നടൻ അർജുനെതിരെ മലയാളി നടിയുടെ ‘മീ ടൂ’ ആരോപണം; തെളിവില്ലെന്ന് പോലീസിന്റെ റിപ്പോർട്ട്

സൗത്ത് ഇന്ത്യൻ ആക്ഷൻ കിംഗ് അർജുൻ സർജക്ക് മീ ടൂ ആരോപണത്തിൽ പോലീസിന്റെ ക്ലീൻ ചിറ്റ്. മലയാളം, തമിഴ്, കന്നഡ ചിത്രങ്ങളിലൂടെ പ്രശസ്തയായ ശ്രുതി ഹരിഹരനാണ് അർജുനെതിരെ മീ ടൂ ആരോപണവുമായി മുന്നോട്ട് വന്നത്. ഫസ്റ്റ് അഡിഷണൽ ചീഫ് മെട്രോപൊളിറ്റൻ മജിസ്‌ട്രേറ്റ് മുന്നാകെ കർണാടക പോലീസ് ബി റിപ്പോർട്ടാണ് സമർപ്പിച്ചത്. മീ ടൂ ക്യാമ്പയിനിന്റെ ഭാഗമായി നാല് പേജ് വരുന്ന ഒരു സ്റ്റേറ്റ്മെന്റാണ് നടി സോഷ്യൽ മീഡിയയിൽ പങ്ക് വെച്ചത്. മൂന്ന് വർഷം മുൻപ് കബ്ബൺ പാർക്ക് പൊലീസാണ് അന്വേഷണം ആരംഭിച്ചത്.

ഒരു രംഗം ചിത്രീകരിക്കുന്നതിന് മുൻപ് റിഹേഴ്‌സൽ എന്ന വ്യാജേന അർജുൻ തന്നെ കെട്ടിപ്പിടിക്കുകയും തന്റെ അനുവാദമില്ലാതെ തന്റെ പിൻഭാഗത്ത് മുകളിലേക്കും താഴേക്കും കൈകളോടിച്ചുവെന്നുമാണ് നടി വെളിപ്പെടുത്തിയത്. തുടർ പോലീസ് സമീപിച്ചത്. നിയമപരമായ നടപടികൾക്കും അന്വേഷണങ്ങൾക്കും ശേഷം അർജുനെതിരെ തക്കതായ തെളിവ് ഒന്നും ലഭിച്ചിട്ടില്ല എന്നാണ് പോലീസ് അറിയിച്ചത്. എന്തുകൊണ്ടാണ് ഇങ്ങനെ ഒരു വിവാദം ഉണ്ടായതെന്നാണ് അർജുൻ ഇക്കാര്യത്തിൽ പ്രതികരിച്ചത്.

ദിലീപിനൊപ്പം അഭിനയിച്ച ജാക്ക് & ഡാനിയേലാണ് അവസാനമായി തീയറ്ററുകളിൽ എത്തിയ അർജുന്റെ മലയാള ചലച്ചിത്രം. ശിവകാർത്തികേയൻ ചിത്രം ഹീറോ, ഹർഭജൻ സിംഗിനൊപ്പമഭിനയിച്ച ഫ്രണ്ട്ഷിപ്പ് എന്നിവയാണ് തീയറ്ററുകളിൽ എത്തിയ അർജുന്റെ മറ്റ് ചിത്രങ്ങൾ. നാളെ വമ്പൻ റിലീസിനൊരുങ്ങുന്ന മോഹൻലാൽ – പ്രിയദർശൻ ചിത്രം മരക്കാറിലും ഒരു മികച്ച വേഷം അർജുൻ കൈകാര്യം ചെയ്യുന്നുണ്ട്.