ലൂസിഫറിലെ ആ പൊട്ടിപ്പൊളിഞ്ഞ പള്ളി പുനർനിമ്മിച്ച് നൽകി ആന്റണി പെരുമ്പാവൂർ

മോഹൻലാൽ പൃഥ്വിരാജ് കൂട്ടുകെട്ടിൽ ഒരുങ്ങിയ ലൂസിഫർ എന്ന ചിത്രത്തിലെ ചില പ്രധാന രംഗങ്ങൾ ചിത്രീകരിച്ച പൊട്ടിപ്പൊളിഞ്ഞ ഒരു പള്ളി പ്രേക്ഷക മനസ്സിൽ തങ്ങി നിൽക്കുന്ന ഒന്നാണ്. അത് ഒരു സെറ്റ് ഇട്ടതാണെന്ന് പലരും വിചാരിച്ചെങ്കിലും അതൊരു യഥാർത്ഥ പള്ളിയായിരുന്നു എന്നും പറഞ്ഞ വാക്ക് പാലിച്ചു കൊണ്ട് ആന്റണി പെരുമ്പാവൂർ ഇപ്പോൾ ആ പള്ളി പുനർനിർമ്മിച്ചു കൊടുത്തു എന്നുമുള്ള പുതിയ വാർത്തകൾ പുറത്തു വന്നിരിക്കുകയാണ്. ഈ പൊട്ടിപ്പൊളിഞ്ഞ ദേവാലയം സ്ഥിതി ചെയ്തിരുന്നത് ഇടുക്കിയില്‍ ഉപ്പുതറയ്ക്കടുത്ത് ലോണ്‍ട്രി രണ്ടാം ഡിവിഷനിലായിരുന്നു.

ലൂസിഫർ ചിത്രീകരണത്തിനായി അണിയറപ്രവർത്തകർ ദേവാലയത്തിൽ എത്തിയപ്പോൾ ഒരു വാക്കു പറഞ്ഞിരുന്നു. ചിത്രത്തിന്റെ ഷൂട്ടിംഗ് പൂർത്തിയാകുന്ന മുറയ്ക്ക് നാട്ടുകാർക്കായി നവീകരിച്ച ഒരു ദേവാലയം തിരികെ നൽകാമെന്ന വാക്കായിരുന്നു അത്. അത് പാലിച്ചു കൊണ്ട് എട്ട് ലക്ഷം രൂപയോളം മുടക്കി ആശിർവാദ് സിനിമാസ് ഇപ്പോൾ ദേവാലയം പുനർനിർമ്മിച്ച് കൊടുത്തിരിക്കുകയാണ്. ജെ.എം വില്‍ക്കി എന്ന സായിപ്പ് ലോണ്‍ട്രിയിലെ നാല് ഡിവിഷനുകളിലുമുള്ള വിശ്വാസികള്‍ക്ക് ആരാധന നടത്തുന്നതിന് വേണ്ടിയാണ് ഈ ദേവാലയം സ്ഥാപിച്ചത്.