കേരളത്തിലെ ജയിലുകൾ ബിഗ് ബോസ്സിലേത് പോലെയായിരുന്നുവെങ്കിൽ എന്ന് ആഗ്രഹിക്കുന്നു: അനൂപ് ചന്ദ്രൻ

ബിഗ് ബോസ് മലയാളത്തിന്റെ ആദ്യ സീസൺ അതിൻ്റെ അവസാനത്തോട് അടുക്കുകയാണ്. കേരളം കാത്തിരിക്കുന്നതും ആരാണ് വിജയി എന്നറിയാനാണ്. 100 ദിവസം പുറം ലോകവുമായി യാതൊരു ബന്ധവുമില്ലാതെയാണ് മത്സരാർത്ഥികൾ കഴിഞ്ഞിരുന്നത്. ബിഗ് ബോസ് നൽകുന്ന ടാസ്കുകൾ ചെയ്യുക എന്നതാണ് അവർക്കുള്ള വെല്ലുവിളി. അതിനിടയിലെ അസ്വാരസ്യങ്ങളും സൗഹൃദവുമെല്ലാമായി പരിപാടി മുന്നേറുന്നു. ലാലേട്ടനാണ് പ്രോഗ്രാമിന്റെ അവതാരകൻ. 70 ദിവസങ്ങൾക്ക് ശേഷം ബിഗ് ബോസിൽ നിന്നും പുറത്താക്കപ്പെട്ട ‘നിലപാട് മാമൻ’ എന്ന വിളിപ്പേര് സ്വന്തമാക്കിയ അനൂപ് ചന്ദ്രൻ മനസ്സ് തുറക്കുന്നു.

“കേരളം എന്നെ അംഗീകരിച്ചതിന് ഏറെ നന്ദിയുണ്ട്. ഹൗസിൽ പലരുമായും വാക്കേറ്റത്തിൽ ഏർപ്പെടേണ്ടി വന്നിട്ടുണ്ട്. പക്ഷേ ഹൗസിന് പുറത്ത് അവരെല്ലാം എന്റെ പ്രിയപ്പെട്ടവർ ആയിരിക്കും. അവിടെയുണ്ടായിരുന്ന 70 ദിവസങ്ങൾ എനിക്ക് 70 വർഷങ്ങൾ പോലെയാണ് തോന്നിയത്. പുറംലോകവുമായി യാതൊരു ബന്ധവുമില്ലാതെ ഇത്രയും നാൾ എനിക്ക് ജീവിക്കുവാൻ കഴിയുമെന്ന് തെളിയിക്കാൻ കഴിഞ്ഞതിൽ ഞാൻ അഭിമാനിക്കുന്നു.” അനൂപ് ചന്ദ്രൻ പറഞ്ഞു.

ഒരു സഹോദരിയെ പോലെ കരുതിയ പേർളി മാണി നടത്തിയ ആരോപണങ്ങളെ ഓർത്ത് അനൂപ് ചന്ദ്രൻ സങ്കടവാനുമാണ്. “ഞാൻ സ്ത്രീകളെ ബഹുമാനിക്കാത്ത ഒരാളാണെന്ന് പേർളി പറഞ്ഞു. കൂടാതെ സൗഹൃദപരമായ എന്റെ ഒരു സമീപനത്തെ തെറ്റായി കാണുകയും ചെയ്‌തു. അതിൽ എനിക്ക് വിഷമമുണ്ട്.” പേർളിയുടെ സോഷ്യൽ മീഡിയ സപ്പോർട്ടിനെയും അനൂപ് ചന്ദ്രന് സംശയമുണ്ടെന്ന് അദ്ദേഹം പറഞ്ഞു.

ബിഗ് ബോസ്സ് ഒരു ജയിൽ പോലെ തോന്നുമെങ്കിലും ഒരു വ്യക്തിയിലെ ഗുണങ്ങളെ പുറത്ത് കൊണ്ട് വരുവാൻ അത് സഹായിക്കുമെന്ന് അനൂപ് അഭിപ്രായപ്പെട്ടു. “കേരളത്തിലെ ജയിലുകളെല്ലാം ബിഗ് ബോസ്സിലെ പോലെ തയ്യാറാക്കിയിരുന്നെങ്കിൽ എന്ന് ആഗ്രഹിച്ചുപോകുന്നു. രസകരമായ ഗെയിംസും ടാസ്ക്കുകളും എല്ലാമായി ഏതൊരു കൊടും കുറ്റവാളിയെയും നല്ലവനാക്കാൻ അത് ഉപകരിക്കും.” അനൂപ് ചന്ദ്രൻ കൂട്ടിച്ചേർത്തു.