ജയിൽ കഴിയുന്ന ആര്യൻ ഖാന് 4500 രൂപയുടെ മണി ഓർഡർ; വീഡിയോ കോളിൽ മകനെ കണ്ട് ഷാരുഖും കുടുംബവും

മുംബൈയിലെ ആർതർ റോഡ് ജയിലിൽ കഴിയുന്ന ആര്യൻ ഖാന് കഴിഞ്ഞദിവസം ഒരു മണി ഓർഡർ എത്തി. 4500 രൂപയുടെ മണി ഓർഡറാണ് ആര്യനെ തേടി ജയിലിലേക്ക് എത്തിയത്. ജയിലിൽ കഴിയുന്നവർക്ക് ബന്ധുക്കൾക്ക് അയയ്ക്കാവുന്ന പരമാവധി തുകയാണ് 4500 രൂപ. ഷാരുഖ് ഖാനാണ് മകന് ഈ തുക അയച്ചത്. ജയിലിൽ കഴിയുന്ന ആര്യൻ ഖാന് ഈ തുക ഉപയോഗിച്ച് ഇഷ്ടമുള്ള ഭക്ഷണവും മറ്റ് സാധനങ്ങളും ഓർഡർ ചെയ്യാവുന്നതാണ്.

കുടുംബത്തിൽ നിന്ന് മണി ഓർഡർ ലഭിച്ചതു കൂടാതെ കുടുംബവുമായി പത്തു മിനിറ്റ് ഫോണിൽ വീഡിയോ കോളിൽ സംസാരിക്കാനും ആര്യൻ ഖാന് കഴിഞ്ഞു. പിതാവ് ഷാരുഖ് ഖാൻ, മാതാവ് ഗൗരി ഖാൻ എന്നിവരോട് ആര്യൻ ഖാൻ സംസാരിച്ചു. കോവിഡിന്റെ പശ്ചാത്തലത്തിൽ ആഴ്ചയിൽ രണ്ടു ദിവസം കുടുംബവുമായി തടവിൽ കഴിയുന്നവർക്ക് സംസാരിക്കാവുന്നതാണ്. എന്നാൽ, ആര്യൻ ഖാൻ ഒരു തവണ മാത്രമാണ് ഇത് ഉപയോഗപ്പെടുത്തിയത്. കഴിഞ്ഞ ദിവസമായിരുന്നു വീഡിയോ കോൾ ചെയ്തത്. തിങ്കളാഴ്ചയാണ് മണി ഓർഡർ ലഭിച്ചതെന്ന് ജയിൽ സൂപ്രണ്ട് നിതിൻ വായ്ചൽ അറിയിച്ചു.

അതേസമയം, ആര്യന് ജയിൽഭക്ഷണം നൽകുന്നുണ്ടെന്നും നിതിൻ വായ്ചാൽ പറഞ്ഞു. കോടതി ഉത്തരവ് വരുന്നതുവരെ താരത്തിന്റെ മകന് വീട്ടിലോ പുറത്തുനിന്നുള്ള ഭക്ഷണമോ നൽകില്ലെന്നും അദ്ദേഹം പറഞ്ഞു. മുംബൈ ഡ്രഗ്സ് ഓൺ ക്രൂയിസ് കേസിൽ നാലാം തവണയും ജാമ്യം നിഷേധിച്ചതിനെ തുടർന്ന് ബോളിവുഡ് സൂപ്പർതാരം ഷാരൂഖ് ഖാന്റെ മകൻ ആര്യനെ (23) ഇന്നലെ വൈകുന്നേരം ജയിലിലേക്ക് മടക്കി അയച്ചു. ആര്യന്‍ ഖാന്റെ ജാമ്യാപേക്ഷേയില്‍ മുംബൈ സെഷന്‍സ് കോടതി ഈ മാസം 20ന് വിധി പറയും. മുംബൈ തീരത്ത് കോ‍ർഡേലിയ ഇംപ്രസ എന്ന ആഡംബര കപ്പലിൽ ലഹരിപ്പാര്‍ട്ടി നടക്കവേയാണ് ആര്യൻ ഉൾപ്പടെ ഉള്ളവരെ എൻസിബി അറസ്റ്റ് ചെയ്തത്. രഹസ്യ വിവരത്തെ തുടര്‍ന്നായിരുന്നു റെയ്ഡ്.