‘ഫസ്റ്റ് ഡേ ഓഡിയൻസിന്റെ കൂടെ ‘തല്ലുമാല’ കാണും, വര്‍ക്ക് മുഴുവന്‍ കഴിഞ്ഞ ‘തല്ലുമാല’ കല്യാണി മാത്രമേ കണ്ടിട്ടുള്ളൂ’: തുറന്നുപറഞ്ഞ് ടൊവിനോ തോമസ്

യുവതാരങ്ങളായ ടൊവിനോ തോമസും കല്യാണി പ്രിയദർശനും കേന്ദ്രകഥാപാത്രങ്ങളായി എത്തുന്ന ‘തല്ലുമാല’ റിലീസിന് ഒരുങ്ങുകയാണ്. ഖാലിദ് റഹ്മാൻ സംവിധാനം ചെയ്യുന ചിത്രത്തിനായി സിനിമാപ്രേമികൾ പ്രതീക്ഷയോടെയും ആകാംക്ഷയോടെയുമാണ് കാത്തിരിക്കുന്നത്. ചിത്രത്തിന്റെ ട്രയിലറും ചിത്രത്തിലെ പാട്ടുകളും ഇതിനോടകം തന്നെ സോഷ്യൽമീഡിയയിൽ തരംഗമായി മാറിക്കഴിഞ്ഞു. അതേസമയം, എല്ലാ വർക്കുകളും പൂർത്തിയാക്കിയതിനു ശേഷം സിനിമ താനിതു വരെയും പൂർണമായും കണ്ടിട്ടില്ലെന്ന് വ്യക്തമാക്കുകയാണ് ടൊവിനോ തോമസ്. സിനിമ റിലീസ് ചെയ്ത് ഫസ്റ്റ് ഡേ ഓഡിയൻസിന് ഒപ്പം സിനിമ പൂർണമായും കാണാൻ വേണ്ടിയിരിക്കുകയാണ് താനെന്നും ടൊവിനോ വ്യക്തമാക്കി.

ഹിറ്റ് എഫ് എമ്മിന് നൽകിയ അഭിമുഖത്തിലാണ് ടൊവിനോ ഇങ്ങനെ പറഞ്ഞത്. കല്യാണി മാത്രമാണ് മുഴുവൻ വർക്കുകളും കഴിഞ്ഞ സിനിമ മുഴുവനായും കണ്ടതെന്നും ടൊവിനോ വ്യക്തമാക്കി. ഏകദേശം ട്രയിലറിൽ കാണിച്ചിരിക്കുന്നത് പോലെ തന്നെയാണ് സിനിമയെന്നും താരം വ്യക്തമാക്കി. ‘വര്‍ക്ക് മുഴുവന്‍ കഴിഞ്ഞ് ഞാന്‍ ഇപ്പോഴും ഈ സിനിമ കണ്ടിട്ടില്ല. കല്യാണി മാത്രമേ കണ്ടിട്ടുള്ളൂ. കല്യാണി കണ്ടപ്പോഴും എന്നെ വിളിച്ചിരുന്നു. ഞാന്‍ മനപ്പൂര്‍വം കാണാത്തതാണ്. മിക്കപ്പോഴും നമ്മള്‍ ചെയ്തിട്ടുള്ള നല്ല സിനിമകള്‍ നമുക്കല്ല ആസ്വദിക്കാന്‍ പറ്റുക. പ്രേക്ഷകര്‍ക്ക് മാത്രമാണ്. ഷൂട്ടിങ്ങിന്റെ കാര്യമെല്ലാം ഓര്‍ത്തിട്ട് നമുക്ക് നല്ല ബുദ്ധിമുട്ടായിരിക്കും.’ – ടൊവിനോ പറഞ്ഞു.

തല്ലുമാലയുടെ കഥ പറഞ്ഞിരിക്കുന്നത് ഒരു ലീനിയർ പാറ്റേണിൽ അല്ലെന്നും അതുകൊണ്ട് ഫ്രഷ് ആയിട്ട് ഒരു സിനിമ കാണുന്നതു പോലെ ‘തല്ലുമാല’ എൻജോയ് ചെയ്യാൻ പറ്റുമെന്ന് തനിക്ക് ഉറപ്പുണ്ടെന്നും ടൊവിനോ പറഞ്ഞു. ഓഡിയന്‍സിന്റെ കൂടെ ഫസ്റ്റ് ഡേ ആണ് ഈ സിനിമ കാണാന്‍ പോകുന്നതെന്നും എല്ലാ സിനിമയും അങ്ങനെയാണ് താന്‍ കാണാറുള്ളതെന്നും താരം പറഞ്ഞു. കഴിവതും ഫസ്റ്റ് ഡേ പോയി കാണാന്‍ നോക്കാറുണ്ടെന്നും ടൊവിനോ പറഞ്ഞു. ഓഗസ്റ്റ് 12നാണ് തല്ലുമാല തിയറ്ററുകളിലേക്ക് എത്തുന്നത്. ക്ലീന്‍ യു/എ സര്‍ട്ടിഫിക്കറ്റ് ആണ് ചിത്രത്തിന് ലഭിച്ചിരിക്കുന്നത്. മണവാളൻ വസിം എന്ന കഥാപാത്രമായാണ് ചിത്രത്തിൽ ടൊവിനോ എത്തുന്നത്. ലുക്മാന്‍, ചെമ്പന്‍ വിനോദ് ജോസ്, ജോണി ആന്റണി, ഓസ്റ്റിന്‍, അസിം ജമാല്‍ എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്.