UAE ഗോൾഡൻ വിസ സ്വന്തമാക്കി ആന്റണി പെരുമ്പാവൂർ; മോഹൻലാലിനും ആശിർവാദ് ഫാമിലിക്കും നന്ദി

യു എ ഇ ഗോൾഡൻ വിസ സ്വന്തമാക്കി നടനും നിർമ്മാതാവുമായ ആന്റണി പെരുമ്പാവൂർ. സോഷ്യൽ മീഡിയയിലൂടെ ആന്റണി പെരുമ്പാവൂർ തന്നെയാണ് ഇക്കാര്യം അറിയിച്ചത്. ഗോൾഡൻ വിസ നൽകിയതിന് യു എ ഇ അധികൃതർക്ക് അദ്ദേഹം നന്ദി അറിയിക്കുകയും ചെയ്തു. യു എ ഇ ഗോൾഡൻ വിസ സ്വീകരിക്കുന്ന ചിത്രങ്ങൾ പങ്കുവെച്ച് ചെറിയ ഒരു അടിക്കുറിപ്പോടെയാണ് ആന്റണി പെരുമ്പാവൂർ സന്തോഷവാർത്ത പങ്കുവെച്ചത്.

‘അബുദാബി സർക്കാരിൽ നിന്ന് ഗോൾഡൻ വിസ സ്വീകരിക്കാൻ കഴിഞ്ഞതിൽ വിനീതനും നന്ദിയും ഉണ്ട്. യു എ ഇ രാഷ്ട്രത്തലവനായ ഹിസ് റോയൽ ഹൈനസ് ഷെയ്ഖ് ഖലിഫ ബിൻ സായിദ് ബിൻ സുൽത്താൻ അൽ നഹ്യാന് ഞാൻ നന്ദി പറയുന്നു; അബുദാബി ചേംബർ ഓഫ് കൊമേഴ്സ് & ഇൻഡസ്ട്രി വൈസ് ചെയർമാൻ എം എ യൂസഫ് അലി സാർ; ടുഫോർ 54-ലെ ഗവൺമെന്റ് സർവീസസ് മേധാവി സയിദ ബദ്രേയ്യ അൽ മസ്‌റൂയി, അബുദാബി ചേംബർ ഓഫ് കൊമേഴ്സ് ആൻഡ് ഇൻഡസ്ട്രി ഡയറക്ടർ ജനറൽ എച്ച് ഇ മുഹമ്മദ് ഹെലാൽ അൽ മ്ഹെരി, മറ്റ് ഉദ്യോഗസ്ഥർ എന്നിവർക്കും നന്ദി പറയുന്നു. മോഹൻലാൽ സാറിന്റെ നന്മകൾക്കും ആശംസകൾക്കും അദ്ദേഹത്തോട് നന്ദി അറിയിക്കുന്നു, മലയാള സിനിമാ മേഖലയ്ക്കും ആശിർവാദ് കുടുംബത്തിനും ഹൃദയം നിറഞ്ഞ നന്ദി അറിയിക്കുന്നു.’ – യു എ ഈ ഗോൾഡൻ വിസ സ്വീകരിക്കുന്ന ചിത്രങ്ങൾ പങ്കുവെച്ചു കൊണ്ട് ആന്റണി പെരുമ്പാവൂർ കുറിച്ചു.

നിരവധി പേരാണ് യു എ ഇ ഗോൾഡൻ വിസ സ്വന്തമാക്കിയ ആന്റണി പെരുമ്പാവൂരിന് ആശംസകളുമായി കമന്റ് ബോക്സിൽ എത്തിയത്. നിർമാതാവായി മലയാള സിനിമയിൽ തിളങ്ങി നിൽക്കുന്ന അദ്ദേഹം നിരവധി സിനിമകളിലും അഭിനയിച്ചിട്ടുണ്ട്. 1991ൽ ‘കിലുക്കം’ സിനിമയിലാണ് ആന്റണി പെരുമ്പാവൂർ ആദ്യമായി മുഖം കാണിച്ചത്. മോഹൻലാൽ നായകനായ 27 ചിത്രങ്ങളിലും പ്രണവ് മോഹൻലാൽ നായകനായ രണ്ട് ചിത്രങ്ങളിലും ആന്റണി അഭിനയിച്ചിട്ടുണ്ട്. 2000 ൽ പുറത്തിറങ്ങിയ ‘നരസിംഹം’ ആണ് ആശിർവാദ് നിർമിച്ച ആദ്യചിത്രം. മരക്കാർ ആണ് ആശിർവാദ് സിനിമാസിന്റെ ബാനറിൽ പുറത്തിറങ്ങിയ അവസാന ചിത്രം. ഏതാനും ദിവസങ്ങൾക്ക് മുമ്പ് നസ്രിയയ്ക്കും ഫഹദിനും യു എ ഇ ഗോൾഡൻ വിസ ലഭിച്ചിരുന്നു.