പുതിയ സിനിമയുടെ റിലീസ് മാറ്റി രാജമൗലിയും അജിത്തും പ്രഭാസും; സല്യൂട്ട് 14ന് തന്നെയെന്ന് പ്രഖ്യാപിച്ച് ദുൽഖർ

കോവിഡ് 19ന്റെ പശ്ചാത്തലത്തിൽ പുതിയ സിനിമയുടെ റിലീസ് മാറ്റി തെന്നിന്ത്യയിലെ സൂപ്പർസ്റ്റാറുകൾ. പ്രശസ്ത സംവിധായകൻ രാജമൗലിയുടെ ചിത്രമായ ആർ ആർ ആർ, പ്രഭാസിന്റെ രാധേ ശ്യാം, അജിത്ത് നായകനായി എത്തുന്ന ചിത്രം ‘വലിമൈ’ എന്നീ ചിത്രങ്ങൾ ആണ് റിലീസ് മാറ്റിവെച്ചത്. പക്ഷേ, കോവിഡ് പ്രതിസന്ധിയിലും ദുൽഖർ സൽമാന്റെ ‘സല്യൂട്ട്’ ജനുവരി 14ന് റിലീസ് ചെയ്യും.

അജിത്ത് ചിത്രമായ ‘വലിമൈ’ 2022 പൊങ്കൽ ചിത്രമായി തിയറ്ററുകളിൽ റിലീസ് ചെയ്യാൻ ആയിരുന്നു നേരത്തെ തീരുമാനിച്ചിരുന്നത്. എന്നാൽ, കോവിഡ് പ്രതിസന്ധി വീണ്ടും വന്നതിനെ തുടർന്ന് റിലീസ് അനിശ്ചിതമായി മാറ്റി വെച്ചിരിക്കുകയാണ്. വലിമൈ മാത്രമല്ല ബിഗ് ബജറ്റ് ചിത്രമായ ആർ ആർ ആർ, രാധേ ശ്യാം, ജേഴ്സി എന്നീ ചിത്രങ്ങളും റിലീസ് മാറ്റി വെച്ചിരിക്കുകയാണ്.

ദുൽഖർ സൽമാൻ നായകനായി എത്തുന്ന ‘സല്യൂട്ട്’ ജനുവരി 14ന് തിയറ്ററുകളിൽ റിലീസ് ചെയ്യും. ചിത്രത്തിന്റെ ഓൺലൈൻ ബുക്കിങ്ങ് ആരംഭിച്ചു. ദുൽഖർ സൽമാനെ നായകനാക്കി റോഷൻ ആൻഡ്രൂസ് സംവിധാനം ചെയ്യുന്ന ആദ്യ ചിത്രമാണിത്. ഒപ്പം, റോഷൻ ആൻഡ്രൂസ് – ബോബി സഞ്ജയ്‌ കൂട്ടുകെട്ടിലെ ആദ്യ ദുൽഖർ ചിത്രവും. ‘മുംബൈ പൊലീസ്’ എന്ന പൊലീസ് ചിത്രം മലയാളികൾക്ക് സമ്മാനിച്ച റോഷൻ ആൻഡ്രൂസിന്റെ മറ്റൊരു പൊലീസ് മൂവി ആയിരിക്കും സല്യൂട്ട്. ചിത്രത്തിന്റെ ട്രയിലർ കണ്ട സിനിമാപ്രേമികൾ വലിയ പ്രതീക്ഷയോടെയാണ് ചിത്രത്തിനായി കാത്തിരിക്കുന്നത്. മുംബൈ പൊലീസിന് ശേഷം റോഷൻ ആൻഡ്രൂസ് ഒരുക്കുന്ന പൊലീസ് മൂവി കൂടിയാണ് സല്യൂട്ട്.