ആദ്യം ഈപ്പൻ പാപ്പച്ചി, പിന്നെ വട്ട് ജയൻ; ഇപ്പോൾ ബെന്നി മൂപ്പനായി പെൺപിള്ളാരെ സദാചാരം പഠിപ്പിക്കാൻ ഇന്ദ്രജിത്ത്

മലയാളി സിനിമാപ്രേമികൾ അത്ര പെട്ടെന്നൊന്നും മീശമാധവനിലെ ഈപ്പൻ പാപ്പച്ചിയെയും ലെഫ്റ്റ് റൈറ്റ് ലെഫ്റ്റിലെ വട്ട് ജയനെയും മറക്കില്ല. കാരണം, ഇന്ദ്രജിത്ത് എന്ന നടന്റെ അഭിനയജീവിതത്തിലെ അത്രയും ശക്തമായ രണ്ട് കഥാപാത്രങ്ങളാണ് ഈപ്പൻ പാപ്പച്ചിയും വട്ട് ജയനും. രണ്ട് പൊലീസ് വേഷവും ഇന്ദ്രജിത്തിന് നിരവധി ആരാധകരെ നേടിക്കൊടുത്തു. വീണ്ടും ഒരു പൊലീസ് വേഷത്തിൽ എത്തുകയാണ് ഇന്ദ്രജിത്ത് ഇപ്പോൾ. വൈശാഖ് സംവിധാനം ചെയ്യുന്ന ‘നൈറ്റ് ഡ്രൈവ്’ എന്ന ചിത്രത്തിലാണ് ഇന്ദ്രജിത്ത് സുകുമാരൻ ബെന്നി മൂപ്പൻ എന്ന പൊലീസുകാരനായി എത്തുന്നത്.

ചിത്രം റിലീസ് ആകുന്നതിനു മുമ്പേ തന്നെ ചിത്രത്തിലെ ഒരു ഡയലോഗ് സോഷ്യൽ മീഡിയയിൽ ചർച്ചയായിരിക്കുകയാണ്. ഇന്ദ്രജിത്ത് സുകുമാരന്റെ കഥാപാത്രമായ ബെന്നി മൂപ്പനും അന്ന ബെന്നിന്റെ കഥാപാത്രമായ റിയ റോയിയും തമ്മിലുള്ള സംഭാഷണമാണ് ചർച്ചയായത്. അന്ന ബെന്നിന്റെ കഥാപാത്രവും റോഷന്റെ കഥാപാത്രവും നടത്തുന്ന രാത്രിയാത്രയ്ക്കിടെ ചോദ്യവുമായാണ് ബെന്നി മൂപ്പൻ എന്ന പൊലീസ് എത്തുന്നത്. ‘ഈ പെമ്പിള്ളാരെക്കൊണ്ട് അസമയത്ത് പുറത്തിറങ്ങാതെ പകല് വല്ലോം പൊയ്ക്കൂടേ’ എന്ന ചോദ്യം ചോദിക്കുമ്പോൾ കുറിക്കു കൊള്ളുന്ന മറുപടിയാണ് അന്ന ബെന്നിന്റെ കഥാപാത്രം നൽകുന്നത്. ‘അതെന്താ സാറേ, പെമ്പിള്ളാർക്ക് ഈ സമയത്ത് ഇറങ്ങാൻ പാടില്ലെന്ന് വല്ല റൂളു വല്ലതുമുണ്ടോ’ എന്നാണ് തിരിച്ചു ചോദിക്കുന്നത്. സിനിമ ഇറങ്ങിക്കഴിയുമ്പോൾ ഈ ഡയലോഗ് ഏറെ ചർച്ച ചെയ്യപ്പെടുമെന്ന് ഉറപ്പ്.

വേട്ടയാടപ്പെട്ടവർ വേട്ടക്കാരായി മാറുന്ന രാത്രിയിൽ ഇനി ആരൊക്കെ ബാക്കിയുണ്ടാവും എന്ന് പ്രേക്ഷകർക്കു തിയറ്ററിൽ നിന്ന് തന്നെ അറിയാം. യുവ താരനിരയെ അണിനിരത്തിയാണ് ഹിറ്റ്‌ മേക്കർ വൈശാഖ് നൈറ്റ് ഡ്രൈവ് ഒരുക്കിയിരിക്കുന്നത്. മാർച്ച്‌ 11ന് ചിത്രം റിലീസ് ചെയ്യും. റോഷൻ, അന്ന, ഇന്ദ്രജിത്ത് എന്നിവർ ആദ്യമായി ഒന്നിക്കുന്ന ചിത്രം കൂടിയാണ് നൈറ്റ്‌ ഡ്രൈവ്.
അഭിലാഷ് പിള്ളയാണ് തിരക്കഥ, ആൻ മെഗാ മീഡിയയാണ് ചിത്രം നിർമ്മിച്ചിരിക്കുന്നത്.