‘ഒലെലേ’ പാട്ടിനൊപ്പം കളർഫുൾ ആയി അമൃതയും ഗോപി സുന്ദറും; പാട്ട് അടിപൊളിയെന്ന് ആരാധകർ, തല്ലിപ്പൊളിയെന്ന് മറ്റു ചിലർ

ഒരു തകർപ്പൻ പാട്ടുമായി വീണ്ടും സോഷ്യൽ മീഡിയ കീഴടക്കുകയാണ് അമൃത സുരേഷും ഗോപി സുന്ദറും. ‘ഒലെലെ’ എന്ന ഗാനമാണ്. വളരെ കളർഫുൾ ആയാണ് പാട്ടിന്റെ ചിത്രീകരണം, അമൃതയും ഗോപിയും പാട്ടിൽ പ്രത്യക്ഷപ്പെടുന്നുണ്ട്. ഒരു മിനിറ്റ് നീണ്ടു നിൽക്കുന്ന സംഗീതം എന്ന് പറഞ്ഞാണ് ഒലെലെ അവതരിപ്പിച്ചിരിക്കുന്നത്. ബി കെ ഹരിനാരായണൻ ആണ് ഒലേലെ പാട്ടിന് വരികൾ രചിച്ചിരിക്കുന്നത്. ഗോപി സുന്ദർ തന്നെയാണ് സംഗീതസംവിധാനം. ഗോപി സുന്ദറും അമൃത സുരേഷും ചേർന്നാണ് ഗാനം ആലപിച്ചിരിക്കുന്നത്.

പാട്ടിന് വൻ വരവേൽപ്പാണ് ലഭിച്ചിരിക്കുന്നത്. നിരവധി പേർ പാട്ട് അടിപൊളിയാണെന്ന് കുറിച്ചപ്പോൾ ഇഷ്ടപ്പെടാത്തവർ അത്തരത്തിലുള്ള അഭിപ്രായവും രേഖപ്പെടുത്തിയിട്ടുണ്ട്. അമൃതയും ഗോപി സുന്ദറും തമ്മിലുള്ള ബന്ധം സോഷ്യൽ മീഡിയയിൽ പല തരത്തിലുള്ള ചർച്ചയാകുന്ന സാഹചര്യത്തിലാണ് പുതിയ മ്യൂസിക് വീഡിയോയുമായി ഇരുവരും എത്തിയിരിക്കുന്നത്. പാട്ടിന്റെ വീഡിയോ ഗോപി സുന്ദറും തന്റെ ഇൻസ്റ്റഗ്രാം സ്റ്റോറിയിൽ പങ്കുവെച്ചിട്ടുണ്ട്. അതേസമയം, അമൃതയ്ക്ക് പിറന്നാൾ ആശംസകളും നേർന്നിട്ടുണ്ട് ഗോപി സുന്ദർ. ‘ഹാപ്പി ബേർത്ത്ഡേ, എന്റെ പ്രിയപ്പെട്ട കണ്മണി’ എന്നാണ് അമൃതയോട് ഒപ്പമുള്ള ചിത്രം പങ്കുവെച്ച് ഗോപി സുന്ദർ കുറിച്ചത്.

പ്രണയത്തിലാണെന്നും ഒരുമിച്ച് ജീവിക്കാൻ തീരുമാനിച്ചെന്നും അടുത്തിടെ ആയിരുന്നു ഗോപി സുന്ദറും അമൃത സുരേഷും ചേർന്ന് വെളിപ്പെടുത്തിയത്. ജീവിതത്തിലെ വിഷമഘട്ടങ്ങൾ പിന്നിട്ട് ഒരുമിച്ച് മനോഹര യാത്ര ആരംഭിക്കുകയാണെന്നും ആരാധകരുടെ സ്നേഹവും പ്രാർത്ഥനയും എന്നും തങ്ങൾക്കൊപ്പം ഉണ്ടാകണമെന്നും അമൃതയും ഗോപി സുന്ദറും കുറിപ്പിലൂടെ അഭ്യർത്ഥിച്ചിരുന്നു.