മലയാളസിനിമയ്ക്ക് ബാലചന്ദ്രമേനോൻ പരിചയപ്പെടുത്തിയ നടി; വീട്ടിലെ ദാരിദ്ര്യം കാരണം നാടകത്തെ കൂടെ കൂട്ടിയ താരം

നിരവധി പുതുമുഖങ്ങളെയാണ് മലയാളസിനിമയ്ക്ക് ബാലചന്ദ്രമേനോൻ പരിചയപ്പെടുത്തിയത്. ശോഭന, പാർവതി ജയറാം, ലിസി, കാർത്തിക തുടങ്ങി നിരവധി നായികമാരാണ് ബാലചന്ദ്രമേനോൻ സിനിമകളുലൂടെ മലയാള സിനിമയിലേക്ക് എത്തിയത്. ഏപ്രിൽ പതിനെട്ട് എന്ന ബാലചന്ദ്രമേനോൻ ചിത്രത്തിലൂടെയാണ് ശോഭന സിനിമയിലേക്ക് എത്തിയത്. വിവാഹിതരേ ഇതിലേയിലൂടെ പാർവതി ജയറാം, ഇത്തിരിനേരം ഒത്തിരികാര്യം എന്ന സിനിമയിലൂടെ ലിസി, ഒരു പൈങ്കിളികഥയിലൂടെ കാർത്തിക എന്നിവർ സിനിമയിലേക്ക് എത്തിയപ്പോൾ ‘പ്രശ്നം ഗുരുതരം’ എന്ന സിനിമയിലൂടെ ബാലചന്ദ്രമേനോൻ മലയാളികൾക്ക് പരിചയപ്പെടുത്തിയ നടിയാണ് കണ്ണൂർ ശ്രീലത.

‘പ്രശ്നം ഗുരുതരം’ എന്ന സിനിമയിൽ ബാലചന്ദ്രമേനോൻ, പ്രേം നസീർ, ജയഭാരതി, ലിസി, വേണു നാഗവള്ളി, പൂർണിമ ജയറാം തുടങ്ങി വലിയൊരു താരനിര തന്നെ സിനിമയിൽ ഉണ്ടായിരുന്നു. കണ്ണൂർ ജില്ലയിൽ ആയിരുന്നു പ്രശ്നം ഗുരുതരം എന്ന സിനിമയുടെ ഭൂരിഭാഗം ചിത്രീകരണവും നടന്നത്. സിനിമയുടെ ചിത്രീകരണം നടക്കുന്ന സമയത്താണ് പത്രത്തിൽ ശ്രീലതയെക്കുറിച്ച് ഒരു വാർത്ത വന്നത്. വാർത്തയ്ക്കൊപ്പം ശ്രീലതയുടെ ചിത്രവും ഉണ്ടായിരുന്നു. ഈ വാർത്ത കണ്ട ബാലചന്ദ്രമേനോൻ പ്രശ്നം ഗുരുതരം എന്ന സിനിമയിലേക്ക് ഒരു ചെറിയ വേഷം ചെയ്യാൻ ശ്രീലതയെ ക്ഷണിക്കുകയായിരുന്നു. വലിയ താരനിരയ്ക്കൊപ്പം വളരെ കുറച്ച് രംഗങ്ങളിൽ മാത്രം അഭിനയിച്ചാണ് സിനിമ ജീവിതത്തിന് തുടക്കം കുറിച്ചത്.

പ്രശ്നം ഗുരുതരം എന്ന സിനിമയിൽ വളരെ ചെറിയ വേഷത്തിൽ ആയിരുന്നു കണ്ണൂർ ശ്രീലത പ്രത്യക്ഷപ്പെട്ടതെങ്കിലും തന്റെ അടുത്ത ചിത്രത്തിൽ ബാലചന്ദ്രമേനോൻ വളരെ നല്ലൊരു വേഷം ശ്രീലതയ്ക്ക് നൽകി. ശോഭനയുടെ അരങ്ങേറ്റ സിനിമയായ ‘ഏപ്രിൽ പതിനെട്ട്’ ആയിരുന്നു ആ സിനിമ. ശ്രീലതയുടെ പിതാവ് രാജൻ കണ്ണൂരിലെ രാജാ തിയറ്റേഴ്സ് നടത്തിയിരുന്ന നാടക കലാകാരൻ ആയിരുന്നു. ഏഴാം ക്ലാസിൽ പഠിക്കുമ്പോൾ മുതൽ നാടകങ്ങളിൽ അഭിനയിച്ചു തുടങ്ങിയ ശ്രീലത ‘നന്ദി വീണ്ടും വരിക’ എന്ന നാടകത്തിലൂടെ മികച്ച നടിക്കുള്ള പുരസ്കാരവും നേടി. മമ്മൂട്ടിയോടൊപ്പവും കണ്ണൂർ ശ്രീലത അഭിനയിച്ചു. ഒരു നോക്കു കാണാൻ എന്ന സിനിമയിൽ മമ്മൂട്ടിയുടെ മാനസികരോഗിയായ ഭാര്യയായി അഭിനയിച്ചത് ശ്രീലത ആയിരുന്നു. കണ്ണെഴുതി പൊട്ടുംതൊട്ട്, കൊട്ടാരംവീട്ടിലെ അപ്പൂട്ടൻ, പകൽപ്പൂരം, മത്സരം, തിരുവമ്പാടി തമ്പാൻ തുടങ്ങി നിരവധി സിനിമകളിൽ അഭിനയിച്ച ശ്രീലത നിരവധി സീരിയലുകളിലും അഭിനയിച്ചിട്ടുണ്ട്.