ആകാശത്ത് പറന്ന് ‘ലളിതം സുന്ദരം’; മധു വാര്യർക്ക് കൂട്ടുകാരന്റെ സമ്മാനം

പ്രിയ സുഹൃത്തിന്റെ അമ്പരപ്പിക്കുന്ന സമ്മാനം കണ്ട് ഞെട്ടിയിരിക്കുകയാണ് ലളിതം സുന്ദരം ടീം. ചിത്രത്തിന്റെ സംവിധായകൻ മധു വാര്യരുടെ ആത്മസുഹൃത്ത് ആണ് രാജീവ് രാഘവൻ. രാജീവ് രാഘവൻ സ്കൈ ഡൈവിംഗ് നടത്തിയതിന്റെ വീഡിയോ ആണ് ഇപ്പോൾ മഞ്ജു വാര്യരുടെ ഒഫീഷ്യൽ യുട്യൂബ് ചാനലിലൂടെ പങ്കുവെച്ചിരിക്കുന്നത്. മധു വാര്യർ സംവിധാനം ചെയ്യുന്ന ‘ലളിതം സുന്ദരം’ എന്ന ചിത്രത്തിൽ മഞ്ജു വാര്യരും ബിജു മേനോനും ആണ് നായകർ. ചിത്രം ഡിസ്നി പ്ലസ് ഹോട്ട്സ്റ്റാറിലൂടെ ആയിരിക്കും റിലീസ് ചെയ്യുക. മാർച്ചിലാണ് ചിത്രം പ്രേക്ഷകരിലേക്ക് എത്തുക. ചിത്രത്തിന്റെ രചന – പ്രമോദ് മോഹൻ ആണ്.

മധു വാര്യരുടെ സഹപാഠി കൂടിയാണ് രാജീവ് രാഘവൻ. ‘ലളിതം സുന്ദരം’ എന്ന് എഴുതിയ ടീ ഷർട്ട് അണിഞ്ഞാണ് രാജീവ് സ്കൈ ഡൈവിങ് നടത്തിയത്. തന്റെ സുഹൃത്തിനും അദ്ദേഹത്തിന്റെ ചിത്രത്തിനും വേണ്ടിയാണ് രാജീവ് വീഡിയോ സമർപ്പിച്ചിരിക്കുന്നത്. ദുബായിൽ പ്രവർത്തിക്കുന്ന ജെംസ് ലെഗസി സ്‌കൂളിന്റെ, സ്‌കൂൾ ഓഫ് ഓപ്പറേഷൻസിന്റെ മാനേജർ ആണ് രാജിവ് രാഘവൻ.

സൗഹൃദത്തിന് വേണ്ടി ഏതറ്റം വരെയും പോകുമെന്ന് വ്യക്തമാക്കുകയാണ് രാജീവ് തന്റെ ഈ വീഡിയോയിൽ. ജീവിതത്തിലെ ഇതുപോലുള്ള ആഗ്രഹങ്ങൾ ഓരോന്നായി നടത്തിയെടുത്താൽ ലളിതവും സുന്ദരവുമായി സന്തോഷത്തോടെ മുന്നോട്ടു പോകാം എന്നാണ് ഇതിലൂടെ രാജീവ് നൽകുന്ന സന്ദേശം. തന്റെ സുഹൃത്തിനുള്ള ഒരു സർപ്രൈസ് സമ്മാനമായാണ് അദ്ദേഹം ഇത് പ്ലാൻ ചെയ്തതും വിജയകരമായി തന്നെ നിർവ്വഹിച്ചതും. സൈജു കുറുപ്പ്, സുധീഷ്, അനു മോഹന്‍, രഘുനാഥ് പലേരി, ദീപ്തി സതി, രമ്യ നമ്പീശൻ, സറീന വഹാബ്, വിനോദ് തോമസ്, ആശാ അരവിന്ദ്, അഞ്ജന അപ്പുക്കുട്ടന്‍, മാസ്റ്റര്‍ ആശ്വിന്‍ വാര്യര്‍, ബേബി തെന്നല്‍ അഭിലാഷ് എന്നിവരാണ് ലളിതം സുന്ദരം എന്ന ചിത്രത്തിലെ മറ്റ് അഭിനേതാക്കൾ. പ്രശസ്ത നിർമ്മാണ ബാനർ ആയ സെഞ്ച്വറിയും മഞ്ജു വാര്യർ പ്രൊഡക്ഷൻസും ചേർന്നാണ് ചിത്രം നിർമ്മിച്ചിരിക്കുന്നത്. പി സുകുമാർ, ഗൗതം ശങ്കർ എന്നിവരാണ് കാമറ. സംഗീതം – ബിജിബാൽ. ലിജോ പോൾ ആണ് ഈ ചിത്രത്തിന്റെ എഡിറ്റർ.