‘ആശുപത്രിയിൽ പോയി കാണാൻ ശ്രമിച്ചെങ്കിലും നടന്നില്ല, അതൊരു വേദനയായി നിൽക്കുന്നു’; മുൻ ആഭ്യന്തരമന്ത്രി കോടിയേരി ബാലകൃഷ്ണന്റെ നിര്യാണത്തിൽ സുരേഷ് ഗോപി

മുൻ ആഭ്യന്തരമന്ത്രിയും സി പി എം നേതാവുമായ കോടിയേരി ബാലകൃഷ്ണന്റെ വേർപാടിൽ അനുശോചനം രേഖപ്പെടുത്തി നടൻ സുരേഷ് ഗോപി. വേദനിപ്പിക്കുന്ന ദേഹവിയോഗമാണെന്നും കോടിയേരി ബാലകൃഷ്ണൻ ഇനി നമ്മളോടൊപ്പം ഇല്ലെന്നും പറഞ്ഞുകൊണ്ടാണ് സുരേഷ് ഗോപി തന്റെ ദുഃഖം അറിയിക്കുന്നത്. ഫേസ്ബുക്ക് ലൈവിൽ എത്തിയാണ് കോടിയേരി ബാലകൃഷ്ണന്റെ നിര്യാണത്തിലുള്ള വേദനയും ദുഃഖവും സുരേഷ് ഗോപി അറിയിച്ചത്. ചെന്നൈയിൽ പോയി അദ്ദേഹത്തെ കാണാനുള്ള ശ്രമം നടത്തിയെങ്കിലും അതിന് സാധിച്ചില്ല എന്ന വേദന ബാക്കി നിൽക്കുന്നുവെന്ന് അദ്ദേഹം പറഞ്ഞു.

കേരളത്തിലെ അടിത്തട്ട് പൊലീസ് സംവിധാനത്തിൽ വിപ്ലവകരമായ മാറ്റങ്ങൾ കൊണ്ടുവന്ന ഒരു ആഭ്യന്തരമന്ത്രി ആയിരുന്നു കോടിയേരി ബാലകൃഷ്ണനെന്ന് സുരേഷ് ഗോപി പറഞ്ഞു. പ്രിയപ്പെട്ട കോടിയേരി ബാലകൃഷ്ണൻ, അദ്ദേഹം ഇനി നമ്മളോടൊപ്പം ഇല്ല. കേരളത്തിലെ പൊലീസ് സംവിധാനത്തിൽ, കേരളത്തിലെ അടിത്തട്ട് പൊലീസ് സംവിധാനത്തിൽ വളരെ വിപ്ലവകരമായ മാറ്റങ്ങൾ കൊണ്ടുവന്ന പൂർവ ആഭ്യന്തരമന്ത്രി എന്ന നിലയ്ക്കും നിരവധി തവണ എം എൽ എ ആയി നിയമസഭയിൽ എത്തിയ ജനപ്രതിനിധി എന്ന നിലയ്ക്കും ജനങ്ങൾക്ക് വേണ്ടി പ്രവർത്തിച്ച വ്യക്തി ആയിരുന്നു അദ്ദേഹമെന്നും സുരേഷ് ഗോപി പറഞ്ഞു.

ഏതാണ്ട് 25 വർഷമായി അദ്ദേഹവുമായി വ്യക്തിപരമായ ബന്ധം കാത്തുസൂക്ഷിക്കുന്നു. തീർത്തും വ്യക്തിപരമായ ബന്ധത്തിൽ നിന്നും തനിക്ക് മനസിലായിട്ടുള്ള കാര്യം വളരെ സരസനായ മനുഷ്യനാണ് അദ്ദേഹമെന്നതാണ്. എന്റെ സുഹൃത്തുക്കൾ കൂടിയായ ഇദ്ദേഹത്തിന്റെ മക്കൾ, സഹധർമ്മിണി എന്നിവരുടെ വേദനയിൽ പങ്കുചേരുന്നെന്നും മലയാളികളുടെ വേദനയിലും പങ്കുചേരുന്നെന്നും സുരേഷ് ഗോപി പറഞ്ഞു. അദ്ദേഹത്തിന്റെ വ്യക്തിത്വത്തിനും ഓർമകൾക്കും മുമ്പിൽ കണ്ണീരഞ്ജലിയെന്നും സുരേഷ് ഗോപി പറഞ്ഞു.