‘മേപ്പടിയാൻ എന്ന സിനിമയിൽ എന്താണ് ഇത്ര പ്രശ്നം ? സേവാഭാരതി ആംബുലൻസിൽ പോയതാണോ ?’ – തുറന്നു ചോദിച്ച് ഉണ്ണി മുകുന്ദൻ

നടൻ ഉണ്ണി മുകുന്ദൻ നിർമാതാവ് ആയി എത്തിയ ആദ്യചിത്രമായിരുന്നു മേപ്പടിയാൻ. ജനുവരിയിൽ റിലീസ് ചെയ്ത ചിത്രത്തിന്റെ സംവിധാനം വിഷ്ണു മോഹൻ ആയിരുന്നു. എന്നാൽ, ചിത്രം റിലീസ് ആയതിനു പിന്നാലെ ചില അനാവശ്യ വിവാദങ്ങൾ ചിത്രത്തിന് ബാധിച്ചു. ഇതിനെക്കുറിച്ച് തുറന്നു സംസാരിക്കുകയാണ് ഉണ്ണി മുകുന്ദൻ. ജി‌ഞ്ചർ മീഡിയയ്ക്ക് നൽകിയ അഭിമുഖത്തിലാണ് ഉണ്ണി മുകുന്ദൻ ഇക്കാര്യങ്ങളെക്കുറിച്ച് വ്യക്തമായി സംസാരിച്ചത്.

തനിക്ക് ഇഷ്ടപ്പെടാത്ത എത്രയോ സോ കോൾഡ് ഹിന്ദു കഥാപാത്രങ്ങൾ താൻ വേണ്ടെന്ന് വെച്ചിട്ടുണ്ടെന്നും അതുപോലെ ക്രിസ്ത്യൻ കഥാപാത്രങ്ങളും വേണ്ടെന്ന് വെച്ചിട്ടുണ്ടെന്നും ഉണ്ണി മുകുന്ദൻ പറഞ്ഞു. അതുപോലെ നിരവധി ക്രിസ്ത്യൻ കഥാപാത്രങ്ങളും ചെയ്തിട്ടുണ്ട്. എന്നാൽ, അത്തരമൊരു സ്പോട്ടിൽ തന്നെ വെക്കരുതെന്നും അതൊട്ടും ഫെയർ അല്ലെന്നും ഉണ്ണി മുകുന്ദൻ പറഞ്ഞു. തന്നെ പോലെ തന്നെയാണ് മലയാളത്തിലെ എല്ലാ നടന്മാരും. അവരുടെ അടുത്തൊന്നും ചോദിക്കാത്ത ചോദ്യം എന്തിനാണ് തന്നോട് മാത്രം ചോദിക്കുന്നതെന്നും ഉണ്ണി മുകുന്ദൻ ചോദിച്ചു.

മേപ്പടിയാൻ എന്ന സിനിമയിൽ എന്താണ് പ്രശ്നമെന്നും ഉണ്ണി മുകുന്ദൻ ചോദിച്ചു. സേവാഭാരതി ആംബുലൻസിൽ കൊണ്ടു പോയതാണോ. എങ്കിൽ ആ സിനിമയിൽ ആ വണ്ടിയുടെ റെലവൻസ് നോക്കൂ. അതുവെച്ച് ഒരു പൊളിറ്റിക്കൽ സ്റ്റേറ്റ്മെന്റും പറയുന്നില്ല. താൻ അമ്പലത്തിൽ കയറി കുറി തൊട്ടതാണ് പ്രശ്നമെങ്കിൽ ഇനിയും പത്തു സിനിമയിൽ അമ്പലത്തിലും കയറും കുറിയും തൊടും. അതിൽ എന്തു വന്നാലും പ്രശ്നമില്ല. അതുപോലെ ഷെഫീഖിന്റെ സന്തോഷത്തിൽ നിസ്കരിക്കുന്നുമുണ്ടെന്നും ഉണ്ണി മുകുന്ദൻ പറഞ്ഞു.