‘പ്രാർത്ഥിച്ച എല്ലാവർക്കും നന്ദി, പഴയതിലും അടിപൊളിയായി തിരിച്ചു വരും, ആരും വിഷമിക്കേണ്ട’ – തിരിച്ചു വരുമ്പോൾ ഒപ്പമുണ്ടാകുമെന്ന് മലയാളികൾ

കലാകാരനും നടനുമായ കൊല്ലം സുധിയുടെ മരണത്തിന് ഇടയാക്കിയ വാഹനാപകടത്തിൽ പരുക്കേറ്റവരിൽ ഒരാൾ ആയിരുന്നു മിമിക്രി ആർട്ടിസ്റ്റ് ആയ മഹേഷ് കുഞ്ഞുമോൻ. മഹേഷ് അപകടത്തിൽപ്പെട്ടു എന്നറിയാമായിരുന്നെങ്കിലും കൂടുതൽ വിശദാംശങ്ങൾ പുറംലോകത്തിന് അറിയാമായിരുന്നില്ല. എന്നാൽ മഹേഷ് തന്നെ തന്റെ ആരോഗ്യസ്ഥിതി വ്യക്തമാക്കി വീഡിയോ പങ്കുവെച്ചിരിക്കുകയാണ്. നിമിഷനേരം കൊണ്ടാണ് വീഡിയോ വൈറലായി മാറിയത്. ശസ്ത്രക്രിയ കഴിഞ്ഞ് സുഖം പ്രാപിച്ച് വരുന്ന മഹേഷ് ഇത് ആദ്യമായാണ് ക്യാമറയ്ക്ക് മുന്നിലെത്തിയത്.

‘എനിക്കു വേണ്ടി പ്രാർത്ഥിച്ച എല്ലാ ആളുകൾക്കും ഞാൻ നന്ദി പറയുകയാണ്. ഞാൻ മിമിക്രി ആർട്ടിസ്റ്റും ഡബ്ബിംഗ് ആർട്ടിസ്റ്റുമാണ്. എല്ലാവർക്കും അറിയാം മിമിക്രിയാണ് എന്റെ മെയിൻ. മിമിക്രിയിലൂടെയാണ് എല്ലാവരും എന്നെ തിരിച്ചറിഞ്ഞത്, എന്നെ ഇഷ്ടപ്പെട്ടത്. ഇനി കുറച്ച് നാളത്തേക്ക് റെസ്റ്റ് ആണ്, നിങ്ങളാരും വിഷമിക്കേണ്ട. പഴയതിനേക്കാൾ അടിപൊളിയായിട്ട് ഞാൻ തിരിച്ചു വരും. അപ്പോഴും നിങ്ങൾ എന്റെ കൂടെ ഉണ്ടാകണം. എന്നെ സപ്പോർട്ട് ചെയ്യണം.’ – മഹേഷ് തന്റെ വീഡിയോയിൽ പറഞ്ഞു.

കോഴിക്കോട് വടകരയിൽ ഒരു പരിപാടിയിൽ പങ്കെടുത്ത് മടങ്ങവേ ആയിരുന്നു മഹേഷ് കുഞ്ഞുമോൻ, കൊല്ലം സുധി, ബിനു അടിമാലി എന്നിവർ സഞ്ചരിച്ച കാർ അപകടത്തിൽപ്പെട്ടത്. ജൂൺ അഞ്ചിനു പുലർച്ചെ നാലരയോടെ ദേശീയപാത 66 ലെ പനമ്പിക്കുന്നിൽ ഇവർ സഞ്ചരിച്ചിരുന്ന കാറും പിക്കപ് വാനുമായി കൂട്ടിയിടിച്ചായിരുന്നു അപകടം. മഹേഷിന് മുഖത്തും പല്ലുകൾക്കും ഗുരുതരമായി പരുക്ക് പറ്റിയിരുന്നു. മുഖത്തെ പരിക്കുകൾക്കായി ഒൻപതു മണിക്കൂർ നീളുന്ന ശസ്ത്രക്രിയയ്ക്കാണ് മഹേഷ് വിധേയനായത്. അപകടത്തിൽ കൊല്ലം സുധി മരിച്ചിരുന്നു.