പ്രായത്തെ വെല്ലുന്ന ചെറുപ്പം; പതിനാറ് കിലോ കുറച്ച് അനുപം ഖേര്‍; പ്രചോദനമെന്ന് ആരാധകര്‍

മികച്ച കഥാപാത്രങ്ങളിലൂടെ ബോളിവുഡില്‍ തന്റേതായ ഇടം കണ്ടെത്തിയ നടയാണ് അനുപം ഖേര്‍. അദ്ദേഹത്തിന്റെ ഓരോ കഥാപാത്രങ്ങളും വിസ്മയിപ്പിക്കുന്നതാണ്. കഴിഞ്ഞ ദിവസം അനുപം ഖേറിന്റെ 67-ാം ജന്മദിനമായിരുന്നു. 67-ാം വയസില്‍ ഫിറ്റ്‌നസ് കാത്തുസൂക്ഷിക്കുന്നതിന്റെ രഹസ്യം പങ്കുവച്ചിരിക്കുകയാണ് താരം. ആരാധകര്‍ക്ക് പ്രചോദനമാണ് താരം ഇന്‍സ്റ്റഗ്രാമില്‍ കുറിച്ച വാക്കുകള്‍.

കഴിഞ്ഞ ഏതാനും വര്‍ഷങ്ങളായി ശരീരത്തെ രൂപപ്പെടുത്തുന്നില്‍ താന്‍ കൈവരിച്ച പതിയെയുള്ള പുരോഗതിയെന്നാണ് ചിത്രങ്ങള്‍ പങ്കുവച്ച് അനുപം ഖേര്‍ കുറിച്ചത്. ഫിറ്റ്‌നസിനെ ഗൗരവത്തോടെയെടുത്ത് തന്റെതന്നെ ഒരു മികച്ച വേര്‍ഷനായി കാണപ്പെടുക എന്നത് തന്റെ സ്വപ്‌നമായിരുന്നുവെന്ന് അനുപം ഖേര്‍ പറയുന്നു. ഫിറ്റനസ് യാത്രയില്‍ നടന്നു തുടങ്ങിയ താന്‍ മറ്റ് എല്ലാ കാര്യങ്ങളും പങ്കുവയ്ക്കുന്നപോലെ ഈ യാത്രയെപറ്റിയും നിങ്ങളോട് ഷെയര്‍ ചെയ്യാം. ഒരു വര്‍ഷത്തിന് ശേഷം ഒരു പുതിയ ഞാനായി നിങ്ങള്‍ക്കൊപ്പം ജന്മദിനം ആഘോഷിക്കാമെന്ന് പ്രത്യാശിക്കുന്നുവെന്നും അനുപം ഖേര്‍ പറഞ്ഞു. അനുപം ഖേറിനെ അഭിനന്ദിച്ച് ആരാധകരും രംഗത്തെത്തി. 67 വയസിലും ഫിറ്റ്‌നസ് കാത്ത് സൂക്ഷിക്കുന്ന താരം പ്രചോദനമാണെന്ന് ആരാധകര്‍ പറഞ്ഞു.

രണ്ട് വര്‍ഷം കൊണ്ട് പതിനാറ് കിലോയാണ് അനുപം ഖേര്‍ കുറച്ചത്. ഇക്കാര്യം ഒരു അഭിമുഖത്തില്‍ അനുപം ഖേര്‍ വെളിപ്പെടുത്തിയിരുന്നു. ബോളിവുഡ് താരങ്ങളായ സല്‍മാന്‍ ഖാന്‍, അക്ഷയ് കുമാര്‍, അനില്‍ കുമാര്‍ എന്നിവരാണ് തന്റെ ഫിറ്റ്‌നസ് പ്രചോദനമെന്നും അനുപം ഖേര്‍ പറഞ്ഞിരുന്നു.