‘പഴയ ചിരിയും സ്നേഹവും ഒക്കെയുണ്ട്’; കവിയൂർ പൊന്നമ്മയെ കാണാനെത്തി ഊർമിള ഉണ്ണി

മലയാളികൾക്ക് ഏറെ പ്രിയപ്പെട്ട താരങ്ങളിൽ ഒരാളാണ് കവിയൂർ പൊന്നമ്മ. അമ്മ വേഷങ്ങളിലൂടെയാണ് കവിയൂർ പൊന്നമ്മ മലയാളികൾക്ക് പ്രിയങ്കരിയായത്. അതുകൊണ്ടു തന്നെ അവരുടെ പേര് കേൾക്കുമ്പോൾ തന്നെ മിക്ക സിനിമാപ്രേമികളുടെയും മനസിലേക്ക് ഓടിയെത്തുക അവർ ചെയ്ത അമ്മ വേഷങ്ങൾ ആയിരിക്കും. മലയാളത്തിലെ നിരവധി താരങ്ങളുടെ അമ്മയായി കവിയൂർ പൊന്നമ്മ അഭിനയിച്ചിട്ടുണ്ട്.

പ്രായമായെങ്കിലും അടുത്തിടെയും ചില സിനിമകളിൽ തന്റെ സാന്നിധ്യം കവിയൂർ പൊന്നമ്മ അറിയിച്ചിരുന്നു. മാമാങ്കം, ആണും പെണ്ണും എന്നീ ചിത്രങ്ങളിൽ കവിയൂർ പൊന്നമ്മ അഭിനയിച്ചിരുന്നു. മോഹൻലാൽ നായകനായി എത്തിയ ‘ആറാട്ട്’ സിനിമയിൽ ശബ്ദ സാന്നിധ്യമായി കവിയൂർ പൊന്നമ്മ ഉണ്ടായിരുന്നു.

മലയാളത്തിലെ പ്രിയപ്പെട്ട നടിയെ കാണാൻ നടി ഊർമിള ഉണ്ണി എത്തിയതിന്റെ ചിത്രങ്ങളാണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്. കവിയൂർ പൊന്നമ്മയെ സന്ദർശിച്ചതിന്റെ ചിത്രങ്ങൾ ഊർമിള ഉണ്ണി തന്നെയാണ് തന്റെ സോഷ്യൽമീഡിയ അക്കൗണ്ടുകളിൽ പങ്കുവെച്ചത്. ‘പ്രിയപ്പെട്ട പൊന്നമ്മചേച്ചിയെ കാണാൻ പോയി. പഴയ ചിരിയും, സ്നേഹവും ഒക്കെയുണ്ട്.’ എന്ന കുറിപ്പോടെയാണ് കവിയൂർ പൊന്നമ്മയ്ക്ക് ഒപ്പമുള്ള ചിത്രം ഊർമിള ഉണ്ണി പങ്കുവെച്ചത്. നെറ്റിയിൽ വലിയ വട്ടപ്പൊട്ടുമായി നിറഞ്ഞ ചിരിയോടെ കസേരയിൽ ഇരിക്കുന്ന കവിയൂർ പൊന്നമ്മയ്ക്കൊപ്പം പിന്നിൽ സന്തോഷത്തോടെ നിൽക്കുന്ന ഊർമിള ഉണ്ണിയെ ആണ് കാണാൻ കഴിയുക. നിരവധി പേരാണ് ചിത്രത്തിന് താഴെ ഇരുവർക്കും സ്നേഹവും ആശംസകളും അറിയിച്ചിരിക്കുന്നത്.