“ഞങ്ങൾ അച്ഛനും അമ്മയും മക്കളുമെല്ലാം ഒരു മുറിയിലാണ് ഉറക്കം; അതിന് കാരണവുമുണ്ട്” മനസ്സ് തുറന്ന് അഹാന

വെറും വിരലിലെണ്ണാവുന്ന സിനിമകൾ കൊണ്ട് പ്രേക്ഷകരുടെ മനം കവർന്ന അഹാന സ്വന്തം കുടുംബത്തെ കുറിച്ച് മനസ്സ് തുറന്നിരിക്കുകയാണ്. വനിതക്ക് നൽകിയ അഭിമുഖത്തിലാണ് മലയാളത്തിലെ പുതിയ നായികയുടെ മനസ്സ് തുറന്നുള്ള വെളിപ്പെടുത്തൽ.

“യെസ്, ഞങ്ങളുടേത് സ്പെഷൽ കുടുംബമാണ്. എല്ലാവരും ഒരു മുറിയിലാണ് ഉറക്കം. അതു അച്ഛനും അമ്മയ്ക്കും നിർബന്ധമാണ്. അതുകൊണ്ടുള്ള ഏറ്റവും വലിയ ഗുണം നമുക്ക് കൃത്യമായി എട്ടു മണിക്കൂർ ഉറങ്ങാം. ബെഡ്‌റൂമിൽ കയറുന്നതിന് മുൻപേ എല്ലാവരും മൊബൈൽ പുറത്തു വയ്ക്കണം. അതു മാത്രമേയുള്ളൂ നിബന്ധന. ഇതിൽ വലിയൊരു മണി മാനേജ്മെന്റ് കൂടിയുണ്ട്. ഞങ്ങൾ നാലു പേരും നാലു മുറിയിൽ കിടന്നാൽ സ്വാഭാവികമായും നാല് ഏസി കൂടുതൽ പ്രവർത്തിപ്പിക്കേണ്ടേ? ഇതാകുമ്പോൾ വൈദ്യുതി ബില്ലും കൂടില്ല. എങ്ങനെയുണ്ട് ഐഡിയ?

സ്വന്തമായി ലേഡീസ് ഹോസ്റ്റൽ നടത്തുന്ന മലയാളത്തിലെ ഏക നടൻ. ട്രോളൻമാർ അച്ഛനെ വിളിക്കുന്നതാണ്. ഞങ്ങളെല്ലാവരും ഇത്തരം തമാശകൾ ആസ്വദിക്കുന്നവരാണ്. ശരിയാണ്, നാലു പെൺമക്കളെ വളർത്തിയെടുക്കുക എന്നത് ഇന്നത്തെ കാലത്ത് വലിയ ജോലിയാണ്. അതിൽ പാതി ഉത്തരവാദിത്തം അമ്മയ്ക്കാണ്.

എല്ലാവരുടേയും ഭക്ഷണം, പഠനം, ഡ്രസ്സ്, അതിനൊപ്പം എനിക്ക് ഷൂട്ടുണ്ടെങ്കിൽ അതിന്റെ തിരക്ക്. അച്ഛൻ എത്രനേരം വേണമെങ്കിലും വീട്ടിൽ തന്നെയിരിക്കും. വീട്, മുറ്റം അതാണ് അച്ഛന്റെ പ്രിയപ്പെട്ട ലോകം. ഞങ്ങളെപ്പോഴും പറയും, അച്ഛനെ രണ്ടു ദിവസം വീട്ടിൽ പൂട്ടിയിട്ടാൽ അതായിരിക്കും ഏറ്റവും സന്തോഷമെന്ന്. അച്ഛൻ അത്യാവശ്യം സ്ട്രിക്റ്റ് ആണ്. പക്ഷേ, ഒന്നും ഞങ്ങൾ മക്കളിൽ അടിച്ചേൽപിക്കാറില്ല.”