‘പാപ്പൻ’ ഏറ്റെടുത്ത് പ്രേക്ഷകർ; സുരേഷ് ഗോപി ആറാടുകയാണ്, താരത്തെ ആലിംഗനം ചെയ്ത് മാധ്യമപ്രവർത്തക – ആദ്യദിനം മികച്ച റിപ്പോർട്ടുകളുമായി പാപ്പൻ

നീണ്ട ഇടവേളയ്ക്ക് ശേഷം സംവിധായകൻ ജോഷിക്കൊപ്പം സുരേഷ് ഗോപി നായകനായി എത്തിയ ചിത്രമാണ് പാപ്പൻ. കഴിഞ്ഞദിവസമാണ് പാപ്പൻ തിയറ്ററുകളിൽ എത്തിയത്. ചിത്രത്തിന് മികച്ച പ്രതികരണമാണ് പ്രേക്ഷകരിൽ നിന്ന് ലഭിച്ചത്. ചിത്രം ഫാമിലി ആക്ഷൻ ത്രില്ലറാണെന്നും മാസും ക്ലാസും ചേർന്ന സിനിമയാണെന്നും ചിത്രത്തിൽ സുരേഷ് ഗോപി ആറാടുകയാണെന്നുമാണ് പ്രേക്ഷകർ പ്രതികരിച്ചത്. ത്രില്ലിംഗ് പടമാണെന്നും ക്ലൈമാക്സ് ഒക്കെ നല്ല രീതിയിൽ എടുത്തിട്ടുണ്ടെന്നും എന്തു സംഭവിക്കും എന്നൊരു ആകാംക്ഷ നല്ല രീതിയിൽ നിലനിർത്തുന്നുണ്ടെന്നും മറ്റൊരു പ്രേക്ഷകൻ അഭിപ്രായപ്പെട്ടു. തിയറ്റർ എക്സ്പീരിയൻസ് ആണ് പടമെന്നും കണ്ടിറങ്ങിയവർ പറഞ്ഞു. ട്രയിലറിലും ടീസറിലും കണ്ട ക്യൂരിയോസിറ്റി നിലനിർത്തുന്ന പടമാണെന്നും നന്നായി ഇഷ്ടപ്പെട്ടെന്നും കണ്ടിറങ്ങിയ പ്രേക്ഷക പറഞ്ഞു.

അതേസമയം, റിലീസ് ദിവസം തിയറ്ററിലേക്ക് സുരേഷ് ഗോപിയും എത്തി. സിനിമ കണ്ടിറങ്ങിയ മാധ്യമപ്രവർത്തകയ്ക്ക് സുരേഷ് ഗോപിയെ ഒന്ന് ഹഗ് ചെയ്യണമെന്ന് തോന്നി. സഹപ്രവർത്തകയോട് ആഗ്രഹം പറഞ്ഞു. സഹപ്രവർത്തക ഇക്കാര്യം വിളിച്ചു പറഞ്ഞപ്പോൾ സുരേഷ് ഗോപിക്ക് ഒപ്പം ഭാര്യ രാധികയും സ്നേഹപൂർവം മാധ്യമപ്രവർത്തകയെ മുന്നോട്ട് വിളിച്ചു. മാധ്യമപ്രവർത്തക ഓടിവന്ന് സുരേഷ് ഗോപിയെ കെട്ടിപ്പിടിക്കുകയും ചെയ്തു.

പാപ്പൻ റിലീസ് ദിവസം തന്നെ രണ്ടുകോടിക്ക് മുകളിൽ കളക്ഷൻ നേടിയിട്ടുണ്ടെന്നാണ് സ്ഥിരീകരിക്കാത്ത റിപ്പോർട്ടുകൾ. പാപ്പന്റെ വിജയത്തിൽ സന്തോഷമാണെന്ന് പറഞ്ഞ സുരേഷ് ഗോപി സിനിമയെ മോശമാക്കാൻ ശ്രമിക്കുന്നത് ചില മതഭ്രാന്തൻമാർ ആണെന്നും പറഞ്ഞു. കലയെ സ്നേഹിക്കുന്ന ഹൃദയങ്ങൾക്ക് മതവും രാഷ്‌ട്രീയവും ഇല്ലെന്നും സുരേഷ് ഗോപി മാധ്യമപ്രവർത്തകരോട് സംസാരിക്കവെ വ്യക്തമാക്കി. ജനങ്ങൾ സിനിമ കാണുന്നത് രാഷ്ട്രീയം നോക്കിയല്ലെന്നും സിനിമയുടെ കളക്ഷൻ വരുമ്പോൾ അത് മനസിലാകുമെന്നും സുരേഷ് ഗോപി വ്യക്തമാക്കി.