‘ഒരു മുഴുനീള ലാലേട്ടൻ ചിത്രം’ – ആറാട്ട് സിനിമയ്ക്ക് കൈയടിച്ച് നടി സാനിയ ഇയ്യപ്പൻ

തിയറ്ററുകൾ കീഴടക്കി ഉത്സവപ്രതീതി തീർത്ത് ‘ആറാട്ട്’ മുന്നേറുകയാണ്. മോഹൻലാലിനെ നായകനാക്കി ബി ഉണ്ണിക്കൃഷ്ണൻ സംവിധാനം ചെയ്ത ചിത്രമായ ‘ആറാട്ട്’ തിയറ്ററുകളിൽ നിന്ന് മികച്ച പ്രതികരണമാണ് നേടിക്കൊണ്ടിരിക്കുന്നത്. സോഷ്യൽമീഡിയയിലും മികച്ച അഭിപ്രായമാണ് ആറാട്ട് സ്വന്തമാക്കുന്നത്. മാസ് സിനിമകൾ ഇഷ്ടപ്പെടുന്നവരെ ഒരിക്കലും ചിത്രം നിരാശപ്പെടുത്തില്ലെന്ന് സോഷ്യൽ മീഡിയകളിൽ ചർച്ചകൾ നിറയുന്നു. രണ്ടര മണിക്കൂർ സ്ക്രീനിൽ നിറഞ്ഞ് വിളയാടുന്ന മോഹൻലാലിനെ ആണ് ആറാട്ടിൽ കാണാൻ കഴിയുക.

‘ആറാട്ട്’ ഒരു മുഴുനീള ലാലേട്ടൻ ചിത്രമാണെന്ന് കുറിച്ചിരിക്കുകയാണ് നടി സാനിയ ഇയ്യപ്പൻ, സോഷ്യൽമീഡിയയിൽ പങ്കുവെച്ച കുറിപ്പിലാണ് സാനിയ ഇങ്ങനെ പറഞ്ഞത്. ‘ഒരു മുഴുനീള ലാലേട്ടൻ സിനിമ. ചിത്രത്തിലെ ഊർജ്ജസ്വലനായ ലാലേട്ടന്റെ പ്രകടനം കാണാൻ വളരെയധികം ഇഷ്ടമാണ്. ലാലേട്ടനും ഉണ്ണിക്കൃഷ്ണൻ സാറിനും മുഴുവൻ ആറാട്ട് ടീമിനും ആശംസകൾ നേരുന്നു. ചിത്രം ഇപ്പോൾ തിയറ്ററുകളിൽ’ – സാനിയ ഇയ്യപ്പൻ ഫേസ്ബുക്കിൽ കുറിച്ചു. ആറാട്ട് സിനിമയുടെ ഒരു പോസ്റ്റർ പങ്കുവെച്ച് കൊണ്ടാണ് സാനിയ ഇങ്ങനെ കുറിച്ചത്.

ഫെബ്രുവരി പതിനെട്ടിന് ആയിരുന്നു ആറാട്ട് സിനിമ തിയറ്ററുകളിൽ റിലീസ് ചെയ്തത്. കോവിഡ് മൂന്നാം തരംഗത്തിനു ശേഷം തിയറ്ററുകളിലേക്ക് എത്തിയ ആദ്യ മാസ് ചിത്രം കൂടിയായിരുന്നു ആറാട്ട്. നെയ്യാറ്റിൻകര ഗോപൻ എന്ന കഥാപാത്രമായാണ് ചിത്രത്തിൽ മോഹൻലാൽ എത്തുന്നത്. ചിത്രത്തിന്റെ ട്രയിലറും പാട്ടുകളും ചിത്രത്തിൽ നിന്നുള്ള സ്റ്റില്ലുകളും പടം ഇറങ്ങുന്നതിന് മുമ്പ് തന്നെ സോഷ്യൽമീഡിയയിൽ വൈറലായിരുന്നു.