‘അക്കാരണംകൊണ്ട് ഞങ്ങള്‍ പിരിയുകയായിരുന്നു’; അവിവാഹിതയായി നില്‍ക്കാനുള്ള കാരണം പറഞ്ഞ് സുബി സുരേഷ്

അവിവാഹിതയായി തുടരാനുള്ള കാരണം വെളിപ്പെടുത്തി നടിയും അവതാരകയുമായ സുബി സുരേഷ്. ജീവിതത്തില്‍ സമാധാനം വേണമെന്നുള്ളതുകൊണ്ടാണ് അവിവാഹിതയായി തുടരുന്നതെന്ന് സുബി പറഞ്ഞു. ഒരു പ്രണയമുണ്ടായിരുന്നുവെന്നും വീട്ടുകാര്‍ക്ക് താത്പര്യമില്ലാത്തതുകൊണ്ടാണ് വേണ്ടെന്നുവച്ചതെന്നും സുബി പറഞ്ഞു.

വിവാഹം കഴിച്ചാല്‍ സമാധാനം നഷ്ടപ്പെടുമെന്ന കാഴ്ചപ്പാടില്ല. തനിക്ക് പ്രേമ വിവാഹത്തോടാണ് താത്പര്യം. ഒരു പ്രണയമുണ്ടായിരുന്നു. വീട്ടുകാര്‍ക്ക് അറിയാവുന്ന ആളാണ്. വീട്ടുകാരുമായുള്ള ബന്ധം നഷ്ടപ്പെടുമെന്നുള്ളതുകൊണ്ട് പരസ്പര സമ്മതത്തോടെ അവസാനിപ്പിക്കുകയായിരുന്നു. അത് ഡീപ് റിലേഷന്‍ ഒന്നും ആയിരുന്നില്ല. പുള്ളിക്കാരന്‍ പ്രൊപ്പോസ് ചെയ്തു. തനിക്ക് കൊള്ളാമെന്ന് തോന്നി. നല്ല ജോലിയും ഉണ്ടായിരുന്നു. വിവാഹം കഴിച്ചിരുന്നെങ്കില്‍ തന്നെ നല്ലതുപോലെ നോക്കിയേനെ. പക്ഷേ തന്റെ വീടുമായുള്ള ബന്ധം നഷ്ടപ്പെടുമായിരുന്നു. തനിക്ക് അമ്മയെ വിട്ട് നില്‍ക്കാന്‍ കഴിയില്ല. അക്കാരണംകൊണ്ട് പിരിയുകയായിരുന്നുവെന്നും സുബി പറഞ്ഞു.

ഇപ്പോള്‍ വിവാഹത്തിന് വീട്ടുകാര്‍ നിര്‍ബന്ധിക്കുന്നുണ്ട്. ജാതിയും മതവുമൊന്നും പ്രശ്‌നമല്ലെന്നാണ് പറയുന്നത്. പക്ഷേ തനിക്ക് പ്രേമിക്കാന്‍ തോന്നുന്നില്ല. നാളെ ഒരുപക്ഷേ ഒരാളെ കണ്ടെത്തിയേക്കാമെന്നും സുബി കൂട്ടിച്ചേര്‍ത്തു.