മുഖ്യമന്ത്രി പിണറായി വിജയനൊപ്പം പ്രഭാതഭക്ഷണം കഴിച്ച് ഉണ്ണി മുകുന്ദൻ; ‘മേപ്പടിയാൻ’ കാണുമെന്ന് മുഖ്യന്ത്രിയുടെ ഉറപ്പ്

മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തി നടൻ ഉണ്ണി മുകുന്ദൻ. മുഖ്യമന്ത്രിയുടെ ഓഫീസിൽ എത്തിയാണ് ഉണ്ണി മുകുന്ദൻ അദ്ദേഹത്തെ കണ്ടത്. മാത്രമല്ല പ്രഭാത ഭക്ഷണവും മുഖ്യമന്ത്രിക്ക് ഒപ്പമിരുന്ന് കഴിച്ചു. സോഷ്യൽ മീഡിയയിൽ പങ്കുവെച്ച കുറിപ്പിൽ ഉണ്ണി മുകുന്ദൻ തന്നെയാണ് ഇക്കാര്യം അറിയിച്ചത്. കേരളത്തിന്റെ മുഖ്യമന്ത്രിയെ കാണാൻ സാധിച്ചത് വളരെ അഭിമാനകരമായ കാര്യമാണെന്ന് ഉണ്ണി മുകുന്ദൻ കുറിച്ചു. സമയം കിട്ടുമ്പോൾ മേപ്പടിയാൻ കാണാമെന്ന് മുഖ്യമന്ത്രി സമ്മതിച്ചതായും ഉണ്ണി മുകുന്ദൻ വ്യക്തമാക്കി.

ഉണ്ണി മുകുന്ദൻ സോഷ്യൽ മീഡിയയിൽ പങ്കുവെച്ച കുറിപ്പ് ഇങ്ങനെ, ‘കേരള സംസ്ഥാന മുഖ്യമന്ത്രി പിണറായി വിജയൻ സാറുമായി കൂടിക്കാഴ്ച നടത്താൻ കഴിഞ്ഞത് ഒരു ബഹുമതിയാണ്. താങ്കളുടെ തിരക്കേറിയ ഷെഡ്യൂളിന് ഇടയിലും സമയം മാറ്റിവെച്ചതിന് ഒരുപാട് നന്ദി. കൂടാതെ, ഇന്ന് രാവിലെ പ്രഭാതഭക്ഷണം കഴിക്കാൻ താങ്കളുടെ തൊട്ടരികിൽ ഇരിപ്പിടം നൽകിയതിനും നന്ദി. ജീവിതത്തിലെ ഏറ്റവും പ്രിയപ്പെട്ട ഓർമകളിൽ ഒന്നായിരിക്കും ഇത്. ഈ അവിസ്മരണീയ ദിനം സമ്മാനിച്ചതിന് ജോൺ ബ്രിട്ടാസ് ഏട്ടന് ഒത്തിരി നന്ദി. നമ്മുടെ സംസ്ഥാനത്തിന് അനുകൂലമായി പ്രവർത്തിക്കുന്ന എന്തിനും ഏതിനും ഭാഗമാകാൻ പൂർണഹൃദയത്തോടെ സദാ സന്നദ്ധനായിരിക്കും. സമയം ലഭിക്കുന്നതിന് അനുസരിച്ച് മേപ്പടിയാൻ സിനിമ കാണാമെന്ന് സമ്മതിച്ചതാണ് ഇതിലെ ഏറ്റവും നല്ല ഭാഗം. അതിൽ ഞാൻ വളരെ സന്തോഷവാനാണ്. താങ്കൾക്ക് മികച്ച ആരോഗ്യവും കൂടുതൽ ചലനാത്മകമായ പ്രവർത്തന സമയവും നേരുന്നു! ബഹുമാനവും ആദരവും, ഉണ്ണിമുകുന്ദൻ.’- ക്യാപ്റ്റൻ എന്ന ഹാഷ് ടാഗോടെയാണ് ഉണ്ണി മുകുന്ദൻ കുറിപ്പ് അവസാനിപ്പിക്കുന്നത്.

മുഖ്യമന്ത്രിയുമായി കൂടിക്കാഴ്ച നടത്തിയതിന് അനുകൂലവും പ്രതികൂലവുമായി നിരവധി കമന്റുകളാണ് ഉണ്ണി മുകുന്ദന്റെ പങ്കുവെച്ച കുറിപ്പിന്റ് കമന്റ് ബോക്സിൽ എത്തിയിരിക്കുന്നത്. അതേസമയം, ഉണ്ണി മുകുന്ദൻ നായകനായി എത്തിയ മേപ്പടിയാൻ തിയറ്ററുകളിൽ പ്രദർശനം തുടരുകയാണ്.