‘റൂമിലേക്ക് വാ, ഒരുമിച്ച് ഡിന്നര്‍ കഴിക്കാം’, മമ്മൂക്ക പറഞ്ഞതു കേട്ട് ഞാന്‍ അമ്പരന്നു

പല വേഷങ്ങളിലേക്കും തന്റെ പേര് മമ്മൂട്ടി സംവിധായകരോട് നിര്‍ദേശിക്കാറുണ്ട് എന്നാണ് അസീസ് പറയുന്നത്. മമ്മൂട്ടിയോട് കൂടുതല്‍ അടുത്തിടപഴകിയപ്പോഴാണ് അദ്ദേഹം എത്ര നല്ല മനുഷ്യനാണെന്ന് മനസ്സിലാകുന്നതെന്നും ജാഡ എന്നൊക്കെ ചിലര്‍ പറയുന്നത് വെറുതെ ആണെന്നും നടന്‍ അസീസ് നെടുമങ്ങാട്. റിപ്പോര്‍ട്ടര്‍ ചാനലിന് നല്‍കിയ അഭിമുഖത്തിലാണ് ഇക്കാര്യങ്ങള്‍ പറഞ്ഞത്.

പരോള്‍ എന്ന സിനിമക്കിടെ തനിക്കുണ്ടായ ഒരു അനുഭവവും അസീസ് പറഞ്ഞു.” ഷൂട്ടിംഗ് കഴിഞ്ഞ ഒരു ദിവസം മമ്മൂക്ക ഇറങ്ങാന്‍ നേരത്ത് എന്റെ അടുത്തേക്ക് വന്നു. എന്നിട്ട് ചോദിച്ചു. ഇന്നെന്താ വൈകിട്ട് പരിപാടി എന്ന് ചോദിച്ചു. ഒന്നുമില്ല. ഷൂട്ടിംഗ് കഴിഞ്ഞ് റൂമില്‍ പോകും എന്ന് ഞാന്‍ പറഞ്ഞു. ആഹ്, എന്നാ റൂമിലേക്ക് വാ. ഒരുമിച്ച് ഡിന്നര്‍ കഴിക്കാം എന്നുപറഞ്ഞു. ഞാന്‍ ശരിക്കും അത്ഭുതപ്പെട്ടുപോയി.

പുള്ളി ആറുമണിയായപ്പോള്‍ പോകുകയും ചെയ്തു. ഞങ്ങള്‍ക്ക് 9 മണിവരെ ഷൂട്ട് ഉണ്ടായിരുന്നു. ആരോട് പോയി പറയും മമ്മൂക്ക ഡിന്നര്‍ കഴിക്കാന്‍ വിളിച്ചിട്ടുണ്ടെന്ന്. എവിടെ പോണം, ആരോട് ചോദിക്കും. ഞാന്‍ ആകെ കണ്‍ഫ്യൂഷനിലായി. ഉടനെ എനിക്ക് ഒരു കോള്‍ വന്നു. മമ്മൂക്കയുടെ മേക്കപ്പ് മാന്‍ ജോര്‍ജേട്ടനായിരുന്നു അത്. ഒരു വണ്ടി വിട്ടുണ്ട്. അതില്‍ കേറി ഇങ്ങോട്ട് വന്നോളു എന്ന് അദ്ദേഹം പറഞ്ഞു. ഞാനും കലാഭവന്‍ ഹനീഫയ്ക്കും ആ വണ്ടിയില്‍ കയറി പോയി, അസീസ് പറഞ്ഞു.

പിന്നീട് റൂമിലെത്തിയപ്പോള്‍ മമ്മൂക്ക സംസാരവും തമാശയും ഒക്കെയായിരുന്നു. ഏകദേശം 1 മണിവരെ സംസാരം തുടര്‍ന്നു. ഭക്ഷണം കഴിച്ചു കൊണ്ടിരുന്നപ്പോള്‍ ഭാര്യയെ വീഡിയോ കോള്‍ ചെയ്തു. മമ്മൂക്ക അത് കണ്ടപ്പോള്‍ ആരാ വീഡിയോ കോളിലെന്ന് ചോദിച്ചു. ഞാന്‍ ഫോണ്‍ മമ്മൂക്കയ്ക്ക് മുന്നിലേക്ക് തിരിച്ചു. എന്നാല്‍ മമ്മൂക്കയെ കണ്ടതും ഭാര്യ ഞെട്ടി ഫോണ്‍ കട്ട് ചെയ്ത് പോയെന്നും അസീസ് പറഞ്ഞു.