‘അന്ന് രാത്രി ഉറങ്ങിയില്ല, ഡെറ്റോൾ ഇട്ട് വായ കഴുകി’ – ഇന്ത്യൻ ടെലിവിഷൻ ചരിത്രത്തിലെ ആദ്യചുംബനത്തിനു ശേഷം നായിക ചെയ്തത് ഇത്, ഒടുവിൽ ചുംബനരംഗം സീരിയലിൽ നിന്ന് ഒഴിവാക്കി

സിനിമകളിൽ ഒരുപാട് ചുംബനരംഗങ്ങൾ കണ്ടിട്ടുണ്ടെങ്കിലും സീരിയലുകളിൽ അത്തരം രംഗങ്ങൾ അത്ര പതിവല്ല. എന്നാൽ, ഇന്ത്യൻ ടെലിവിഷൻ രംഗത്ത് വിവാദമായ ആദ്യ ചുംബനരംഗം ചിത്രീകരിച്ചിട്ട് 30 വർഷങ്ങൾ ആയി. 1993ലെ ‘ദില്ലഗി’ എന്ന സീരിയലിൽ ആയിരുന്നു ഇത്തരത്തിൽ ഒരു ചുംബനരംഗം ആദ്യമായി ഉൾപ്പെടുത്തിയത്. ദിലീപ് ധവാൻ, നീന ഗുപ്ത എന്നിവർ തമ്മിലുള്ള രംഗം ആയിരുന്നു അത്.  ആ ചുംബനരംഗത്തെക്കുറിച്ചുള്ള ഓർമകൾ നീന ഗുപ്ത കഴിഞ്ഞയിടെ ഒരു അഭിമുഖത്തിൽ പങ്കുവെച്ചു.

തന്റെ ആദ്യത്തെ ഓൺ – സ്‌ക്രീൻ ചുംബനത്തിന്റെ ചിത്രീകരണത്തിന് മുമ്പും ശേഷവും വലിയ ടെൻഷനിൽ ആയിരുന്നു താനെന്ന് അനുസ്മരിക്കുകയാണ് നീന. ചിത്രീകരണത്തിനു ശേഷം ആന്റിസെപ്റ്റിക് ഉപയോഗിച്ച് വായ കഴുകിയെന്നും നീന അഭിമുഖത്തിൽ വെളിപ്പെടുത്തി. ടെലിവിഷൻ സ്‌ക്രീനിൽ ശാരീരിക അടുപ്പം കാണിക്കുന്നത് അക്കാലത്ത് കേട്ടുകേൾവി ഇല്ലാത്ത കാര്യമായിരുന്നെന്നും ഇന്ത്യൻ ടിവി ചരിത്രത്തിലെ ആദ്യത്തെ ഓൺ സ്ക്രീൻ ചുംബനം ഉൾപ്പെടുത്തി എപ്പിസോഡ് പ്രമോട്ട് ചെയ്യാനുള്ള ചാനലിന്റെ നീക്കം തങ്ങൾക്ക് തിരിച്ചടിയായെന്നും നീന പറഞ്ഞു.

ആ ചുംബനരംഗത്തെക്കുറിച്ച് നീന ഗുപ്ത പറഞ്ഞത് ഇങ്ങനെ, ‘വർഷങ്ങൾക്ക് മുമ്പ് ഞാൻ ദിലീപ് ധവാനുമായി ഒരു സീരിയൽ ചെയ്തു. ഇന്ത്യൻ ടിവിയിലെ ആദ്യത്തെ ലിപ്-ടു-ലിപ് ചുംബന രംഗം ഞങ്ങൾ തമ്മിൽ ആയിരുന്നു. അന്ന് രാത്രി മുഴുവൻ എനിക്ക് ഉറങ്ങാൻ കഴിഞ്ഞില്ല. ദിലീപ് എന്റെ സുഹൃത്ത് ആയിരുന്നില്ല, ഞങ്ങൾ പരിചയക്കാരായിരുന്നു എന്ന് മാത്രം. അദ്ദേഹം സുന്ദരനായിരുന്നു, എന്നാൽ ഈ സാഹചര്യങ്ങളിൽ ശരിക്കും പ്രശ്നം അതല്ല. ശാരീരികമായും മാനസികമായും ആയി ഞാൻ അതിനു തയ്യാറല്ലായിരുന്നു എന്നതാണ്. പിരിമുറുക്കം ഉണ്ടായിരുന്നു എങ്കിലും, പക്ഷേ അതിലൂടെ കടന്നു പോകാൻ ഞാൻ എന്നെത്തന്നെ സജ്‌ജമാക്കി. ചിലർക്ക് കോമഡി ചെയ്യാൻ കഴിയില്ല, ചിലർക്ക് ക്യാമയ്ക്ക് മുന്നിൽ കരയാൻ കഴിയില്ല. ഞാൻ ഇത് ചെയ്തേ തീരൂ എന്ന് എന്റെ തലയിൽ ഉറപ്പിച്ചു, എന്നിട്ട് അത് ചെയ്തു. അവസാനിച്ചയുടനെ ഞാൻ ഡെറ്റോൾ ഉപയോഗിച്ച് വായ കഴുകി. എനിക്ക് അറിയാത്ത ഒരാളെ ചുംബിക്കുന്നത് എനിക്ക് വളരെ ബുദ്ധിമുട്ടായിരുന്നു.’- അവർ പറഞ്ഞുനിർത്തി. ആ സമയത്ത്, വളരെയധികം ടിവി ചാനലുകൾ ഉണ്ടായിരുന്നില്ലെന്നും ഇത്തരം രംഗങ്ങൾ വന്നാൽ കുടുംബങ്ങൾ ഒരുമിച്ച് ടിവി കാണുന്നത് അവസാനിപ്പിക്കുമെന്ന് പരക്കെ എതിർപ്പ് വന്നതിനാൽ ആ രംഗം നീക്കം ചെയ്യേണ്ടി വന്നെന്നും നീന ഗുപ്ത പറഞ്ഞു.