60 വയസുള്ള ടോം ക്രൂസിന്റെ ‘യങ് ലുക്കി’നെ പുകഴ്ത്തി പോസ്‌റ്റ്; കമന്റ് ബോക്സിൽ ‘മമ്മൂട്ടി’യുടെ പടം കൊണ്ട് ആറാട്ട് നടത്തി ആരാധകർ

സോഷ്യൽ മീഡിയയിൽ കഴിഞ്ഞദിവസം ആയിരുന്നു ഹോളിവുഡ് താരം ടോം ക്രൂസിന്റെ ഒരു ഫോട്ടോ വൈറലായത്. ‘ടോം ക്രൂസ് അദ്ദേഹത്തിന്റെ അറുപതാം വയസിൽ’ എന്ന അടിക്കുറിപ്പോടെയാണ് യങ് ലുക്കിലുള്ള അദ്ദേഹത്തിന്റെ ചിത്രം സിനിമ ഇൻ മീംമ്സ് എന്ന ഫേസ്ബുക്ക് പേജ് പങ്കുവെച്ചത്. അറുപതു വയസായിട്ടും ടോം ക്രൂസിന്റെ യങ് ലുക്കിനെ വാഴ്ത്തിക്കൊണ്ടുള്ളത് ആയിരുന്നു പോസ്റ്റ്. എട്ടുലക്ഷത്തിൽ അധികം ആളുകളാണ് പോസ്റ്റിന് ലൈക്കുമായി എത്തിയത്. എന്നാൽ, നിമിഷനേരം കൊണ്ട് ആ പോസ്റ്റ് മൊത്തത്തിൽ ഒരു മലയാളിമയമായി മാറി.

കമന്റ് ബോക്സിൽ മമ്മൂട്ടിയുടെ ചിത്രവുമായി ആരാധകർ എത്തിയതോടെയാണ് ഇത്. ‘മമ്മൂട്ടി, ഇന്ത്യൻ നടൻ, 71 വയസ്’ എന്ന കുറിപ്പുമായി മമ്മൂട്ടിയുടെ ചിത്രങ്ങൾ ആരാധകർ കമന്റ് ബോക്സിൽ പങ്കുവെക്കുകയായിരുന്നു. മമ്മൂട്ടിയുടെ ഏറ്റവും അടുത്തകാലത്തുള്ള ചിത്രങ്ങൾ പങ്കുവെച്ചാണ് ആരാധകർ ടോം ക്രൂസിന്റെ ചിത്രത്തിന് ചെക്ക് വെച്ചത്. അറുപതാം വയസിൽ ടോം ക്രൂസ് അങ്ങനെയാണെങ്കിൽ എഴുപത് വയസായ ഞങ്ങളുടെ മമ്മൂട്ടിയെ നോക്കൂ എന്ന രീതിയിലാണ് കമന്റുകൾ.

മലയാളികൾ കമന്റ് ചെയ്യാൻ തിരഞ്ഞെടുത്ത ചിത്രങ്ങളിൽ ഏറെയും 70 വയസിനു ശേഷമുള്ള മമ്മൂട്ടിയുടെ നല്ല സ്‌റ്റൈലൻ ചിത്രങ്ങളാണ്. മമ്മൂട്ടിയുടെ ലുക്ക് ഇതിനുമുമ്പും ചർച്ചയായിട്ടുണ്ട്. ‘വയസ് ഒരു നമ്പർ മാത്രമാണ്’ എന്ന രീതിയിൽ ഇതിനുമുമ്പും മമ്മൂട്ടിയുടെ ചിത്രങ്ങൾ വൈറലായിട്ടുണ്ട്. ഇതിനകം ടോം ക്രൂസിന്റെ ചിത്രത്തിന് 27000ത്തിൽ അധികം കമന്റുകളും 24000ത്തിൽ അധികം ഷെയറുകളും ലഭിച്ചിട്ടുണ്ട്. കമന്റ് ബോക്സിൽ പലരും അവരുടെ മാതാപിതാക്കളുടെ ചിത്രങ്ങൾ പങ്കുവെച്ചപ്പോൾ മറ്റുചിലർ അവരുടെ സ്വന്തം ചിത്രങ്ങളും പങ്കുവെച്ചിട്ടുണ്ട്. ചിലർ മോഹൻലാലിന്റെ ചിത്രവും കമന്റ് ബോക്സിൽ പങ്കുവെച്ചിട്ടുണ്ട്.