‘ഗർഭിണിയുടെ വയറിൽ കൈ വെച്ചപ്പോൾ അത് പലർക്കും അസുഖകരമായ കാഴ്ചയായി’: തുറന്നുപറഞ്ഞ് സുരേഷ് ഗോപി

നടനെന്ന നിലയിലുപരി ഒരു മനുഷ്യസ്നേഹി എന്ന നിലയിലാണ് സുരേഷ് ഗോപി ഇപ്പോൾ മലയാളികൾക്ക് പ്രിയങ്കരനാകുന്നത്. കാരണം അദ്ദേഹത്തിന്റെ പുണ്യപ്രവൃത്തികൾക്ക് സാക്ഷിയായിട്ടുള്ളവർ തന്നെ അതിനെക്കുറിച്ച് പറയുമ്പോൾ സുരേഷ് ഗോപി എന്ന വലിയ നടന്റെ മനസിന്റെ വലുപ്പവും നമ്മൾ അറിയുകയാണ്. എന്നാൽ താൻ ചെയ്തു കൊടുക്കുന്ന പ്രവൃത്തിയെ ഓർക്കുകയോ പിന്നീട് അത് അയവിറക്കുകയോ ചെയ്യുന്ന ആളല്ല താനെന്ന് വ്യക്തമാക്കുകയാണ് താരം. തന്നാലാവുന്ന കാര്യങ്ങൾ മറ്റുള്ളവർക്ക് ചെയ്തു കൊടുക്കാൻ ദൈവം തന്നോട് പറഞ്ഞതുപോലെയോ തോന്നിയിട്ടുള്ളൂവെന്നും സുരേഷ് ഗോപി പറഞ്ഞു. വഴിയരികിൽ ഏതെങ്കിലും കുഞ്ഞുങ്ങളെയോ ഗർഭിണികളെയോ കണ്ടാൽ അവരോടുള്ള എല്ലാ സ്നേഹവും താൻ പ്രകടിപ്പിക്കും. എന്നാൽ, ചിലർക്ക് അതെല്ലാം അസ്വസ്ഥതയുള്ള കാഴ്ചകളാണെന്നും സുരേഷ് ഗോപി പറഞ്ഞു.

തൃശൂരിൽ ഗർഭിണിയുടെ വയറിൽ കൈവെച്ച് അനുഗ്രഹിച്ച സംഭവത്തെക്കുറിച്ചും സുരേഷ് ഗോപി പറഞ്ഞു. വഴിവക്കിൽ ഗർഭിണിയെ കാണുകയാണ്. അവർ തന്റെ അടുത്തേക്ക് വന്ന് തൊഴുത് നിൽക്കുകയാണ്. അപ്പോൾ ഞാൻ അവരുടെ വയറിൽ നോക്കിയ ശേഷം മുഖത്തേക്ക് നോക്കിയപ്പോൾ ഏഴു മാസമായി എന്ന് അവർ എന്നോട് പറഞ്ഞു. അനുഗ്രഹിക്കുമോ എന്ന് ചോദിച്ചു. ഞാൻ അപ്പോൾ എന്റെ കൈയെടുത്ത് അവരുടെ വയറിൽ വെച്ചതേയുള്ളൂ. അത് പലർക്കും അസ്വസ്ഥതയുണ്ടാക്കി. എന്റെ മകളാണ് ആ നിൽക്കുന്നതെങ്കിൽ ഞാൻ ആ വയറ്റത്ത് ഉമ്മ വെക്കും, തടവും, നല്ല പാട്ടുപാടി കൊടുക്കുമെന്നും അദ്ദേഹം പറഞ്ഞു. അന്ന് ആ കുഞ്ഞിനെ അനുഗ്രഹിക്കാന്‍ പറ്റിയല്ലോ എന്ന് ഉറങ്ങാന്‍ കിടക്കുമ്പോള്‍ ആലോചിച്ചു താൻ സന്തോഷിച്ചെന്നും സുരേഷ് ഗോപി വ്യക്തമാക്കി.

തന്റെ എല്ലാ മക്കളും രാധികയുടെ വയറ്റിനുള്ളിൽ കിടക്കുമ്പോൾ ഒരുപാട് പാട്ട് പാടി കൊടുത്തിട്ടുണ്ടെന്നും അദ്ദേഹം പറഞ്ഞു. നല്ല സംഗീതം കേൾപ്പിച്ചിട്ടുണ്ട്. രാത്രി പാട്ട് പ്ലേ ചെയ്തു കൊണ്ടേയിരിക്കും. മകൾ ഭാഗ്യയും ഭാവ്നിയും പാടും. അവരൊന്നും അത് പുറത്തേക്ക് കൊണ്ടുവരില്ല. അതുപോലെ മകൻ മാധവ് ക്രിയേഷണല്‍ സെഗ്മെന്റിലേക്ക് തന്നെയാണ് വരുന്നത്. ആക്ടറാണോ റൈറ്ററാണോ ഡയറക്ടറാണോ എന്നറിയില്ല. അവരുടെ ഇഷ്ടത്തിന് വിട്ടിരിക്കുകയാണെന്നും സുരേഷ് ഗോപി പറഞ്ഞു. ഈ ലോകത്ത് ഏറ്റവും ഇഷ്ടപ്പെടുന്ന കാഴ്ച എന്താണെന്ന് ആരെങ്കിലും ചോദിച്ചാല്‍ ഒരു പത്തയ്യായിരം ഗര്‍ഭിണികള്‍ വയറിങ്ങനെ താങ്ങിപ്പിടിച്ച് എനിക്കിത് താങ്ങാന്‍ വയ്യേ എന്ന് പറഞ്ഞ് നില്‍ക്കുന്ന ആ ഒരു നില്‍പ്പുണ്ടല്ലോ. അത് കാണാനാണെന്ന് പറയുമെന്നും ചിരിയോടെ സുരേഷ് ഗോപി പറഞ്ഞു.