നിങ്ങ ഇല്ലുമിനാണ്ടി ആണല്ലേ? അജു വർഗീസിന്റെ എഫ് ബി പോസ്റ്റ് കുത്തിപ്പൊക്കി മലയാളികൾ

അടുത്ത മാസം നടക്കാനിരിക്കുന്ന ട്വന്റി-20 ലോകകപ്പിനുള്ള ഇന്ത്യന്‍ ടീമിന്റെ ഉപദേശകനായി മഹേന്ദ്ര സിങ്ങ് ധോണിയെ നിയമിച്ച ബി.സി.സി.ഐ യുടെ തീരുമാനത്തെ ഇന്ത്യൻ ക്രിക്കറ്റ് ആരാധകർ ആവേശത്തോടെയാണ് സ്വീകരിച്ചിരിക്കുന്നത്. ട്വന്റി 20 ലോകകപ്പിന് ശേഷം രവി ശാസ്ത്രി ഒഴിയുമ്പോള്‍ മുന്‍ നായകന്‍ മഹേന്ദ്രസിങ് ധോണി ഇന്ത്യന്‍ ക്രിക്കറ്റ് ടീം പരിശീലക സ്ഥാനത്തേക്ക് എത്തിയേക്കും. ധോണിയെ പരിശീലകനാക്കാന്‍ ബിസിസിഐ ആലോചിക്കുന്നതായി റിപ്പോര്‍ട്ടുകള്‍ പുറത്തുവരുന്നുണ്ട്. ഇതിനു മുന്നോടിയായാണ് ട്വന്റി 20 ലോകകപ്പ് ടീമിന്റെ ഉപദേശകനായി ധോണിയെ ഇപ്പോള്‍ ചുമതലപ്പെടുത്തിയിരിക്കുന്നത്. ടി 20 ലോകകപ്പില്‍ മികച്ച ഫലം ലഭിച്ചാല്‍ ധോണിയെ മുഖ്യ പരിശീലകന്റെ ചുമതലയേല്‍പ്പിക്കുമെന്നാണ് റിപ്പോര്‍ട്ടുകള്‍ വ്യക്തമാക്കുന്നത്. ഇത്തവണത്തെ ഐപിഎല്‍ മത്സരങ്ങള്‍ കഴിയുന്നതോടെ ധോണി ചെന്നൈ സൂപ്പര്‍ കിങ്‌സില്‍ നിന്നും വിരമിക്കുമെന്നാണ് സൂചന.

ധോണിയുടെ സാന്നിധ്യം ടീമിന് കരുത്തേകുമെന്ന് ഇന്ത്യന്‍ നായകന്‍ വിരാട് കോലിയും കരുതുന്നു. ടീം അംഗങ്ങളുമായി ധോണിക്കുള്ള സൗഹൃദവും അടുപ്പവും ഏറെ ഗുണം ചെയ്യും. ധോണിയെ ഉപദേശകനായി ടീമിനൊപ്പം ചേര്‍ക്കാന്‍ ബിസിസിഐ അധ്യക്ഷന്‍ സൗരവ് ഗാംഗുലിയാണ് ആദ്യം തീരുമാനിച്ചത്. ഇക്കാര്യം സെലക്ഷന്‍ കമ്മിറ്റിയെ അറിയിച്ചിരുന്നു. നായകന്‍ വിരാട് കോലിയുടെ കൂടി അഭിപ്രായം അറിഞ്ഞ ശേഷം അന്തിമ തീരുമാനമെടുത്താല്‍ മതിയെന്നായിരുന്നു ബിസിസിഐയുടെ നിലപാട്.

അതിനിടയിൽ അജു വർഗീസ് രണ്ടു വർഷം മുൻപ് ഫേസ്ബുക്കിൽ കുറിച്ച വാക്കുകൾ ഇപ്പോൾ ആരാധകർ ഏറ്റെടുത്തിരിക്കുകയാണ്. കോച്ച് ധോണിയുടെ നേതൃത്വത്തിൽ ഇന്ത്യ 2023ൽ വേൾഡ് കപ്പ് നേടിയെന്ന വാർത്തയാണ് താൻ വായിക്കുവാൻ പോകുന്നത് എന്നാണ് അജു വർഗീസ് കുറിച്ചത്. #coachMSD എന്നൊരു ഹാഷ്‌ടാഗും താരം അന്ന് പങ്ക് വെച്ചിരുന്നു. പ്രവചനസിംഹമേ, നിങ്ങ ഇല്ലുമിനാണ്ടിയല്ലേ എന്നൊക്കെയാണ് ആരാധകർ ചോദിക്കുന്നത്.