ഒളിച്ചോടില്ലെന്ന് ഞങ്ങൾ ആദ്യമേ തീരുമാനം എടുത്തിരുന്നു; പ്രണയവിശേഷങ്ങളുമായി എലീന

അവതാരകയും നടിയുമായി മലയാളികൾക്ക് മുന്നിൽ തിളങ്ങിയ താരമാണ് എലീന പടിക്കൽ. താരം ഇപ്പോൾ വിവാഹിതയാകുന്നു എന്ന വാർത്തയാണ് പുറത്ത് വരുന്നത്. കോഴിക്കോട് സ്വദേശി രോഹിത് പി.നായർ ആണ് വരൻ. ദീർഘ കാലമായി ഇരുവരും തമ്മിൽ പ്രണയത്തിൽ ആണ്. രോഹിത് എഞ്ചിനീയറിംഗ് കഴിഞ്ഞു സ്വന്തമായി ബിസിനെസ്സിൽ ശ്രദ്ധ കേന്ദ്രീകരിച്ചിരിക്കുകയാണ്. എലീനയുടെ വാക്കുകളിലൂടെ…

വിവാഹം ഉടനെയില്ല കേട്ടോ.. ഇതിപ്പോൾ വിവാഹനിശ്ചയമാണ്. ജനുവരി 20ന് തിരുവനന്തപുരത്ത് വെച്ചാണ് എൻഗേജ്മെൻറ് ചടങ്ങ്. ഒരു ആറേഴുമാസക്കാലം കഴിഞ്ഞേ വിവാഹമുണ്ടാകൂ. 2014ലാണ് 2014ലാണ് ഒരു സുഹൃത്ത് വഴി രോഹിത്തിനെ പരിചയപ്പെടുന്നത്. അന്ന് ഞാൻ ആങ്കറിങ് ഒക്കെ ചെയ്യുന്നുണ്ട്. ക്രൈസ്റ്റിൽ പഠിച്ചു കൊണ്ടിരിക്കുകയാണ്. സിനിമക്കഥയൊക്കെ പോലെ ആദ്യം നേരിൽ കണ്ടപ്പോൾ തന്നെ രോഹിത് പ്രൊപ്പോസ് ചെയ്തു. ഞാനന്ന് ഒരു ടോം ബോയ് മെന്റാലിറ്റിയിൽ നടക്കുകയായിരുന്നു. എനിക്കിതൊന്നും ശരിയാകില്ല എന്നു പറഞ്ഞ് ഞാൻ നോ പറഞ്ഞു. പക്ഷേ രോഹിത് വിട്ടില്ല. എല്ലാ ആഴ്ചയിലും ചെന്നൈയിൽ നിന്നും ബൈക്ക് എടുത്ത് എന്നെ കാണാൻ വരും. വീണ്ടും പറയും. ഞാൻ പഴയ പല്ലവി തന്നെ. അങ്ങനെ കുറച്ചു കഴിഞ്ഞാണ് എന്നാൽ ശരി നമുക്കൊരു ഡീലിലെത്താം. പഠിച്ച് ജോലിയൊക്കെ കിട്ടിയിട്ട് വീട്ടുകാരോട് സംസാരിക്കാം. അന്നും ഇതേ ഇഷ്ടം ഉണ്ടെങ്കിൽ വീട്ടുകാർ സമ്മതിച്ചാൽ മുന്നോട്ട് പോവാം എന്നു പറഞ്ഞു. അങ്ങനെ ഒക്കെയാണ് ഞങ്ങൾ പ്രണയിച്ചു തുടങ്ങിയത്.

ഞങ്ങളുടേത് പൈങ്കിളി പ്രണയമൊന്നുമല്ല. സമ്മതിപ്പിക്കാനായി വീട്ടിൽ പട്ടിണി കിടക്കുക, നിരാഹാരമിരിക്കുക തുടങ്ങിയ പരിപാടികൾ ഒന്നും ചെയ്‌തില്ല. നിങ്ങൾ സമ്മതിച്ചാൽ മാത്രമേ കല്യാണം കഴിക്കൂ, ഒളിച്ചോടുക ഒന്നുമില്ലെന്ന് പാരന്റ്സിനോട് ആദ്യമേ പറഞ്ഞു. അവർ സമ്മതം തരുന്നത് വരെ കാത്തിരിക്കുവാൻ തയ്യാറായിരുന്നു.