അല്ലു അര്‍ജുന്‍ ചിത്രം ‘അങ്ങ് വൈകുണ്ഠപുരത്ത്’ മലയാളം ടീസർ നാളെ പുറത്തിറങ്ങുന്നു

അല്ലു അര്‍ജുന്‍, പൂജ ഹെഗ്‌ഡെ എന്നിവര്‍ മുഖ്യ വേഷത്തിലെത്തിയ ത്രിവിക്രം ശ്രീനിവാസ് സംവിധാനം ചെയ്യുന്ന ഏറ്റവും പുതിയ ചിത്രമാണ് അല വൈകുണ്ഠപുരമുലൂ. ‘അങ്ങ് വൈകുണ്ഠപുരത്ത് ‘ എന്നാണ് ചിത്രത്തിന്‍റെ മലയാളം പേര്. ചിത്രത്തിന്‍റെ മലയാളം ടീസർ നാളെ രാവിലെ 10 മണിക്ക് പുറത്തിറങ്ങും. ചിത്രം ഹോളിവുഡ് ചിത്രമായ ഇന്‍വെന്‍ഷന്‍ ഓഫ് ലയിങ്ങിന്റെ അഡാപ്റ്റേഷന്‍ ആണ്. ജയറാം ചിത്രത്തില്‍ ഒരു പ്രധാന വേഷത്തില്‍ എത്തുന്നുണ്ട്. 2020 ജനുവരി 20നാണ് ചിത്രം തീയറ്ററുകളിൽ എത്തുമെന്ന് പ്രതീക്ഷിക്കുന്നത്.

തബു, നിവേത പെതുരാജ്, സുശാന്ത്, നവദീപ്, സത്യരാജ്, സുനില്‍ തുടങ്ങിയവര്‍ പ്രധാന കഥാപാത്രങ്ങളെ അവതരിപ്പിക്കുന്നു. സണ്‍ ഓഫ് സത്യമൂര്‍ത്തിക്കും ജുലായ്ക്കും ശേഷം അല്ലുവിന്റെയും, തിവിക്രത്തിന്റെയും ഒരുമിച്ചുള്ള മൂന്നാമത്തെ സിനിമയാണിത്. മലയാളി താരം ഗോവിന്ദ് പത്മസൂര്യയും സിനിമയിലുണ്ട്. പൂജ ഹെഗ്ഡ നായികയായി എത്തുന്ന ചിത്രത്തില്‍ ബോളിവുഡ് താരം തബുവാണ് ജയറാമിന്റെ ഭാര്യ വേഷത്തില്‍ എത്തുന്നത്. അല്ലു അര്‍ജുന്‍ ചിത്രത്തിനായുള്ള ജയറാമിന്റെ മേക്ക് ഓവര്‍ നേരത്തേ സോഷ്യല്‍ മീഡിയയില്‍ വൈറലായിരുന്നു. ചിത്രത്തില്‍ സത്യരാജ് ജയറാമിന്റെ അച്ഛനായി എത്തുന്നു. എസ്എസ് തമ്മന്‍ സംഗീതം നല്‍കുന്നു. മൂന്ന് തലമുറയുടെ രസകരമായ കഥ പറയുന്ന അങ്ങ് വൈകുണ്ഠപുരത്ത് മലയാളി പ്രേക്ഷകർക്കും ഇഷ്ടപ്പെടുന്ന രീതിയിൽ ആയിരിക്കുമെന്നുറപ്പ്.