കോണ്‍ഗ്രസില്‍ ചേര്‍ന്ന നടി ഷക്കീല കേരളത്തിലെ പ്രചാരണത്തിന് ഇറങ്ങുവോ ?

തിരഞ്ഞെടുപ്പുമായി ബന്ധപ്പെട്ട് തമിഴ്‌നാട്ടില്‍ താരങ്ങള്‍ ഒന്നടങ്കം രാഷ്ട്രീയത്തിലേക്ക് ഇറങ്ങിയിരിക്കുകയാണ്. തമിഴിന്റെ പ്രിയപ്പെട്ട താരങ്ങളായ കമല്‍ഹാസനും ഖുഷ്‌ബുവും ശരത് കുമാറും മാത്രമല്ല ഷക്കീല വരെയാണ് രാഷ്ട്രീയത്തിലേക്ക് എത്തിയിരിക്കുന്നത്. തമിഴ്‌നാട്ടില്‍ അസ്തമിക്കാറായ  കോണ്‍ഗ്രസിലാണ് ഷക്കീല അംഗത്വം സ്വീകരിച്ചിരിക്കുന്നത്.

എല്ലാവരും ആകാംഷയോടെ കാത്തിരിക്കുന്ന ഒന്നാണ് തമിഴ്നാട് കോണ്‍ഗ്രസിന്റെ ഭാഗമായി പ്രവര്‍ത്തിക്കുമെന്ന് അറിയിച്ച ഷക്കീല കേരളത്തില്‍ നിയമസഭാ തിരഞ്ഞെടുപ്പ് പ്രചാരണത്തിന് ഇറങ്ങുമോയെന്ന്. അതിര്‍ത്തി ജില്ലകളിലെങ്കിലും ഷക്കീല പ്രചാരണത്തിന് ഇറങ്ങിയാല്‍ അത് ഗുണം ചെയ്യുമെന്ന് ചില കോണ്‍ഗ്രസ് നേതാക്കള്‍ അടക്കം പറയുന്നുണ്ട്. എന്നാല്‍ അങ്ങനെയൊരു ആലോചനയേ ഇല്ലെന്നാണ് പ്രധാനപ്പെട്ട നേതാക്കള്‍ പറയുന്നത്.

പാര്‍ലമെന്റ് തിരഞ്ഞെടുപ്പിലടക്കം കോണ്‍ഗ്രസിന് വേണ്ടി നിരവധി പേർ  പ്രചാരണത്തിന് എത്തിയിട്ടുണ്ട്. പക്ഷെ ഷക്കീല എത്തുന്നത് കുടുംബ വോട്ടുകളില്‍ വലിയ രീതിയിൽ  വിളളല്‍ വീഴ്‌ത്തുമെന്നാണ് നേതാക്കള്‍ പറയുന്നത്. യാഥാസ്ഥിക ചിന്താഗതിക്കാര്‍ക്കിടയില്‍ ഇത് വലിയ അളവിൽ ദോഷം ചെയ്യുമെന്നാണ് ഷക്കീലയുടെ വരവിനെ എതിര്‍ക്കുന്നവരുടെ വാദം. പാര്‍ട്ടിയുടെ മനുഷ്യാവകാശ വിഭാഗത്തിലായിരിക്കും പ്രവര്‍ത്തനമെന്ന് ഷക്കീല ഇന്നലെ തന്നെ അറിയിച്ചിരുന്നു. ഇപ്പോള്‍ സിനിമാതിരക്കുകളില്‍നിന്നു വിട്ടുനില്‍ക്കുന്ന ഷക്കീല ചെന്നൈയിലാണ് താമസിക്കുന്നത്.