‘മാധ്യമപ്രവർത്തകയായ സഹോദരിക്ക് എന്റെ ഭാഷാപ്രയോഗത്തിൽ വിഷമം നേരിട്ടതിൽ ഞാൻ ക്ഷമ ചോദിക്കുന്നു’; വിനായകൻ

ഒരുത്തീ സിനിമയുടെ പ്രമോഷനിടെ വിവാദപരാമർശം നടത്തിയതിൽ ക്ഷമ ചോദിച്ച് നടൻ വിനായകൻ. മാധ്യമപ്രവർത്തകയ്ക്ക് നേരെ നടത്തിയ മോശം പരാമർശത്തിലാണ് വിനായകൻ ക്ഷമ ചോദിച്ചത്. ‘നമസ്കാരം , ഒരുത്തി സിനിമയുടെ പ്രചരണാർത്ഥം നടന്ന പത്രസമ്മേളനത്തിനിടെ ചില സംസാരത്തിൽ ഞാൻ ഉദ്ദേശിക്കാത്ത മാനത്തിൽ മാധ്യമ പ്രവർത്തകയായ ഒരു സഹോദരിക്ക് എന്റെ ഭാഷാപ്രയോഗത്തിന്മേൽ [ഒട്ടും വ്യക്തിപരമായിരുന്നില്ല] വിഷമം നേരിട്ടതിൽ ഞാൻ ക്ഷമ ചോദിക്കുന്നു. വിനായകൻ.’ – എന്നാണ് സോഷ്യൽമീഡിയയിൽ വിനായകൻ കുറിച്ചത്. സിനിമ പ്രമോഷന് എത്തിയ വിനായകനോട് മീടുവിനെക്കുറിച്ചും മറ്റും മാധ്യമപ്രവർത്തകർ ചോദ്യങ്ങൾ ചോദിച്ചത് ആയിരുന്നു പ്രകോപനങ്ങൾക്ക് കാരണമായത്.

ഒരുത്തീ സിനിമയുടെ പ്രമോഷനിടെ സിനിമയെക്കുറിച്ചുള്ള ചോദ്യങ്ങൾ ചോദിക്കുന്നതിനിടെ ആയിരുന്നു മാധ്യമപ്രവർത്തകർ മീടു വിവാദത്തെക്കുറിച്ചും മറ്റും ചോദിച്ചത്. അപ്പോൾ തനിക്ക് പത്തു സ്ത്രീകളുമായി ശാരീരികബന്ധം ഉണ്ടായിട്ടുണ്ടെന്നും മീടു എന്താണ് എന്ന് തനിക്കറിയില്ലെന്നും ആയിരുന്നു വിനായകൻ നൽകിയ മറുപടി. ഇതാണ് വിവാദമായത്. ‘പെണ്ണിനെ കയറി പിടിച്ചോ. അതാണോ? ഞാൻ ചോദിക്കട്ടെ ഒരു പെണ്ണുമായും എനിക്ക് ശാരീരിക ബന്ധത്തിൽ ഏർപ്പെടണം എന്നുണ്ടെങ്കിൽ എന്ത് ചെയ്യും. എന്റെ ലൈഫിൽ ഞാൻ പത്ത് സ്ത്രീകളുമായി ശാരീരിക ബന്ധത്തിൽ ഏർപ്പെട്ടിട്ടുണ്ട്. ആ പത്ത് സ്ത്രീകളോടും ഞാൻ ആണ് എന്നോടൊപ്പം ഫിസിക്കൽ റിലേഷൻഷിപ്പിൽ ഏർപ്പെടുമോ എന്ന് അങ്ങോട്ട് ചോദിച്ചത്. അതാണ് നിങ്ങൾ പറയുന്ന മീ ടു എങ്കിൽ ഞാൻ ഇനിയും ചോദിക്കും. എന്നോട് ഒരു പെണ്ണും ഇങ്ങോട്ട് വന്നു ചോദിച്ചിട്ടില്ല’ – എന്നായിരുന്നു വിനായകൻ പറഞ്ഞത്. തുടർന്ന് വാർത്താസമ്മേളനത്തിൽ പങ്കെടുക്കുകയായിരുന്ന ഒരു മാധ്യമപ്രവർത്തകയെ ചൂണ്ടിക്കാട്ടി ‘തനിക്ക് ആ പെണ്ണുമായി സെക്സ് ചെയ്യണമെന്ന് തോന്നിയാൽ ഞാൻ ഇനിയും ചോദിക്കും. ആ പെണ്ണെന്ത് പറയും, മാന്യമായിട്ട് നോ എന്ന് പറയും. എന്നോട് ഇതുവരെ ഒരു പെണ്ണും വന്ന് ചോദിച്ചിട്ടില്ല. ഒരു പെണ്ണിന്റെ വ്യാഖ്യാനമെന്താണെന്ന് അറിയാമോ?’ എന്നും വിനായകൻ പറഞ്ഞിരുന്നു. ഈ പരാമർശത്തിൽ ആണ് വിനായകൻ ഇപ്പോൾ ക്ഷമ ചോദിച്ചിരിക്കുന്നത്.

വിനായകന്റെ പരാമർശങ്ങളെക്കുറിച്ച് സോഷ്യൽമീഡിയയിൽ വലിയ ചർച്ചകളും വിമർശനങ്ങളും നടക്കുന്നതിന് ഇടയിലാണ് വിനായകന്റെ ക്ഷമ പറച്ചിൽ. പത്തു സ്ത്രീകളുമായി തനിക്ക് ശാരീരിക ബന്ധം ഉണ്ടായിട്ടുണ്ടെന്ന് പറഞ്ഞ വിനായകൻ എന്താണ് മീ ടു എന്ന് ചോദിക്കുകയും തനിക്ക് അത് അറിയില്ലെന്ന് പറയുകയും ചെയ്തു. ഒരുത്തീ സിനിമയുടെ പ്രമോഷനുമായി ബന്ധപ്പെട്ട് നടത്തിയ വാർത്താസമ്മേളനം ആയിരുന്നതിനാൽ നടി നവ്യ നായരും സംവിധായകൻ വി കെ പ്രകാശും വിനായകന് ഒപ്പമുണ്ടായിരുന്നു. നവ്യയുടെ സാന്നിധ്യത്തിൽ തന്നെ ആയിരുന്നു ഈ വിവാദപരാമർശങ്ങളും.