മോഹൻലാലിനെ കുറച്ചുപേർ ടാർഗറ്റ് ചെയ്യുന്നു, അദ്ദേഹം എന്ത് ചെയ്തിട്ടാണ് ഇത്രയും പ്രശ്നമുണ്ടാകുന്നതെന്ന് മനസിലാകുന്നില്ല: ഷാജി കൈലാസ്

മലയാളസിനിമയിലെ എക്കാലത്തെയും മികച്ച കൂട്ടുകെട്ടാണ് മോഹൻലാലും ഷാജി കൈലാസും. നിരവധി സിനിമകളാണ് ഈ ഹിറ്റു കൂട്ടുകെട്ട് നമുക്ക് സമ്മാനിച്ചിരിക്കുന്നത്. ആറാം തമ്പുരാൻ, നരസിംഹം എന്നീ ഹിറ്റ് ചിത്രങ്ങൾ മലയാളികൾക്ക് സമ്മാനിച്ചത് ഈ പ്രിയ കൂട്ടുകെട്ടാണ്. 12 വർഷങ്ങൾക്ക് ശേഷം മോഹൻലാൽ – ഷാജി കൈലാസ് കൂട്ടുകെട്ടിൽ ഒരുങ്ങിയ ചിത്രമായിരുന്നു എലോൺ. എന്നാൽ, ചിത്രം റിലീസ് ആയതിനു പിന്നാലെ നിരവധി വിമർശനങ്ങളാണ് ചിത്രത്തിന് എതിരെ ഉയർന്നത്.

എലോൺ സിനിമയ്ക്ക് എതിരെയും മോഹൻലാലിന് എതിരെയും ഉയർന്ന വിമർനങ്ങൾക്ക് മറുപടിയുമായി എത്തിയിരിക്കുകയാണ് ഷാജി കൈലാസ്. അടുത്ത കാലത്തായി മോഹൻലാൽ ടാർഗറ്റ് ചെയ്യപ്പെടുന്നുണ്ടെന്ന് വ്യക്തമാക്കുകയാണ് ഷാജി കൈലാസ്. അദ്ദേഹത്തെ സ്നേഹിക്കുന്നവർ പതറിപ്പോകുകയാണെന്നും എന്തുകൊണ്ടാണ് ഇങ്ങനെയൊക്കെ സംഭവിക്കുന്നതെന്ന് മനസിലാകുന്നില്ലെന്നും അദ്ദേഹം പറ‌ഞ്ഞു.

‘ഈയടുത്തായി മോഹന്‍ലാലിനെ ടാര്‍ഗറ്റ് ചെയ്യുന്നതായി കാണുന്നുണ്ട്. അദ്ദേഹം എന്ത് ചെയ്തിട്ടാണ് ഇത്രയും പ്രശ്നമുണ്ടാകുന്നതെന്ന് മനസിലാകുന്നില്ല. അദ്ദേഹത്തെ സ്നേഹിക്കുന്നവര്‍ പതറിപ്പോവുകയാണ്. പ്രത്യേക മാനസികാവസ്ഥയുള്ളവരാണ് ഇത് ചെയ്യുന്നതെന്ന് തോന്നുന്നു. അവരുടെ തൊഴിലാണിതെന്ന് തോന്നുന്നത്. അവര്‍ സന്തോഷിക്കുന്നു. ബാക്കിയുള്ളവരാണ് വിഷമിക്കുന്നത്’ – ബിഹൈന്‍ഡ് വുഡ്‌സിന് നല്‍കിയ അഭിമുഖത്തില്‍ ആയിരുന്നു സംവിധായകന്റെ പ്രതികരണം.