വാട്‌സ് ആപ്പ് സ്റ്റാറ്റസുകളില്‍ നിറഞ്ഞ മിടുക്കി ഇതാ ഇവിടെയുണ്ട്

കുറച്ചു ദിവസമായി സോഷ്യല്‍ മീഡിയയില്‍ നിറഞ്ഞു നില്‍ക്കുകയാണ് ഒരു കൊച്ചു മിടുക്കി. സിറ്റി സ്ലീസ് എന്ന ആല്‍ബത്തിലെ ‘ Run Run I’m Gonna Get It ‘ എന്ന മനോഹര ഗാനത്തിനൊപ്പം അഭിനയിച്ചാണ് ഇവള്‍ വൈറലായത്. ഇന്‍ഡോ അമേരിക്കന്‍ റാപ്പറും സിംഗറുമായ രാജ് കുമാരിയുടെ ആദ്യത്തെ ഇന്ത്യന്‍ ആല്‍ബം ആയിരുന്നു 2017ല്‍ പുറത്തിറങ്ങിയ സിറ്റി സ്ലീസ്. അതിലെ ‘ Run Run I’m Gonna Get It ‘ എന്ന കഠിനമായ വരികള്‍ വളരെ വ്യക്തമായി പാടിയാണ് ആ മിടുക്കി എല്ലാവരേയും അത്ഭുതപ്പെടുത്തിയത്.

വീഡിയോയില്‍ അതിമനോഹരമായി പുരികം ഉയര്‍ത്തുകയും ചെയ്യുന്നുണ്ട് ഈ കൊച്ചു സുന്ദരി. ഇതിനോടകം നിരവധി പേരുടെ ഇന്‍സ്റ്റഗ്രാം, വാട്‌സ്ആപ്പ്, ഫേസ്ബുക്ക്, ട്വിറ്റര്‍ തുടങ്ങി എല്ലാ സമൂഹ മാധ്യമങ്ങളിലെയും സ്റ്റാറ്റസും പോസ്റ്റുമായി മാറിയിരിക്കുകയാണ് ഈ വീഡിയോ.

കാഴ്ചയില്‍ മലയാളിത്തം തോന്നുന്ന ആ സുന്ദരിക്കുട്ടിയെ ആരെന്നു തിരയുകയായിരുന്നു സോഷ്യല്‍ മീഡിയ. ഒരുപാട് നേരത്തെ അന്വേഷണങ്ങള്‍ക്കൊടുവില്‍ ആ മിടുക്കി കുട്ടിയെ കണ്ടെത്തിയിരിക്കുകയാണ് ഞങ്ങള്‍. ഏയ്ഞ്ചല്‍ റിതി എന്നാണ് ആ കൊച്ചു മിടുക്കിയുടെ പേര്. കാഴ്ചയില്‍ ഒരു മലയാളി കുട്ടിയാണെന്ന് പലര്‍ക്കും തോന്നിയെങ്കിലും ആള് മലയാളി അല്ല. കൊല്‍ക്കത്ത സ്വദേശിയാണ് യുകെജിയില്‍ പഠിക്കുന്ന അഞ്ചു വയസ്സ് മാത്രം പ്രായമുള്ള ഈ സുന്ദരിക്കുട്ടി.

കൊല്‍ക്കത്ത സ്വദേശികളായ രവി മേഹ്തയുടെയും ജ്യോതി മെഹ്‌റയുടെയും ഏക മകളാണ് ഏയ്ഞ്ചല്‍ റിതി. അച്ഛന്‍ രവി മേഹ്ത ബിസ്സിനെസ്സുകാരനും അമ്മ ജ്യോതി മെഹ്റ പോലീസ് കോണ്‍സ്റ്റബിളും ആണ്. വളരെ ചെറുപ്പത്തിലേ തന്നെ റിതി അഭിനയിക്കാനുള്ള തന്റെ കഴിവ് പ്രകടമാക്കിയിരുന്നു എന്നാണ് ‘അമ്മ പറയുന്നത്. അങ്ങനെ അവളുടെ കഴിവുകളെ പ്രോത്സാഹിപ്പിക്കാന്‍ ടിക്റ്റോക്കിലും യൂട്യുബിലും മകളുടെ പേരില്‍ അക്കൗണ്ട് തുടങ്ങുകയായിരുന്നു.