‘തെറ്റായ വിവരങ്ങൾ പ്രചരിപ്പിക്കരുത്, ഞങ്ങളുടെ സ്വകാര്യതയെ മാനിക്കണം’: അഭ്യർത്ഥനയുമായി നടി മീന

ഭർത്താവിന്റെ വേർപാടിനു പിന്നാലെ ആരാധകരോടും മാധ്യമങ്ങളോടും അഭ്യർത്ഥനയുമായി നടി മീന. സോഷ്യൽ മീഡിയയിൽ പങ്കുവെച്ച കുറിപ്പിലാണ് തങ്ങളുടെ സ്വകാര്യതയെ മാനിക്കണമെന്നും തെറ്റായ വിവരങ്ങൾ പ്രചരിപ്പിക്കരുതെന്നും മീന അഭ്യർത്ഥിച്ചത്. ഭർത്താവ് വിദ്യാസാഗറിന്റെ മരണത്തിനു പിന്നാലെ അദ്ദേഹത്തിന്റെ ആരോഗ്യത്തെ സംബന്ധിച്ചും മറ്റും ഏറെ ഊഹാപോഹങ്ങൾ പടർന്നിരുന്നു. ഇതിനു പിന്നാലെയാണ് മീന തന്നെ പ്രതികരണവുമായി നേരിട്ടെത്തിയിരിക്കുന്നത്.

‘എന്റെ പ്രിയപ്പെട്ട ഭർത്താവ് വിദ്യാസാഗറിന്റെ വിയോഗത്തിൽ അതിയായ ദുഃഖത്തിലാണ് ഞാൻ. ഈ സാഹചര്യത്തിൽ ഞങ്ങളുടെ സ്വകാര്യതയെ മാനിക്കാൻ ഞാൻ എല്ലാ മാധ്യമങ്ങളോടും ആത്മാർത്ഥമായി അഭ്യർത്ഥിക്കുന്നു. ഈ വിഷയവുമായി ബന്ധപ്പെട്ട് തെറ്റായ വിവരങ്ങൾ പ്രചരിപ്പിക്കരുത്. വിഷമമേറിയ ഈ സമയത്ത് ഒപ്പം നിൽക്കുകയും സഹായിക്കുകയും ചെയ്ത എല്ലാ സുമനസ്സുകൾക്കും നന്ദി അറിയിക്കുന്നു. കഴിവിന്റെ പരമാവധി ശ്രമിച്ച മെഡിക്കൽ സംഘത്തിനോടും മുഖ്യമന്ത്രിയോടും ആരോഗ്യമന്ത്രിയോടും രാധാകൃഷ്ണൻ ഐ എ എസിനോടും സഹപ്രവർത്തകരോടും സുഹൃത്തുക്കളോടും കുടുംബാംഗങ്ങളോടും മാധ്യമങ്ങളോടും സ്നേഹവും പ്രാർത്ഥനയും അറിയിച്ച എന്റെ സ്നേഹം നിറഞ്ഞ ആരാധകരോടും ഞാൻ എന്റെ നന്ദി അറിയിക്കുന്നു. നന്ദി, മീന സാഗർ’ – മീന ഫേസ്ബുക്കിൽ കുറിച്ചു.

ചെന്നൈയിലെ സ്വകാര്യ ആശുപത്രിയിൽ വെച്ച് ചൊവ്വാഴ്ച രാത്രിയാണ് മീനയുടെ ഭർത്താവ് വിദ്യാസാഗർ അന്തരിച്ചത്. കഴിഞ്ഞ കുറച്ചു വർഷങ്ങളായി ശ്വാസകോശ സംബന്ധമായ ബുദ്ധിമുട്ടുകൾ വിദ്യാസാഗർ നേരിട്ടിരുന്നതായി ആശുപത്രി അധികൃതർ അറിയിച്ചു. ഈ വർഷം ജനുവരിയിൽ കുടുംബത്തിൽ എല്ലാവർക്കും കോവിഡ് 19 സ്ഥിരീകരിച്ചിരുന്നു. ഇതിൽ നിന്ന് സുഖം പ്രാപിച്ചെങ്കിലും അതിനുശേഷം വിദ്യാസാഗറിന്റെ ആരോഗ്യനില മോശമാകുകയായിരുന്നു. ഏതാനും ആഴ്ചകൾക്ക് മുമ്പ് വിദ്യാസാഗറിന്റെ ശ്വാസകോശം മാറ്റിവെയ്ക്കാൻ ഡോക്ടർമാർ തീരുമാനിച്ചെങ്കിലും ദാതാവിനെ ലഭിക്കാൻ ബുദ്ധിമുട്ട് ആയിരുന്നു. മരുന്ന് നൽകി അസുഖം ഭേദമാക്കാൻ ഡോക്ടർമാർ ശ്രമിച്ചെങ്കിലും മരണം സംഭവിക്കുകയായിരുന്നു. വിദ്യാസാഗർ – മീന ദമ്പതികൾക്ക് നൈനിക എന്നു പേരുള്ള ഒരു മകളുണ്ട്.