‘ഉണ്ണിയേട്ടനെ പൊലീസ് പിടിച്ചോ’ എന്ന് ആരാധകൻ; കലക്കൻ മറുപടിയുമായി ഉണ്ണി മുകുന്ദൻ

ഇൻസ്റ്റഗ്രാം റീൽസ് ചെയ്ത് സാമൂഹ്യമാധ്യമങ്ങളിലൂടെ വൈറലായ വിനീത് എന്ന യുവാവ് പീഡനക്കേസിൽ അറസ്റ്റിലായത് കഴിഞ്ഞദിവസം ആയിരുന്നു. ഇയാൾ പ്രധാനമായും റീൽസ് ചെയ്തിരുന്നത് നടൻ ഉണ്ണി മുകുന്ദന്റെ സിനിമയിലെ കഥാപാത്രങ്ങളെ ആയിരുന്നു. കഴിഞ്ഞദിവസം യുവാവ് അറസ്റ്റിലായതോടെ ഇയാളുടെ മുൻകാലത്തെ റീൽസ് വീഡിയോകൾ സാമൂഹ്യമാധ്യമങ്ങളിൽ വൈറലായി. ഇതെല്ലാം കണ്ട ചില വിരുതൻമാർ ഉണ്ണി മുകുന്ദന്റെ സോഷ്യൽ മീഡിയ പേജിലെ പോസ്റ്റുകൾക്ക് താഴെ കമന്റുമായി എത്തി.

‘ഉണ്ണിയേട്ടനെ പൊലീസ് പിടിച്ചോ? പോസ്റ്റ് കണ്ടു’ എന്നായിരുന്നു ഒരാൾ ഉണ്ണി മുകുന്ദന്റെ ഒരു സോഷ്യൽ മീഡിയ പോസ്റ്റിനു താഴെ കുറിച്ചത്. കമന്റിന് ഉടൻ തന്നെ ഉണ്ണി മുകുന്ദൻ നല്ല തഗ് മറുപടിയും നൽകി. ‘ഞാൻ ഇപ്പോൾ ജയിലിലാണ്. ഇവിടെ ഇപ്പോ ഫ്രീ വൈഫൈ ആണ്. നീയും വായോ’ എന്നായിരുന്നു കമന്റ്. ഉണ്ണി മുകുന്ദന്റെ ഈ തഗ് മറുപടി ഏതായാലും ആരാധകർ ഏറ്റെടുത്തു. ‘ഉണ്ണിയേട്ടൻ റോക്ക്സ്’, ‘ഉണ്ണിയേട്ടൻ കില്ലാടി’ തുടങ്ങി നിരവധി രസകരമായ കമന്റുകളാണ് ഉണ്ണി മുകന്ദന്റെ തഗ് റിപ്ലൈക്ക് ലഭിച്ചിരിക്കുന്നത്. 3000ത്തിൽ അധികം ലൈക്കുകളും ലഭിച്ചിട്ടുണ്ട്.

റീൽസ് വീഡിയോകൾ ചെയ്യുന്നതിന്റെ ടിപ്സുകൾ പഠിപ്പിക്കാമെന്ന് പറഞ്ഞായിരുന്നു കഴിഞ്ഞദിവസം അറസ്റ്റിലായ യുവാവ് പെൺകുട്ടികളുമായി ബന്ധം സ്ഥാപിച്ചിരുന്നത്. തുടർന്ന് പെൺകുട്ടികളെ ലോഡ്ജിലേക്ക് വിളിച്ചുവരുത്തി പീഡിപ്പിച്ചെന്ന കേസിലാണ് ഇയാൾ ഇപ്പോൾ അറസ്റ്റിലായിരിക്കുന്നത്. കൊല്ലം സ്വദേശിനി നൽകിയ പരാതിയിൽ ചിറയിൻകീഴ് വെള്ളല്ലൂർ കീഴ്പേരൂർ സ്വദേശി വിനീതിനെയാണ് അറസ്റ്റ് ചെയ്തത്.