പ്രിയതമന് വിട നൽകി മീന; നെഞ്ചുപൊട്ടി നിൽക്കുന്ന അമ്മയെ ആശ്വസിപ്പിച്ച് മകൾ

തെന്നിന്ത്യൻ നടി മീനയുടെ ഭർത്താവും വ്യവസായിയുമായ വിദ്യാസാഗർ കഴിഞ്ഞദിവസം ആയിരുന്നു മരിച്ചത്. വിദ്യാസാഗറിന്റെ സംസ്കാരം ചെന്നൈയിലെ ബസന്റ് നഗർ ശ്മശാനത്തിൽ നടത്തി. സിനിമാരംഗത്തെ നിരവധി പ്രമുഖർ വിദ്യാസാഗറിന് അന്ത്യാഞ്ജലി അർപ്പിക്കാൻ എത്തിയിരുന്നു. രജനികാന്ത്, രംഭ, ഖുശ്ബു, സുന്ദർ സി, പ്രഭുദേവ, ലക്ഷ്മി, ബ്രന്ദ, സ്നേഹ, റഹ്മാൻ, നാസർ, മൻസൂർ അലിഖാൻ തുടങ്ങി നിരവധി താരങ്ങളാണ് വിദ്യാസാഗറിന് അന്ത്യാഞ്ജലി അർപ്പിക്കാനും മീനയെ ആശ്വസിപ്പിക്കാനുമായി എത്തിയത്.

ഗുരുതരമായ ശ്വാസകോശ അണുബാധയെ തുടർന്നായിരുന്നു കഴിഞ്ഞദിവസം വിദ്യാസാഗറിനെ ചെന്നൈയിലെ സ്വകാര്യ ആശുപത്രിയിൽ പ്രവേശിപ്പിച്ചത്. എന്നാൽ, വിദ്യാസാഗറിന്റെ മരണവാർത്തയാണ് പിന്നീട് പുറത്തെത്തിയത്. കഴിഞ്ഞ് കുറച്ചു വർഷങ്ങളായി ശ്വാസകോശ സംബന്ധമായ ബുദ്ധിമുട്ടുകൾ അദ്ദേഹം നേരിട്ടിരുന്നതായി ആശുപത്രി അധികൃതർ അറിയിച്ചു. ഈ വർഷം ജനുവരിയിൽ കുടുംബത്തിൽ എല്ലാവർക്കും കോവിഡ് 19 സ്ഥിരീകരിച്ചിരുന്നു. ഇതിൽ നിന്ന് സുഖം പ്രാപിച്ചെങ്കിലും അതിനുശേഷം വിദ്യാസാഗറിന്റെ ആരോഗ്യനില മോശമാകുകയായിരുന്നു.

ഏതാനും ആഴ്ചകൾക്ക് മുമ്പ് വിദ്യാസാഗറിന്റെ ശ്വാസകോശം മാറ്റിവെയ്ക്കാൻ ഡോക്ടർമാർ തീരുമാനിച്ചെങ്കിലും ദാതാവിനെ ലഭിക്കാൻ ബുദ്ധിമുട്ട് ആയിരുന്നു. മരുന്ന് നൽകി അസുഖം ഭേദമാക്കാൻ ഡോക്ടർമാർ ശ്രമിച്ചെങ്കിലും മരണം സംഭവിക്കുകയായിരുന്നു. 2009ൽ ആയിരുന്നു ബംഗളൂരുവിൽ വ്യവസായി ആയിരുന്ന വിദ്യാസാഗറിനെ മീന വിവാഹം കഴിച്ചത്. നൈനിക എന്നു പേരുള്ള ഒരു മകളാണ് ഇവർക്കുള്ളത്. ദളപതി വിജയുടെ മകളായി ‘തെറി’ സിനിമയിൽ നൈനിക അഭിനയിച്ചിരുന്നു.