12 വർഷത്തെ ഇടവേളയ്ക്ക് വിട; മോഹൻലാൽ – ഷാജി കൈലാസ് ചിത്രം ആരംഭിച്ചു; വീണ്ടുമൊരു ആറാം തമ്പുരാനു വേണ്ടി കാത്തിരിക്കുന്നെന്ന് ആരാധകർ

നീണ്ട 12 വർഷത്തെ ഇടവേളയ്ക്ക് ശേഷം മോഹൻലാലിനെ നായകനാക്കി ഷാജി കൈലാസ് സംവിധാനം ചെയ്യുന്ന ചിത്രമെത്തുന്നു. ചിത്രത്തിന്റെ പൂജ നടന്നു. കൊച്ചിയിൽ ആയിരുന്നു പൂജ. സംവിധായകൻ ഷാജി കൈലാസ് തന്നെയാണ് പൂജയുടെ ചിത്രങ്ങൾ സോഷ്യൽ മീഡിയയിലൂടെ ആരാധകരുമായി പങ്കുവെച്ചത്. വീണ്ടും ഒരു ആറാം തമ്പുരാന് വേണ്ടി കാത്തിരിക്കുന്നു എന്നാണ് സംവിധായകന്റെ പോസ്റ്റിനു മറുപടിയായി ആരാധകർ കുറിച്ചത്. പുതിയ ചിത്രത്തിൽ ലാലേട്ടനെ താടി ഇല്ലാതെ അഭിനയിപ്പിക്കാൻ പറ്റുമോ സംവിധായകനെന്നും ചോദ്യം ഉയർന്നു കഴിഞ്ഞു.

2009 ൽ റിലീസ് ചെയ്ത റെഡ് ചില്ലീസ് ആണ് ഷാജി കൈലാസ് – മോഹൻലാൽ കൂട്ടുകെട്ടിൽ അവസാനം റിലീസ് ചെയ്ത ചിത്രം. അതിനു ശേഷം നീണ്ട കാലത്തെ ഇടവേള കഴിഞ്ഞാണ് ഇപ്പോൾ ഇരുവരും വീണ്ടും ഒന്നിക്കുന്നത്. ആശീർവാദ് ഫിലിംസിന്റെ ബാനറിൽ ആന്റണി പെരുമ്പാവൂർ ആണ് ചിത്രം നിർമിക്കുന്നത്. രാജേഷ് ജയറാമിന്റേതാണ് ചിത്രത്തിന്റെ തിരക്കഥ. ഛായാഗ്രഹണം അഭിനന്ദ്. ഡോൺ മാക്സ് ആണ് എഡിറ്റർ. സംഗീതം ജേക്സ് ബിജോയി.

മോഹൻലാലും ഷാജി കൈലാസും ഒന്നിച്ച ആറാം തമ്പുരാൻ, നരസിംഹം എന്നിവ വമ്പൻ ഹിറ്റുകളായിരുന്നു. 1997ലാണ് ഇരുവരും ഒന്നിച്ച ആദ്യചിത്രം ആറാം തമ്പുരാൻ പുറത്തിറങ്ങിയത്. ചിത്രം സൂപ്പർ ഹിറ്റ് ആയിരുന്നു. ചിത്രത്തിൽ മോഹൻലാലും മഞ്ജു വാര്യരും അവതരിപ്പിച്ച കഥാപാത്രങ്ങൾ ഇന്നും പ്രേക്ഷകമനസിലുണ്ട്. ആറാം തമ്പുരാനെ കൂടാതെ താണ്ഡവം, നാട്ടുരാജാവ്, ബാബാ കല്യാണി, റെഡ് ചില്ലീസ് എന്നിവയാണ് ഇരുവരും ഒരുമിച്ച് എത്തിയ മറ്റു ചിത്രങ്ങൾ. 2013ൽ സംവിധാനം ചെയ്ത ജിഞ്ചറിനു ശേഷം
പൃഥ്വിരാജ് നായകനാകുന്ന കടുവയിലൂടെയാണ് 2019ൽ ഷാജി കൈലാസ് സംവിധായകനായത്. ഇതിനു പിന്നാലെയാണ് മോഹൻലാൽ നായകനാകുന്ന ചിത്രം ആരംഭിക്കുന്നത്.