മോഷൻ പോസ്റ്ററുമായി ‘അപ്പൻ’ എത്തി; ട്രയിലർ വെള്ളിയാഴ്ച എത്തും

സണ്ണി വെയിനെ നായകനാക്കി മജു സംവിധാനം ചെയ്യുന്ന ചിത്രമായ ‘അപ്പൻ’ മോഷൻ പോസ്റ്റർ പുറത്തിറക്കി. ചിത്രത്തിന്റെ ഒഫീഷ്യൽ ട്രയിലർ വെള്ളിയാഴ്ച വൈകുന്നേരം ആറു മണിക്ക് പുറത്തു വിടും. ടൈനി ഹാൻഡ്‌സ് പ്രൊഡക്ഷൻസിന്റെ ബാനറിൽ ജോസ്‌കുട്ടി മഠത്തിലും രഞ്ജിത് മനമ്പ്രക്കാട്ടും സണ്ണി വെയ്ൻ പ്രൊഡക്ഷൻസും ചേർന്നാണ് ചിത്രത്തിന്റെ നിർമ്മാണം.

ചിത്രത്തില് വ്യത്യസ്ത ഗെറ്റപ്പിലാണ് സണ്ണി വെയിൻ എത്തുന്നത്. ടാപ്പിംഗ് തൊഴിലാളിയായാണ് ചിത്രത്തിൽ സണ്ണി വെയിന്റെ വേഷം. സണ്ണി വെയിൻ, അലൻസിയാർ എന്നിവർ പ്രധാന കഥാപാത്രങ്ങളായി എത്തുന്ന ചിത്രമാണ് ‘അപ്പൻ’. തൊടുപുഴ ആയിരുന്നു ചിത്രത്തിന്റെ പ്രധാന ലൊക്കേഷൻ.

‘അപ്പൻ’ സിനിമയുടെ കഥയും സംവിധാനവും മജുവാണ്. സണ്ണി വെയിനിനൊപ്പം അനന്യ, ഗ്രേസ് ആന്റണി, പോളി വത്സൻ, രാധിക രാധാകൃഷ്ണൻ, അനിൽ കെ ശിവറാം, വിജിലേഷ്, ഉണ്ണി രാജ, അഷ്റഫ്, ദ്രുപദ് കൃഷ്ണ എന്നിവരും ചിത്രത്തിൽ അഭിനയിക്കുന്നു. കുടുംബ പശ്ചാത്തലത്തിൽ കഥ പറയുന്ന സിനിമയുടെ തിരക്കഥ ആർ.ജയകുമാറും മജുവും ചേർന്നാണ് രചിച്ചിരിക്കുന്നത്.