സുരാജ് വെഞ്ഞാറമൂട് ഇനി ജില്ലാ കളക്ടർ…!

തികഞ്ഞ അഭിനയ മികവോടെ ഏതു വിധേനെയുള്ള കഥാപാത്രങ്ങൾ ആണെങ്കിലും ഹാസ്യരംഗങ്ങൾ ആയാലും തന്മയത്വത്തോടെ കൈകാര്യം ചെയ്യുന്നതിൽ എന്നും ഏറെ മുന്നിലാണ് സുരാജ് വെഞ്ഞാറമൂട്. വ്യത്യസ്‌തമായ കഥാപാത്രങ്ങൾ ഉൾക്കൊണ്ട് പ്രേക്ഷകശ്രദ്ധ ആകർഷിച്ചിട്ടുള്ള അദ്ദേഹം ഇനി ഇടുക്കി ജില്ലാ കളക്ടർ ആയി പ്രേക്ഷകർക്ക് മുന്നിലെത്തുന്നു. ജയസൂര്യ കേന്ദ്ര കഥാപാത്രമായി അഭിനയിക്കുന്ന ഞാൻ മേരിക്കുട്ടി എന്ന ചിത്രത്തിലാണ് മനോജ് വൈദ്യർ IAS എന്ന കഥാപാത്രത്തിലൂടെ ഇടുക്കി ജില്ലാ കളക്‌ടറുടെ വേഷം അദ്ദേഹം അണിയുന്നത്.
രഞ്ജിത്ത് ശങ്കറിന്റെ സംവിധാനത്തിൽ ജയസൂര്യ വ്യത്യസ്ത ഗെറ്റപ്പിൽ എത്തുന്ന ചിത്രമാണ് ഞാൻ മേരിക്കുട്ടി. ജയസൂര്യ സ്ത്രീയുടെ ഗെറ്റപ്പിൽ കൂടി എത്തുന്ന ഈ ചിത്രത്തിൽ കഥാപാത്രത്തിന്റെ പൂര്ണതക്ക് വേണ്ടി ജയസൂര്യ ത്രെഡ് ചെയ്യുകയും കാതുകുത്തുകയും ചെയ്തിരുന്നത് പ്രേക്ഷക ശ്രദ്ധ ഏറെ ആകർഷിച്ചിരുന്നു. ഷൂട്ടിംഗ് പുരോഗമിച്ചുകൊണ്ടിരിക്കുന്ന ചിത്രത്തിന്റെ ഈ വിവരം സംവിധായകൻ രഞ്ജിത്ത് ശങ്കർ തന്നെയാണ് തന്റെ ഫേസ്ബുക്ക് പേജിലൂടെ പങ്കുവെച്ചത്.
അധികമാരും കണ്ടിട്ടില്ലാത്ത പ്രമേയമായി എത്തുന്ന ഈ ചിത്രത്തിന്റെ വരവിനായി ഏറെ ആകാംക്ഷയിലാണ് ആരാധകർ.