എന്നും വൈകിട്ട് ഷട്ടിൽ കളിച്ചു, മധുരം ഉപേക്ഷിച്ചു; തടി കുറച്ച് മെലിഞ്ഞതിനെ കുറിച്ച് അന്ന രേഷ്മ രാജൻ

സിനിമയിൽ എത്തുന്നതിന് മുൻപ് നഴ്സായി ജോലി ചെയ്തിരുന്ന താരമായിരുന്നു അന്ന രാജൻ. നഴ്സായി ജോലി ചെയ്തിരുന്ന ഹോസ്പിറ്റലിന് വേണ്ടി മോഡലായി ചെയ്ത ഒരു പരസ്യത്തിലൂടെ ആണ് അന്ന സിനിമയിലേക്ക് എത്തുന്നത്. അങ്കമാലി ഡയറിസ് ആയിരുന്നു അന്നയുടെ ആദ്യത്തെ ചിത്രം. ഈ ചിത്രത്തിലെ ലിച്ചി എന്ന കഥാപാത്രം അന്നയ്ക്ക് ഏറെ പ്രേക്ഷകശ്രദ്ധ നേടിക്കൊടുത്തു. പിന്നീടങ്ങോട്ട് അന്നക്ക് കൈനിറയെ കഥാപാത്രങ്ങളായിരുന്നു. സച്ചി സംവിധാനം ചെയ്ത പൃഥ്വിരാജ് ബിജുമേനോൻ എന്നിവർ പ്രധാന വേഷങ്ങളിലെത്തിയ അയ്യപ്പനും കോശിയും എന്ന ചിത്രത്തിൽ പൃഥ്വിരാജിന്റെ നായികാ വേഷം കൈകാര്യം ചെയ്തതും അന്നയായിരുന്നു. സോഷ്യൽ മീഡിയയിൽ ഏറെ സജീവമായ താരം ഇപ്പോൾ തന്റെ മേക്കോവർ ചിത്രം സോഷ്യൽ മീഡിയയിലൂടെ പങ്കുവയ്ക്കുകയാണ്. തടി കുറച്ച് കൂടുതൽ സുന്ദരിയായിട്ടാണ് താരം എത്തുന്നത്. വനിതയ്ക്ക് നൽകിയ അഭിമുഖത്തിൽ തന്റെ മെയ്ക്ക് ഓവറിനെപ്പറ്റി അന്ന സംസാരിച്ചിരുന്നു.

താരത്തിന്റെ വാക്കുകൾ:

ലോക്ക് ഡൗൺ ആയപ്പോൾ മറ്റൊന്നും ചെയ്യാനില്ലാതായി. പുറത്തിറങ്ങാൻ പറ്റില്ല. വർക്കില്ല. ആകെ ബോറായി. എപ്പോഴും ഫോണിൽ മാത്രം നോക്കിയിരിക്കാൻ പറ്റില്ലല്ലോ. എങ്കിൽ ഷട്ടിൽ കളിച്ചാലോ എന്ന് ആലോചിച്ചു. അങ്ങനെ ഞാനും ചേട്ടനും കൂടി കളിച്ച് തുടങ്ങി. ഇപ്പോൾ എല്ലാ ദിവസവും രാവിലെയും വൈകുന്നേരവും മണിക്കൂറുകളോളം ഷട്ടിൽ കളിക്കുന്നുണ്ട്. ഒപ്പം മധുരം കഴിക്കുന്ന് തീരെ കുറയ്ക്കുകയും ഭക്ഷണം കഴിക്കുന്ന ശൈലി മാറ്റുകയും ചെയ്തു. എല്ലാം കൂടി ചേർന്നപ്പോൾ സംഭവിച്ച മാറ്റമാണ് ഇപ്പോൾ കാണുന്നത്.ചിത്രം കണ്ട് കോളുകളും മെസേജുകളും കമന്റുകളും വന്നു തുടങ്ങിയപ്പോഴാണ് നല്ല മാറ്റം ഉണ്ടായിട്ടുണ്ടല്ലോ എന്ന് എനിക്കും തോന്നിയത്. സന്തോഷം. എങ്കിലും കൃത്യമായി എത്ര കിലോ കുറഞ്ഞു എന്നൊന്നും ഞാൻ നോക്കിയില്ല