നസെന്റിന്റെ അന്ത്യയാത്രയിൽ എല്ലാവരുടെയും കണ്ണിലുടക്കിയത് കരഞ്ഞുകലങ്ങിയ കണ്ണുകളുമായി എത്തിയ ദിലീപും കാവ്യ മാധവനും ആയിരുന്നു. ദിലീപും കാവ്യയും ഇന്നസെന്റിന്റെ അന്ത്യയാത്രയിൽ സെമിത്തേരി വരെ ഒപ്പമുണ്ടായിരുന്നു. ഇപ്പോൾ ദിലീപും ഇന്നസെന്റും തമ്മിലുള്ള വലിയ ആത്മബന്ധത്തെക്കുറിച്ച് തുറന്നു പറയുകയാണ് നടൻ സിദ്ദിഖ്. ഇന്നസെന്റിന്റെ മരണം ഏറെ തളർത്തിയത് ദിലീപിനെ ആയിരുന്നെന്ന് സിദ്ദിഖ് തുറന്നുപറഞ്ഞു.

ഇന്നസെന്റിന്റെ മൃതദേഹത്തിന് അരികെ ദിലീപും കാവ്യയും പൊട്ടിക്കരഞ്ഞു പോയതിന്റെ കാരണം വ്യക്തമാക്കുകയാണ് സിദ്ദിഖ്. ദിലീപും ഇന്നസെന്റും തമ്മിൽ ആഴത്തിലുള്ള ബന്ധം ഉണ്ടായിരുന്നു. സുഖത്തിലും ദുഃഖത്തിലും അവർ രണ്ട് പേരുമുണ്ടായിരുന്നു. ആ അടുപ്പം തനിക്കും വ്യക്തമായി അറിയാവുന്നതാണെന്നും സിദ്ദിഖ് പറഞ്ഞു. ‘ഇന്നസെന്റ് ചേട്ടന്റെ അസുഖ വിവരം ദിലീപിനെ അക്ഷരാർത്ഥത്തിൽ തളർത്തിക്കളഞ്ഞതാണ്. ഇന്നസെന്റ് ചേട്ടന് വയ്യ എന്ന് പറയുന്നത് പോലും അവന് സഹിക്കാൻ പറ്റില്ലായിരുന്നു. ഓരോരുത്തരായി കൊഴിഞ്ഞ് പോയിക്കൊണ്ടിരിക്കുകയല്ലേ. പല സിനിമകൾ കാണുമ്പോഴും എൻജോയ് ചെയ്യുന്നതിനേക്കാൾ കൂടുതൽ വിഷമമാണ് തോന്നുക. അവരിന്ന് നമ്മുടെ കൂടെ ഇല്ലല്ലോ എന്നാണ് പെട്ടെന്ന് തോന്നുക’- സിദ്ദിഖ് പറഞ്ഞു.