മേജർ രവി ചിത്രത്തിൽ നായകനായി ഉണ്ണി മുകുന്ദൻ; ഇന്തോ – ചൈന സംഘര്‍ഷം സിനിമയാകുന്നു

വീണ്ടും ഒരു സൈനിക ചിത്രവുമായി മേജർ രവി എത്തുന്നു. ഇത്തവണ ഉണ്ണി മുകുന്ദൻ ആണ് നായകൻ. ഇന്തോ – ചൈന പട്ടാളക്കാരുടെ സംഘർഷമാണ് ചിത്രത്തിന് ഇതിവൃത്തം. കാൻ ചാനൽ മീഡിയ ആണ് ഇക്കാര്യം റിപ്പോർട്ട് ചെയ്തിരിക്കുന്നത്. 2020 ജൂൺ മാസത്തിൽ ഗാൽവൻ താഴ്വരയിൽ ഉണ്ടായ ഇന്തോ – ചൈന പട്ടാളക്കാരുടെ സംഘർഷമാണ് സിനിമയുടെ ഇതിവൃത്തം. ഒരു പാൻ ഇന്ത്യൻ ചലച്ചിത്രമായാണ് ഇത് ഒരുങ്ങുന്നത് എന്നാണ് റിപ്പോർട്ടുകൾ.

ഉണ്ണി മുകുന്ദൻ നായകനായി അഭിനയിച്ച് അവസാനം പുറത്തിറങ്ങിയ ചിത്രം ‘മേപ്പടിയാൻ’ ആണ്. ഈ ചിത്രത്തിൽ അഭിഭാഷകന്റെ വേഷത്തിൽ ഉണ്ണി മുകുന്ദൻ എത്തിയിരുന്നു. പുനർജനി, കീർത്തിചക്ര, മിഷൻ 90 ഡേയ്സ്, കുരുക്ഷേത്ര, തൂഫാൻ, കാണ്ഡഹാർ, കർമയോദ്ധ, ഒരു യാത്രയിൽ, പിക്കറ്റ് 43, 1971 ബിയോണ്ട് ബോർഡേഴ്സ്, എസ് ജ് 253 എന്നിവയാണ് ഇതിനുമുമ്പ് മേജർ രവി സംവിധാനം ചെയ്ത് പുറത്തിറക്കിയ ചിത്രങ്ങൾ.

മേപ്പടിയാനിൽ ജയകൃഷ്ണൻ എന്ന നാട്ടിൻപുറത്തുകാരനായിട്ടാണ് ഉണ്ണി മുകുന്ദൻ അഭിനയിച്ചത്. ജനുവരി 14ന് ആയിരുന്നു മേപ്പടിയാൻ തിയറ്ററുകളിൽ റിലീസ് ചെയ്തത്. സംവിധായകൻ വിഷ്ണു മോഹൻ രചനയും സംവിധാനവും നിർവഹിച്ച ചിത്രം ഉണ്ണി മുകുന്ദൻ ഫിലിംസിന്റെ ബാനറിൽ ഉണ്ണി മുകുന്ദൻ തന്നെയാണ് നിർമിച്ചിരിക്കുന്നത്. അഞ്ജു കുര്യൻ ആയിരുന്നു ചിത്രത്തിൽ നായികയായി എത്തിയത്.