ലാലേട്ടന് നിർദ്ദേശങ്ങൾ കൊടുത്ത് പൃഥ്വി; പക്ഷേ പ്രേക്ഷകന്റെ കണ്ണുടക്കിയത് ആ ‘പോലീസുകാരനി’ൽ..!

മോഹൻലാൽ നായകനായ ലൂസിഫറിന്റെ വൻ വിജയത്തിന് ശേഷം പൃഥ്വിരാജ് സുകുമാരൻ വീണ്ടും സംവിധായകനാകുന്ന ബ്രോഡാഡിയുടെ ചിത്രീകരണം അതിന്റെ അന്തിമഘട്ടങ്ങളിലാണ്. കേരളത്തിൽ ചിത്രീകരണാനുമതി ഇല്ലാത്തതു മൂലം തെലുങ്കാനയിലാണ് ഈ ഫാമിലി ചിത്രം ഷൂട്ടിംഗ് നടത്തിയത്. മോഹൻലാൽ, മീന, കല്യാണി പ്രിയദർശൻ തുടങ്ങി പ്രേക്ഷകരുടെ പ്രിയപ്പെട്ട താരനിര ചിത്രത്തിൽ അണിനിരക്കുന്നു. ചിത്രത്തിന്റേതായി പുറത്തിറങ്ങുന്ന ഓരോ സ്റ്റിൽസും ഇരുകൈയ്യും നീട്ടിയാണ് ആരാധകർ സ്വീകരിക്കുന്നത്. കഴിഞ്ഞ ദിവസം അമ്മ മല്ലിക സുകുമാരനും മോഹൻലാലിനുമൊപ്പമുള്ള ഫോട്ടോ പൃഥ്വിരാജ് പങ്ക് വെച്ചപ്പോൾ ആ ചിത്രം ഏറെ വൈറലായിരുന്നു.

ഇപ്പോഴിതാ ബ്രോഡാഡി ലൊക്കേഷനിൽ നിന്നുമുള്ള മറ്റൊരു ചിത്രം സോഷ്യൽ മീഡിയ കീഴടക്കുകയാണ്. ലാലേട്ടന് നിർദ്ദേശങ്ങൾ കൊടുക്കുന്ന പൃഥ്വിരാജിനെയാണ് ഫോട്ടോയിൽ കാണുവാൻ സാധിക്കുന്നത്. എന്നാൽ പ്രേക്ഷകരുടെ കണ്ണുടക്കിയത് ലാലേട്ടനിലോ പൃഥ്വിയിലോ അല്ല. മറിച്ച്, പുറകിൽ നിന്ന ഒരു പോലീസ് ഓഫീസറിലാണ്. ചിത്രത്തിന്റെ നിർമാതാവ് ആന്റണി പെരുമ്പാവൂരാണ് സിനിമയിൽ പോലീസ് ഓഫീസറായി അഭിനയിക്കുന്നത്. പൃഥ്വിരാജിന്റെ ആദ്യസംവിധാന സംരംഭമായ ലൂസിഫറിലും ഒരൊറ്റ സീനിൽ ആയിരുന്നിട്ട് പോലും ഒരു മാസ്സ് റോളാണ് ആന്റണി പെരുമ്പാവൂരിന് പൃഥ്വിരാജ് നൽകിയത്. ബ്രോഡാഡിയിൽ കുറച്ചുകൂടി വലിയ ഒരു റോളായിരിക്കും എന്നാണ് പ്രതീക്ഷിക്കുന്നത്. മോഹൻലാൽ നായകനായ പുലിമുരുകൻ, ഒപ്പം, ദൃശ്യം, ദൃശ്യം 2 എന്നിങ്ങനെ നിരവധി ചിത്രങ്ങളിൽ ആന്റണി പെരുമ്പാവൂർ അഭിനയിച്ചിട്ടുണ്ട്.

മൂന്ന് സൃഹൃത്തുക്കളുടെ കഥ പറയുന്ന ബ്രോ ഡാഡി, ഒരു ക്രിസ്ത്യന്‍ പശ്ചാത്തലത്തിലുള്ള കുടുംബ ചിത്രമാണ്. ചിത്രത്തില്‍ മോഹന്‍ലാലിന്റെ മകനായാണ് പൃഥ്വിരാജ് എത്തുന്നത്. മോഹൻലാലിനും പൃഥ്വിരാജിനും പുറമെ, മീന, ലാലു അലക്സ്, മുരളി ഗോപി, കനിഹ, സൗബിൻ ഷാഹിർ എന്നിവരും ചിത്രത്തിലുണ്ട്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ചിത്രം നിർമ്മിക്കുന്നത്. ശ്രീജിത്തും ബിബിനും ചേർന്ന് രചിച്ച രസകരമായ ഒരു കുടുംബ കഥയാണ് ഈ ചിത്രം പറയുന്നത്. ചിത്രത്തിന്‍റെ ഛായാഗ്രഹണം അഭിനന്ദൻ രാമാനുജവും, സംഗീതം ദീപക് ദേവും, കലാസംവിധാനം ഗോകുൽദാസും നിർവ്വഹിക്കുന്നു. പശ്ചാത്തലസംഗീതം എം. ആർ. രാജാകൃഷ്ണനും, എഡിറ്റിങ് അഖിലേഷ് മോഹനുമാണ്.