‘നേര്’ കണ്ട് ഇമോഷണലായി ആന്റണി പെരുമ്പാവൂർ, തിയറ്ററിൽ നിന്നും പൊട്ടിക്കരഞ്ഞ് പുറത്തേക്കിറങ്ങി ഭാര്യ ശാന്തിയും

മലയാളത്തിന്റെ പ്രിയനടൻ മോഹൻലാൽ നായകനായി എത്തിയ ചിത്രം ‘നേര്’ പ്രേക്ഷകരെ കീഴടക്കി കുതിപ്പ് ആരംഭിച്ചിരിക്കുകയാണ്. കോർട്ട് റൂം ഡ്രാമ വിഭാഗത്തിൽപ്പെടുന്ന ചിത്രത്തിൽ പക്കാ കാരക്ടർ റോളിലാണ് മോഹൻലാൽ എത്തിയിരിക്കുന്നത്. തികച്ചും ഇമോഷണൽ ആണ് ചിത്രം. മോഹൻലാലിന്റെ വളരെ മികച്ച തിരിച്ചു വരവെന്നാണ് ചിത്രം കണ്ടിറങ്ങിയവർ ഒരേ സ്വരത്തിൽ അഭിപ്രായപ്പെടുന്നത്. സിനിമ കണ്ട് തിയറ്ററിൽ നിന്ന് വളരെ ഇമോഷണലായി പുറത്തേക്കിറങ്ങുന്ന ആന്റണി പെരുമ്പാവൂരിന്റെയും ഭാര്യയുടെയും വീഡിയോ ആണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്. തിയറ്ററിൽ നിന്നും പൊട്ടിക്കരഞ്ഞു കൊണ്ടാണ് ആന്റണി പെരുമ്പാവൂരിന്റെ ഭാര്യ ശാന്തി പുറത്തേക്ക് ഇറങ്ങിയത്. അനശ്വര ഗ്രേറ്റ് ആണെന്ന് ശാന്തി പറഞ്ഞു. മോഹൻലാലിന്റെ പ്രകടനം കണ്ടാണോ ഇമോഷണലായത് എന്ന ചോദ്യത്തിന് അതേ എന്നായിരുന്നു ശാന്തിയുടെ മറുപടി.

ആന്റണി പെരുമ്പാവൂരും സിനിമ കണ്ട് ഇമോഷണലാകുന്നത് വീഡിയോയിൽ കാണാം. ഇതുപോലൊരു സിനിമയ്ക്ക് വേണ്ടിയാണ് കാത്തിരുന്നതെന്ന് പറഞ്ഞ ആന്റണി പെരുമ്പാവൂർ വളരെ സന്തോഷമുണ്ടെന്നും പറഞ്ഞു. എറണാകുളം കവിത തിയറ്ററില്‍ ആയിരുന്നു ഇരുവരും സിനിമ കണ്ടത്. ആദ്യ ഷോയിൽ തന്നെ ചിത്രത്തിന് മികച്ച പ്രതികരണം ലഭിച്ചതോടെ ടിക്കറ്റ് ബുക്കിങ്ങിൽ വലിയ വർദ്ധനവ് ആണ് വന്നിരിക്കുന്നത്. ഏതായാലും ഒരു ഇടവേളയ്ക്ക് ശേഷം പ്രിയപ്പെട്ട താരം പക്കാ കാരക്ടർ റോളിൽ എത്തിയതിന്റെ സന്തോഷത്തിലാണ് ആരാധകരും. അനശ്വര രാജന്‍, സിദ്ധിഖ് എന്നിവരുടെ കഥാപാത്രങ്ങളും മികച്ച പ്രകടനമാണ് കാഴ്ചവെച്ചത്.

സിദ്ദിഖ്, പ്രിയാമണി, ജഗദീഷ്, അനശ്വര രാജൻ, ശാന്തി മായാദേവി, ഗണേഷ് കുമാർ എന്നിവരാണ് ചിത്രത്തിൽ മറ്റ് പ്രധാനപ്പെട്ട കഥാപാത്രങ്ങളെ അവതരിപ്പിക്കുന്നത്. ശാന്തി മായാദേവിയാണ് നേരിന്‍റെ തിരക്കഥ രചിച്ചിരിക്കുന്നത്. ജീത്തു ജോസഫ് ആവശ്യപ്പെട്ടത് അനുസരിച്ചാണ് ശാന്തി തിരക്കഥ ഒരുക്കിയത്. സതീഷ് കുറുപ്പ് ആണ് ചിത്രത്തിന്റെ ഛായാഗ്രഹണം. ‘നീതി തേടുന്നു’ എന്നാണ് ഈ മോഹന്‍ലാല്‍ ചിത്രത്തിന്‍റെ ടാഗ് ലൈന്‍. വിഷ്ണു ശ്യാം ആണ് ചിത്രത്തിന്റെ സംഗീതസംവിധാനം നിർവഹിക്കുന്നത്.