അഡാർ ലവിലെ കണ്ണിറുക്കൽ തന്റെ സ്വന്തം ഐഡിയ ആയിരുന്നെന്ന് പ്രിയ വാര്യർ, ഓർമക്കുറവിന് വലിയ ചന്ദനാദി ബെസ്റ്റാണെന്ന് ഒമർ ലുലു

വൈറലായ ഒരു കണ്ണിറുക്കലിലൂടെ ഒറ്റ രാത്രി കൊണ്ട് ലക്ഷക്കണക്കിന് ആരാധകരെ സ്വന്തമാക്കിയ താരമാണ് പ്രിയ വാര്യ‍ർ. ഒമർ ലുലു സംവിധാനം ചെയ്ത ഒരു അഡാർ ലവ് എന്ന സിനിമയിലെ ആയിരുന്നു ആ രംഗം. ചിത്രത്തിലെ പാട്ട് സീനിലെ പ്രിയയുടെ പുരികം ഉയർത്തലും കണ്ണിറുക്കലും ഒരു രാത്രി കൊണ്ട് അവരെ പ്രശസ്തിയുടെ കൊടുമുടിയിൽ എത്തിച്ചു. വൈറലായ ഈ കണ്ണിറുക്കലും പുരികം ഉയർത്തലും തന്റെ ഐഡിയ ആയിരുന്നുവെന്ന് പ്രിയ പറഞ്ഞതാണ് ഇപ്പോൾ വിവാദമായിരിക്കുന്നത്.

പേർളി മാണി ഷോ എന്ന ടോക്ക് ഷോയിൽ തന്റെ പുതിയ ചിത്രത്തിന്റെ പ്രമോഷന്റെ ഭാഗമായുള്ള അഭിമുഖത്തിൽ പങ്കെടുത്ത് സംസാരിക്കവെയാണ് പ്രിയ വാര്യർ ഇങ്ങനെ പറഞ്ഞത്. അഡാര്‍ ലൗവിലെ വൈറലായ ഭാഗത്തിന്റെ ഫോട്ടോ കാണിച്ച് ഇത് ഓര്‍മയുണ്ടോ എന്ന് പേര്‍ളി ചോദിച്ചു. ഈ രംഗം ചെയ്തിട്ട് അഞ്ച് വര്‍ഷമായി എന്നായിരുന്നു പ്രിയയുടെ മറുപടി. കണ്ണിറുക്കലും പുരികം ഉയർത്തലും താന്‍ സ്വന്തമായി ചെയ്തതാണെന്നും സംവിധായകന്‍റെ നിര്‍‍ദേശത്താല്‍ അല്ലെന്നും പ്രിയ പറഞ്ഞു.

നിമിഷങ്ങൾക്കുള്ളിൽ ഇത് വിവാദമായി. വീഡിയോ വൈറലായതോടെ സംവിധായകൻ ഒമർ ലുലു ഇക്കാര്യം നിഷേധിച്ച് രംഗത്തെത്തി. അഞ്ചു വർഷം മുമ്പ് ഇത് വൈറലായ സമയത്ത് സംവിധായകനും പ്രിയയും റോഷനും ചേർന്ന് ഒരു ചാനലിന് നൽകിയ അഭിമുഖത്തിന്റെ വീഡിയോ പങ്കുവെച്ച് കൊണ്ടാണ് ഒമർ ലുലു മറുപടി പറഞ്ഞത്. കണ്ണിറുക്കല്‍ ഐഡിയ സംവിധായകന്റേതാണെന്നാണ് ഈ വീഡിയോയിൽ പ്രിയ പറയുന്നത്. ഈ വീഡിയോ പങ്കുവെച്ച് ആയിരുന്നു ഒമറിന്റെ മറുപടി. ‘‘അഞ്ച് വർഷം ആയി പാവം കുട്ടി മറന്നതാവും. വലിയ ചന്ദനാദി ഓർമക്കുറവിന് ബെസ്റ്റാ’’, എന്ന അടിക്കുറിപ്പോടെയാണ് വീഡിയോ പങ്കുവെച്ചത്. പിന്നാലെ, വലിയ ചന്ദനാദിയുടെ ചിത്രം പങ്കുവെച്ച് ഒമർ ലുലു കുറിച്ചത് ഇങ്ങനെ- ”ഇത് എന്റെ സിനിമയിലൂടെ വന്ന് പിന്നീട്‌ ഓർമ്മ നഷ്ടപ്പെട്ടവർക്ക് സമർപ്പിക്കുന്നു”.